ރައީސް ޔާމީން ކޮރަޕްޝަންގެ އަމަލުތައް ހިންގެވިކަން އެންމެ ރަނގަޅަށް އެނގޭނީ އަޅުގަނޑަށް- ބޮންޑާ
40،000ށް ވުރެ ގިނަ އޮކްސިޖަން ފުޅި ގެނެސްފައިވޭ
މާފަންނު މެދު ދާއިރާގެ މެމްބަރު އިބްރާހިމް ރަޝީދު (ބޮންޑާ)
ކުރީގެ ރައީސް އަބްދުﷲ ޔާމީން ކޮރަޕްޝަންގެ އަމަލުތައް ހިންގެވިކަން އެންމެ ރަނގަޅަށް އެނގޭނެ އެކަކީ އެމަނިކުފާނު ކަމަށް މާފަންނު މެދު ދާއިރާގެ މެމްބަރު އިބްރާހިމް ރަޝީދު (ބޮންޑާ) ވިދާޅުވެއްޖެއެވެ.
ހޯމަ ދުވަހުގެ ރައްޔިތުންގެ މަޖިލީހުގެ ޖަލްސާގައި ބޮންޑާ މިހެން ވިދާޅުވީ ކޮވިޑް-19 ގެ ބަލިމަޑުކަމާ ގުޅިގެން، ދިވެހިރާއްޖޭގެ ސިއްހީ ނިޒާމު ހަރުދަނާ ކުރުމަށް މޯލްޑިވްސް ގޭސް ޕްރައިވެޓް ލިމިޓެޑާ ހަވާލުކޮށްގެން ގެނެސްފައިވާ މެޑިކަލް އޮކްސިޖަން ސިލިންޑަރުތަކާ ގުޅޭ މައްސަލަ ކޮމިޓީން ދިރާސާކޮށް ނިންމިގޮތުގެ ރިޕޯޓަށް ބަހުސް ކުރައްވަމުންނެވެ.
ސިލިންޑަރު މައްސަލައިގައި ސަރުކާރުން ކޮރަޕްޝަން ހިންގާފައިވާ ކަމުގެ ތުހުމަތުތަކާ ގުޅިގެން ބަހުސް ކުރައްވަމުން ބޮންޑާ ވިދާޅުވީ އެންމެ ބޮޑަށް ކޮރަޕްޝަން ހިންގާފައިވާ ސަރުކާރަކީ ކުރީ ސަރުކާރު ކަމަށާއި ފުއްގިރި މައްސަލައިގައި ރައީސް ޔާމީން ކޮރަޕްޝަނުގެ އަމަލުތައް ހިންގެވި ކަން ޔަގީންވާ ކަމަށެވެ.
ސިލިންޑަރުތަކުގެ ވާހަކަ ދައްވަމުން މެންބަރު ވިދާޅުވީ ކޮވިޑާ ގުޅިގެން ރާއްޖޭގެ ރައްޔިތުންނަށް ބަލި ފެތުރި، ރައްކާތެރިކަމުގެ ފިޔަވަޅު އެޅުމަށްޓަކައި 40،000ށް ވުރެ ގިނަ އޮކްސިޖަން ފުޅި ގެނެސްފައިވާ ކަަމަށެވެ. އަދި އެކިއެކި ފަރާތްތަކުގެ ޝަކުވާއާ ގުޅިގެން މި ސިލިންޑަރުތައް ގެނެސްފައިވާ ކޮމިޓީން ގޮތް ބަލައި، ފުޅިތައް ގެނައުމުގައި އަމަލު ކޮށްފައިވާ ގޮތް ވެސް ބަލާފައިވާ ކަމަށެވެ.
މެންބަރު ވިދާޅުވީ އެކަން ބެލިބެލުމުން ފާހަގަކުރެވުނީ ވަރަށް ކުއްލި ހާލަތެއްގައި އޮކްސިޖަން އެތެރެކޮށްފައިވާކަން ކަމަށެވެ. އެގޮތުން މުޅި ދިވެހިރާއްޖެ ބަންދުވެފައި އޮތް ހާލަތެއްގައި ފުޅިތައް ގެނެސްފައިވާއިރު ކޮންމެ ގޮތަކަށް ހޯދައިގެން ނަމަވެސް އެ އޮކްސިޖަން ފުޅިތައް ގެނައުން އޭރު މުހިއްމު ކަމަށެވެ. އަދި އާއްމު ހާލަތުގައި ނުގެނެވޭނެ ގޮތްތަކަށް ފުޅިތައް ގެނެސްފައިވާ ކަމަށް މެންބަރު ވިދާޅުވިއެވެ.
ބޮންޑާ ވިދާޅުވީ ޕަރޝިއަލް ޝިޕްމަންޓުގެ ގޮތުގައި ފުޅިތައް އައިސްފައި ހުރިި އިރު، ބައެއް ސެޓްފިކެޓްތަކުގައި މައްސަލަ ހުރުމާއެކު ކޮލަމްބޯއަށް ދެވަނަ ފަހަރަށް ފުޅިތައް ފޮނުވައިގެން ޓެސްޓުތައް ވެސް ހަދާފައިވާ ކަމަށެވެ.
