ރިސޯޓް މުއައްޒަފުންގެ 99 އިންސައްތަ ވެކްސިނުގެ ފުރަތަމަ ޑޯޒް ޖަހައިފި
ވެކްސިނުގެ ދެވަނަ ޑޯޒް 8000 މުއައްޒަފުން ޖަހާފައިވޭ
ވަން އެންޑް އޮންލީ ރީތިރަށް ރިސޯޓުގައި ވެކްސިން ޖަހަން ފެށުމުގެ ޕްރޮގްރާމުގެ ތެރެއިން
ރާއްޖޭގެ ރިސޯޓުތަކުގެ 99 އިންސައްތަ މުއައްޒަފުން ވެކްސިނުގެ ފުރަތަމަ ޑޯޒް ޖަހާފައިވާ ކަމަށް ޓޫރިޒަމް މިނިސްޓަރު ޑރ. އަބްދުﷲ މައުސޫމް ވިދާޅުވެއްޖެއެވެ.
ޓޫރިޒަމް މިނިސްޓަރ މިހެން ވިދާޅުވީ އެމްއެމްޕީއާރުސީ އާއި ޓޫރިޒަމް މިނިސްޓްރީ ގުޅިގެން ފެށި "އައިއޭމް ވެކްސިނޭޓެޑް" ކެމްޕެއިން ފެށުމަށްޓަކައި ބޭއްވި ރަސްމިއްޔާތުގައެވެ. މިނިސްޓަރ މައުސޫމް ވިދާޅުވީ 99 އިންސައްތަ މުއައްޒަފުން ވެކްސިނުގެ ފުރަތަމަ ޑޯޒް ޖަހާފައިވާއިރު 8،000 މުއައްޒަފުން ވެކްސިނުގެ ދެވަނަ ޑޯޒް ޖަހާފައިވާ ކަމަށެވެ.
ފަތުރުވެރިކަމުގެ ސިނާއަތުގައި މަސައްކަތް ކުރާ މީހުންނަށް ކޮވިޑް-19ގެ ވެކްސިން ދޭން ފަށާފައިވަނީ މިއަހަރުގެ ފެބްރުއަރީ މަހުގެ 4 ވަނަ ދުވަހުއެވެ. ކޮވިޑް-19 ވެކްސިނުގެ ދެވަނަ ޑޯޒް ޖަހާތާ ދެ ހަފުތާ ފަހުން ރިސޯޓް މުއައްޒަފުންނަށް ވެސް ރާއްޖޭގެ ރަށްރަށަަށް ދަތުރުކުރެވޭނެ ކަމަށް ޓޫރިޒަމް މިނިސްޓްރީން ވަނީ ބުނެފައެވެ.
ޓޫރިޒަމް މިނިސްޓްރީން ބުނީ ރިސޯޓް މުވައްޒަފުންނަށް ކޮވިޑް-19 ވެކްސިނުގެ ދެވަނަ ޑޯޒް ޖަހާތާ ދެ ހަފުތާ ފަހުން ހެލްތް ޕްރޮޓެކްޝަން އެޖެންސީ (އެޗްޕީއޭ) ގެ ގައިޑްލައިނާ އެއްގޮތަށް ރާއްޖޭގެ ރަށްރަށަަށް ދަތުރުކުރެވޭނެ ކަމަށެވެ.
ޓޫރިޒަމް މިނިސްޓްރީން މިހެން ބުނެފައިވާއިރު ކަރަންޓީނުވުމަކާ ނުލައި ދަތުރުކުރެވޭނެ އުސޫލު އެޗްޕީއޭއިން ވަނީ އާންމުކޮށްފައެވެ. މި އުސޫލު ބުނާ ގޮތުން ރަށެއްގެ އާބާދީގެ 60 އިންސައްތަ މީހުން ކޮވިޑް-19 ވެކްސިނުގެ ދެ ޑޯޒް ފުރިހަމަކުރުމުން ކަރަންޓީނުވުމަކާ ނުލައި އެ ރަށަކަށް ދަތުރުކުރެވޭނެއެވެ.
އެޗްޕީއޭއިން ބުނެފައިވަނީ އެޕްރީލް 20 ވަނަ ދުވަހުން ފެށިގެން، ވަކިގޮތެއް އަންގަންދެން ރަށެއްގެ އާބާދީގެ 60 އިންސައްތަ މީހުންނަށް ކޮވިޑް ވެކްސިން ޑޯޒްތައް ހަމަވެފައިނުވާ ރަށްރަށަށް ވެކްސިނުގެ ދެ ޑޯޒް ފުރިހަމަކޮށް، ދެ ހަފުތާ ވެފައިވާ މީހުންނަށް ކަރަންޓީނުވުމަކާ ނުލައި ދަތުރުކުރެވޭނެ ކަމަށެވެ.
