އޮންލައިންކޮށް ގައިދީން ޑޮކްޓަރަށް ދެއްކޭނެ ގޮތް ހަމަޖެއްސުމުގެ އެއްބަސްވުމުގައި ސޮއިކޮށްފި
29 އެޕްރީލު 2021 | ބުރާސްފަތި 13:48ޑޮކްޓަރަށް ދައްކަން ހަމަޖެހިފައިވާ މީހާގެ ސިއްހީ މައުލޫމާތު އެޕޮއިންޓްމަންޓްގެ 01 ގަޑިއިރު ކުރިން ޑޮކްޓަރާ ހިއްސާކުރެވޭނެ
ގައިދީންނާއި ބަންދުމީހުން އޮންލައިންކޮށް ޑޮކްޓަރަށް ދެއްކުމުގެ އެއްބަސްވުމުގައި ސޮއިކުރުން
ކަރެކްޝަންސްގެ ބެލުމުގެ ދަށުގައިވާ ގައިދީންނާއި ބަންދުމީހުންނަށް ޒަމާނީ ވަސީލަތްތައް ބޭނުންކޮށްގެން ފަސޭހަކަމާއެކު ޑޮކްޓަރަށް ދެއްކޭނެ އިންތިޒާމް ހަމަޖެއްސުމާއި ބެހޭގޮތުން އިންދިރާ ގާނދީ މެމޯރިއަލް ހޮސްޕިޓަލް (އައިޖީއެމްއެޗް) އާއެކު އެއްބަސްވުމެއްގައި ސޮއިކޮށްފިއެވެ.
ކަރެކްޝަނުން ބުނީ، މި އެއްބަސްވުމާއެކު ދެން ގައިދީންނާއި ބަންދުމީހުން ޑޮކްޓަރަށް ދެއްކުމުގެ ކަންތައްތައް ކުރިއަށްދާނީ ގޫގްލް މީޓް މެދުވެރިކޮށް ކަމަށާއި ޑޮކްޓަރަށް ދައްކަން ހަމަޖެހިފައިވާ މީހާގެ ސިއްހީ މައުލޫމާތު އެޕޮއިންޓްމަންޓުގެ ކުރިން ޑޮކްޓަރާ ހިއްސާކުރެވޭނެ ކަމަށެވެ. އަދި އޮންލައިން ކޮންސަލްޓޭޝަންތަކާއި ގުޅިގެން ހަދަންޖެހޭ ޓެސްޓުތައް ހެދޭނެ އަވަސް އިންތިޒާމެއް ހަމަޖެހިގެން ދާނެކަމަށް މައުލޫމާތުދެއެވެ.
މި އެއްބަސްވުމުގައި ސޮއިކޮށްފައިވަނީ އޭޕްރީލްމަހުގެ އެއްވަނަ ދުވަހުއެވެ. މީ އެއް އަހަރުދުވަހުގެ މުއްދަތަކަށް ސޮއިކުރެވުނު އެއްބަސްވުމެކެވެ.
މި އެއްބަސްވުމުގެ މަގުސަދަކީ ކަރެކްޝަންސްގެ ބެލުމުގެ ދަށުގައިތިބޭ މީހުން، އާންމު ބަލިތަކަށް ފަރުވާދޭ ޑޮކްޓަރުންނަށާއި، ސްޕެޝަލިސްޓުނަށް ދެއްކުމަށް އެޕޮއިންޓްމަންޓް ލިބުމުގައި ހުރި ދަތިތައް ހައްލުކޮށް އެމީހުންގެ ބޭސްފަރުވާގެ ކަންކަން އަވަސްކޮށް، ލިބެންޖެހޭ ފަރުވާ ކަށަވަރުކުރުން ކަމަށް ކަރެކްޝަނުން ބުނެއެވެ.
މީގެ އިތުރުން އޮންލައިންކޮށް ޑޮކްޓަރަށް ދެއްކޭނެ އިންތިޒާމެއް ހަމަޖެހިގެން ދިއުމަކީ ގައިދީނަށް ބޭސް ފަރުވާ ފޯރުކޮށްދިނުމަށް ލިބޭ ވަރަށް ބޮޑު ލުއިފަސޭހައެއްކަމަށާއި، އަމާޒަކީ ކޮވިޑްގެ ބަލިމަޑުކަން ފެތުރެމުންދާ މި ދަނޑިވަޅުގައި، އެމީހުނަށް ރައްކާތެރިކަމާއެކު ބޭސްފަރުވާގެ ޚިދުމަތް ފޯރުކޮށްދިނުން ކަމަށް ކަރެކްޝަނުން ފާހަގަކުރެއެވެ.
