އިރާގުގެ ވެރިރަށް ބަޣުދާދުގައި ކޮވިޑް-19 ޖެހޭ މީހުންނަށް ފަރުވާދޭ ހޮސްޕިޓަލެއްގައި ރޯވެ، 27 މީހުން މަރުވެއްޖެއެވެ.

ރިޕޯޓްތައް ބުނާ ގޮތުން ބަޣުދާދުގެ އިބުނު ކާތިބް ހޮސްޕިޓަލުގައި ހޮނިހިރު ދުވެހުގެރޭގެ ވަގުތެއްގައި ރޯވީ އޮކްސިޖެން ޓޭންކެއް ގޮވުމުގެ ސަބަބުނެވެ. އަދި ހޮސްޕިޓަލުގައި އަލިފާނުން ރައްކާތެރިވާނެ ގޮތެއް ނެތުމުގެ ސަބަބުންނާއި ފަސޭހައިން ރޯވާތަކެތި ހުރުމުން އަލިފާން ގަނޑުވަނީ ފެތުރިފައެވެ.

އިރާގުގެ ސިވިލް ޑިފެންސް ޔުނިޓުގެ ވެރިޔާ މޭޖާ ޖެނެރަލް ކާދިމް ބޯހަމް ވިދާޅުވީ ގިނަ މީހުން މަރުވާން ދިމާވީ ވެންޓިލޭޓަރުން ނަގާ ރައްކާތެރި ހިސާބަށް ގެންދާން ޖެހުމުން ކަމަށެވެ. އަދި ހޮސްޕިޓަލުގައި ރޯވި އަލިފާންގަނޑު ނިއްވާލަން ގަޑިއިރެއްވި ކަމަށާއި، ހޮސްޕިޓަލުގައި ރޯވި ވަގުތު 120 ބަލިމީހުން ތިބި ކަމަށެވެ. އޭގެ ތެރެއިން 90 މީހުން ސަލާމަތް ކުރެވުނުއިރު އެ ހާދިސާގައި 46 މީހަކަށް އަނިޔާވެފައިވާ ކަމަށް ކާދިމް ބޯހަމް ވިދާޅުވިއެވެ.

އިރާގުގައި މިދިޔަ ފެބްރުއަރީމަހުން ފެށިގެން ކޮވިޑްގެ ކޭސްތައް ހަލުވިކަމާއެކު އިތުރުވަމުންގޮސް، މިހާރު ޖުމްލަ ކޭސްތަކުގެ އަދަދު ވަނީ މިލިއަނަކަށް އަރާފައެވެ. އޭގެ ސަބަބުން، މީގެ ކުރިންވެސް ހަނގުރާމައާއި ކޮރަޕްޝަނާއި އިހުމާލުގެ ސަބަބުން ހާލުގައި އޮތް ސިއްހީ ނިޒާމަށް ވަނީ ނުތަކާވަރުވެފައެވެ.