ރާއްޖޭގައި ގާއިމުވެފައިވާ އިންޝުއަރެންސް ނިޒާމުގެ ތެރެއިން ޚިދުމަތް ދިނުމަށް ސްޓެލްކޯއަށް އެންގުމަށް މަޖިލީހުން ފާސްކޮށްފި
27 އެޕްރީލު 2021 | އަންގާރަ 09:49ކުންފުނިތަކުގެ ޕޮލިސީތައް ރިވިއުކޮށް، އެއްހަމަކުރާނެ ގައިޑްލައިނެއް އެކުލަވާލުމަށް ފަހު ކޮމިޓީއަށް ހުށަހެޅުމަށް އެންގުމަށް ނިންމާފައިވޭ
ރައްޔިތުންގެ މަޖިލީހުގެ ޖަލްސާއެއްގެ ތެރެއިން
ރާއްޖޭގައި ގާއިމުވެފައިވާ އިންޝުއަރެންސް ނިޒާމުގެ ތެރެއިން އެ ޚިދުމަތް ދިނުމަށް ސްޓޭޓް އިލެކްޓްރިކް ކޮމްޕެނީ ލިމިޓެޑް (ސްޓެލްކޯ)ށް އެންގުމަށް ރައްޔިތުންގެ މަޖިލީހުން ފާސްކޮށްފިއެވެ.
އަންގާރަ ދުވަހު ބޭއްވި ރައްޔިތުންގެ މަޖިލީހުގެ ޖަލްސާގައި މިކަން ފާސްކޮށްފައިވަނީ އެކަމަށްޓަކައި ނެގުނު ވޯޓުގައި ބައިވެރިވި 57 މެންބަރުންގެ އިއްތިފާގުންނެވެ.
ސްޓެލްކޯގެ މުވައްޒަފުންނާ ގުޅޭ މައްސަލަތައް އެސްއޯއީ ކޮމިޓީން ދިރާސާކޮށް ނިންމިގޮތުގެ ރިޕޯޓު އިއްވަމުން އެ ކޮމިޓީގެ މުގައްރިރު، ހުޅުދޫ ދާއިރާގެ މެންބަރު އިލްޔާސް ލަބީބް ވިދާޅުވީ ސްޓެކްލޯއާ ގުޅުންހުރި ވަރަށް ގިނަ މައްސަލަތަކެއް އެ ކޮމިޓީއަށް ލިބެމުން ދާ ކަމަށެވެ. އަދި މިފަދަ މައްސަލަތައް މަދުކުރުމަށް އެ ކުންފުނީގެ މެނޭޖުމަންޓުން، މުވައްޒަފުންނާ ވިހާވެސް ގާތުން މަސައްކަތް ކުރުމަށް އެންގުމަށް ކޮމިޓީން ފާސްކޮށްފައިވާ ކަމަށެވެ. އަދި ކުންފުނީގެ ގްރީންސް ޕްރޮސީޖަރތައް އިތުބާރު ކުރެވޭނެ ގޮތަކަށް ހަދައި، މި ނިޒާމު ހަރުދަނާ ގޮތެއްގައި ތަންފީޒުކުރުމަށް ސްޓެލްކޯއަށް އެންގުމަށް ނިންމާފައިވާ ކަމަށެވެ.
މި ރިޕޯޓުގައި ބުނީ އެ ކުންފުނިން އެކުލަވާލާފައިވާ، މުވައްޒަފުންނާ ގުޅުންހުރި އަދި ވަޒީފާއާ ގުޅިގެން ކުންފުނިން އަމަލުކުރަމުން ގެންދާ ގަވާއިދުތަކާއި އުސޫލުތަކަކީ، ވަޒީފާއާބެހޭ ގާނޫނާއި އިންޓަރނޭޝަނަލް ބެސްޓް ޕްރެކްޓިސްތަކާ އެއްގޮތްވާ ގޮތުގެމަތިން ހެދިފައިވާ އުސޫލުތަކެއް ނޫންކަމަށް ފާހަގަ ކުރެވިފައިވާ ކަމަށެވެ. އަދި މުވައްޒަފުންނާ އާއިލީގޮތުން ގުޅުންހުރި ފަރާތްތަކަށް ވަޒީފާ ދިނުމުގައި ގެންގުޅޭ އުސޫލާއި ރިޓަޔަރމަންޓް ބެނެފިޓް ފަދަ ޕޮލިސީތައް ރާއްޖޭގެ ސަރުކާރު ހިއްސާވާ އެހެން ކުންފުނިތަކުން ހަދާފައިވާ ޕޮލިސީތަކާ ތަފާތުކަމަށް ފާހަގަ ކުރެވޭ ކަމަށެވެ.
އެހެންކަމުން ރާއްޖޭގައި ހެދިފައިވާ ގާނޫނުތަކަށް ރިއާޔަތް ކުރުމަށްފަހު ކުންފުނީގެ މުވައްޒަފުންނާއި ވަޒީފާއާ ގުޅުންހުރި ޕޮލިސީތައް އެކުލަވާލުމަށް ސްޓެލްކޯއަށް އެންގުމަށް ވެސް ނިންމާފައިވެއެވެ. އަދި ކުންފުނިތަކުން ގެންގުޅޭ އެންމެހައި އުސޫލުތައް ދިރާސާކޮށް، ރަނގަޅު ކުރަންޖެހޭ ފިޔަވަޅުތައް ހިމެނޭ ގޮތަށް ކުންފުނިތަކުގެ ޕޮލިސީތައް ރިވިއުކޮށް، އެއްހަމަކުރާނެ ގައިޑްލައިނެއް އެކުލަވާލުމަށް ފަހު، މި މަސައްކަތް ނިންމިގޮތުގެ ރިޕޯޓެއް އެ ކޮމިޓީއަށް 30 ޖޫން 2021 ކުރިން ހުށަހެޅުމަށް ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑަށް ދެންނެވުމަށް ވެސް ކޮމިޓީން ނިންމާފައިވެއެވެ.
