އިންޑިއާގައި ޕޮޒިޓިވްވި މީހުންގެ އައު ރެކޯޑެއް

ޖެހިޖެހިގެން ދެވަނަ ދުވަހު އިންޑިއާގައި ރެކޯޑް އަދަދަކަށް މީހުން ޕޮޒިޓިވްވެއްޖެއެވެ.

އާދިއްތަ ދުވަހު އިންޑިއާގައި 340،000ށް ވުރެ ގިނަ މީހުން އެއްފަހަރާ ޕޮޒިޓިވްވެ ދުނިޔޭގެ ރެކޯޑް ހަދާފައިވާ އިރު، ހޯމަ ދުވަހު ވެސް ވަނީ 350،000ށް ވުރެ ގިނަ މީހުން ޕޮޒިޓިވްވެ އަނެއްކާވެސް މިވަނީ ދުނިޔޭގެ ރެކޯޑެއް ގާއިމްކޮށްފައެވެ. އިންޑިއާއަށް ބިންދާލި ދެވަނަ ރާޅާއެކު ދުވާލެއްގެ މައްޗަށް ބަލީގައި މަރުވާ މީހުންގެ އަދަދު އަންނަނީ ހާހުން ރެކޯޑް ކުރަމުންނެވެ.

ކޭސްތައް އިތުރުވެ ހޮސްޕިޓަލްތަކަށް ނުކަތާވަރަށް ބާރުބޮޑުވެ އިންޑިއާގައި އޮކްސިޖަން ލިބުމުގައި ވެސް ވަނީ ދަތިތަކެއް ދިމާވެފައެވެ. މިއާއެކު ޔޫކޭ އަދި އެމެރިކާއިން ވަނީ އިންޑިއާއަށް ސިއްހީ އެހީތެރިކަން ފޯރުކޮށްދިނުމަށް ވެސް ނިންމާފައެވެ.

މާޗް މަހުގައި އިންޑިއާއަށް ދެވަނަ ރާޅު ބިންދާލާފައިވާ އިރު، ރާޅުގެ އަސަރު ފެންނަމުންދާ މިންވަރު އަވަސް ކަމަށް ކަމާބެހޭ ފަރާތްތަކުން ވަނީ ބުނެފައެވެ. އެގޮތުން ތިން ދުވަސް ތެރޭގައި މިލިއަނެއްހާ މީހުން ޕޮޒިޓިވްވަމުން އަންނަ އިރު، ފާއިތުވި 2 ހަފްތާ ތެރޭގައި ސިއްހީ ޚިދުމަތްދޭ ތަންތަނުން އޮކްސިޖަން ހުސްވެ، އެނދުތައް ފުރި، ހޮސްޕިޓަލުގެ ބޭރުގައި ބަލިމީހުންނަށް ފަރުވާ ނުލިބި މަރުވަމުން އަންނަކަމަށް މީޑިއާތަކުން އަންނަނީ ރިޕޯޓް ކުރަމުންނެވެ.

ހޯމަ ދުވަހު އިންޑިއާގައި 352،991 މީހަކު ވަނީ ޕޮޒިޓިވްވެފައެވެ. މިއީ ޓެސްޓްކުރެވުނު އަދަދުގެ ފުރިހަމަ ނަތީޖާއެއް ނޫނެވެ. މިއަށްވުރެ ކޭސްތައް އިތުރުވާނެކަމަށް ކަމާބެހޭ ފަރާތްތަކުން ބުނެއެވެ. އަދި ހޯމަ ދުވަހު 2812 މީހަކު ވަނީ މަރުވެފައެވެ. ހޯމަ ދުވަހުގެ އަދަދާއެކު މުޅި ދުނިޔޭގައި ޖެހިޖެހިގެން ފަސް ދުވަހު ރެކޯޑް އަދަދަކަށް އިންޑިއާއިން ވަނީ ކޭސްތައް ރިޕޯޓްކޮށްފައެވެ.

އިންޑިއާގެ ހާލަތު އެންމެ ގޯސް އެއް ސިޓީއަކީ ވެރިރަށް ނިއުދިއްލީއެވެ. ނިއު ދިއްލީގައި މެއި މަހުގެ 3 ވަނަ ދުވަހާ ހަމައަށް ލޮކްޑައުންކޮށްފައިވާ އިރު، އޮކްސިޖަން ލިބުމުގައި ވެސް ދަތިތަކާ ކުރިމަތިވެފައިވެއެވެ. ދިއްލީގައި އޮކްސިޖަން ނުއުފައްދާތީ އެ ސިޓީގެ ސިއްހީ އިދާރާތައް ބަރޯސާވެފައި އޮންނަނީ މައި ސަރުކާރުގެ އެހީތެރިކަމަށެވެ. އޮކްސިޖަން ހުސްވެގެން ދިއްލީގެ ހޮސްޕިޓަލްތަކުން އަންނަނީ "އެސްއޯއެސް" މެސެޖް ޓްވީޓް ކުރަމުންނެވެ. ހޮނިހިރު ދުވަހު އެކަނި ވެސް ހާލުބޮޑު 20 މީހަކަށް އޮކްސިޖަން ނުލިބުމުގެ ސަބަބުން ވަނީ މަރުވެފައެވެ.