ގުޑި އެރުވުމަކީ އިހުޒަމާނުއްސުރެ ރާއްޖޭގެ އެކި ކަންކޮޅުތަކުގައި ކޮށްއުޅޭ ކަމެކެވެ. އާންމުގޮތެއްގައި މިކަން ކޮށް އުޅެނީ މަޖަލަކަށެވެ. މާލޭގައި އާންމު ގޮތެއްގައި ގުޑިއަރުވާ މަންޒަރު ފެންނަނީ ރޯދަމަހާ ދިމާކޮށެވެ. މި ރޯދަމަހުގެވެސް ފުރަތަމަ ދުވަހު ކުޑަކުދިންތައް ގުޑިތައް ހިފައިގެން އުސްފަސްގަނޑަށް ޖަމާވިތަން ފެނުނެވެ. އެކިކުލަތަކުގެ އެ ގުޑިތައް އަރުވާފައިހުންނައިރު، ދުރުން މަގުމަތިން ބަލާއިރު މި މަންޒަރަކީ ވަރަށް ހިތްގައިމު މަންޒަރެކެވެ. ސައިކަލުން ދާމީހުންވެސް މި މަންޒަރު ބަލަން ހުއްޓިލާ ފޮޓޯ ނަގާ މަންޒަރު ފެނެއެވެ. މުޅި ސޯޝަލް މީޑިއާގައިވެސް ރޯދަމަސް އަތުވެއްޖެނަމަ ގުޑިއަރުވާ މަންޒަރުގެ ފޮޓޯތައް ގިނަކަން ފާހަގަކުރެވެއެވެ.
އެކި ކުލަކުލައިގެ ގުޑިތައް ވައިގެ ތެރޭގައި އުދުހޭ އެ މަންޒަރު ބަލާލުމުން ހިތަށް އުފާވެރިކަން ގެނުވައެވެ. ކޮންމެ ކުއްޖަކުވެސް އެ ކުއްޖެއްގެ ގުޑި ވައިގެ ތެރޭގައި އެންމެ އުހަށް އެރުވޭތޯ މަސައްކަތް ކުރެއެވެ. ބައެއް ފަހަރު އެހެން ނުވުމުން ބައްޕަ ނޫނީ ބޭބެ ކައިރީގައި ބޮޑާހާކާތަންވެސް ފެނެއެވެ. އެކަމުގެ ޝަކުވާތައް އޮއްސާލައެވެ. ކޮންމެޔަކަސް މި ހިތްގައިމު މަންޒަރު ފެނިގެންދާއިރު ކުރިން ހަދާފައި ހުންނަ ކަރުދާސް ގުޑި މިހާރު ފެންނަނީ ވަރަށް ވެސް މަދުންނެވެ. މިހާރު ހުންނަނީ ފޮތިން ހަދާފައި ހުންނަ ގުޑިތަކެކެވެ. ރާއްޖެއިން ބޭރުން ގެނެސްފައި ހުންނަ މި ގުޑިތައްވެސް އެހާމެ ރީއްޗެވެ. އެކި ކުލަކުލައިގެ ގުޑިތައް ވައިގެ ތެރޭގައި އުދުހޭއިރު ނުލާހިކު ޗާލެވެ.
މިކަމަަށް ފޯރި ހުންނަނީ ހަމައެކަނި ކުޑަކުދިން އެކަންޏެއް ނޫނެވެ. ފުރާވަރުގެ ކުދިންނާއި ޒުވާނުންވެސް މިކަމަށް ނުލާހިކު ޝައުގުވެރިކަން ހުރެއެވެ. އެހެންނަމަވެސް އުމުރުގެ ގޮތުން ބައެއް ފަހަރު ގުޑިއަރުވާ ހިތްވިޔަސް ފުރާވަރުގެ ކުދިންނާއި ޒުވާނުން ފަސްޖެހޭ ތަން އާދައެވެ. އާންމު ގޮތެއްގައި އުސްފަސްގަނޑު ސަރަހައްދާއި ދިމާލުން ހުރަސް ކުރާއިރު ހަވީރު ގަޑީގައި ވަރަށް ގިނަ އަދަދެއްގެ ކުދިން ގުޑިއަރުވާ ތަން ފެނިގެންދެއެވެ. އަދި މި މިންޒަރުތައް ބެލުމަށާއި ފޮޓޯ ނަގައި ނުވަތަ ސޯޝަލްމީޑިއާއަށް ލުމަށްޓަކައި އެ ސަރަހައްދުން ދާ މީހުން ހުއްޓިލައިގެން ތިބެއެވެ. މިއީ ބަލާލަން ނުލާހިކު ހިތްގައިމު މަންޒަރެކެވެ. މިދިޔަ ރޯދަމަހު މާލެ ސަރަހައްދު ލޮކްޑައުން ކުރުމުގެ ސަބަބުން ގެއިން ނުނިކުމެވި، ގޭގައި ބަންދުވެގެން ތިބެން ޖެހުމުގެ ސަބަބުން މިފަދަ ކަންތައްތަކުން ކުދިން މަހުރޫމްވެގެން ދިޔައެވެ. އެހެންނަމަވެސް މި ރޯދަމަސް އަޅުގަނޑުމެންނާއި މި ބައްދަލުކުރީ މުޅިން ތަފާތުކޮށެވެ. ގޭގައި ބަންދުވެފައި މިފަހަރު ތިބޭކަށް ނުޖެހުނެވެ. މި ރޯދަމަސް އެއްކޮށް ނިމެންދެން ކުލަކުލައިގެ ގުޑިތައް ވައިގެ ތެރޭގައި އުދުހޭ މަންޒަރު ދެކޭ ހިތްވެއެވެ.
