ފިތުރު ޒަކާތުގެ ގޮތުގައި މާލެ ސިޓީން 8 ލައްކަ ރުފިޔާ ދައްކައިފި

މާލޭ ސިޓީން 20,863 މީހުން ފިތުރު ޒަކާތް ދައްކާފައިވާއިރު ފިތުރު ޒަކާތުގެ ގޮތުގައި މިހާތަނަށް މާލެ ސިޓީން 8 ލައްކަ ރުފިޔާ ދައްކާފައިވާކަމަށް އިސްލާމިކް މިނިސްޓްރީން ބުނެފިއެވެ.

މިނިސްޓްރީން ބުނީ، 1442 ވަނަ އަހަރުގެ ރަމަޟާންމަހުގެ 12 ވަނަ ދުވަހާ ހަމައަށް މާލޭ ސިޓީން ފިޠުރު ޒަކާތުގެ ގޮތުގައި 899،031.00ރ ލިބިފައިވާ ކަމަށެވެ. އަދި އެއީ ޖުމްލަ 20،863 މީހުންގެ ފަރާތުން ލިބިފައިވާ އަދަދުކަން މިނިސްޓްރީން ފާހަގަކޮށްފައިވެއެވެ.

މިނިސްޓްރީން މައުލޫމާތު ދޭ ގޮތުގައި އޭގެ ތެރެއިން 17،858 މީހުން ޒަކާތް ދައްކާފައިވަނީ އޮންލައިންކޮށެވެ. އަދި 3005 މީހުންވަނީ މިނިސްޓްރީގައި ބަހައްޓާފައިވާ ކައުންޓަރަށް ޒަކާތް ދައްކާފައެވެ.

1441 ވަނަ އަހަރުގެ 12 ރަމަޟާންގެ ނިޔަލަށް ޒަކާތުގެ ފައިސާގެ ގޮތުގައި ލިބިފައިވަނީ 1،942،201.00 ރުފިޔާކަމަށް މިނިސްޓްރީން މައުލޫމާތު ދެއެވެ. އެގޮތުން މިނިސްޓްރީން ވަނީ ފިޠުރު ޒަކާތް ދެއްކުމަކީ ވާޖިބެއްކަން ހަނދާންކޮށްދީ ހުރިހާ އެންމެންވެސް ފިޠުރު ޒަކާތް ދެއްކުމަށް އިލްތިމާސް ކުރައްވާފައެވެ.