"މަގުމަތީ ފޮތްހަރު" އިފްތިތާޙުކޮށްފި
މުސްތަގުބަލުގައި މީގެ އިތުރު ފޮތް ހަރުތައް ތަފާތު އެކި މައިޒާންތަކުގައި ބެހެއްޓުމަށް ގައުމީ ކުތުބުޚާނާއިން ވަނީ ނިންމާފައި
"ފޮތްހަރު" އިފްތިތާހުކުރުމުގެ ރަސްމިއްޔާތުގެ ތެރެއިން
ދުނިޔޭގެ ފޮތާއި ކޮޕީރައިޓްގެ ދުވަހާއި، ގައުމީ ކުތުބުޚާނާއަށް 75 އަހަރު ފުރުމުގެ މުނާސަބަތުގެ ޚާއްސަ ހަރަކާތްތަކުގެ ތެރެއިން "މަގުމަތީ ފޮތްހަރު"ގެ ޚިދުމަތް އިފްތިތާޙު ކޮށްފިއެވެ.
މި ޚިދުމަތް އިފްތިތާޙު ކޮށްދެއްވީ، އާޓްސް ކަލްޗަރ އެންޑް ހެރިޓޭޖް މިނިސްޓަރު ޔުމްނާ މައުމޫނާއި މާލެ ސިޓީގެ މޭޔަރު ސިފާ މުހައްމަދެވެ. އެގޮތުން ކަޅުވަކަރު މިސްކިތް މައިޒާނާއި ހިއްތަން މައިޒާނުގައި ބަހައްޓާފައިވާ ފޮތްހަރު، އާދީއްތަ ދުވަހު ހުޅުވައިދެއްވާފައިވެއެވެ.
"މަގުމަތީ ފޮތްހަރު" މިއީ ފަސޭހައިން ފޮތް ނަގާ ހެދޭނެ ގޮތަށް ތައްޔާރުކޮށްފައިވާ ކުޑަ ފޮތްހަރެކެވެ. މި ފޮތްހަރު ބޭނުންކުރުމުގެ އިރުޝާދު ފޮތްހަރުގައި ހަރުކޮށްފައި ހުރެއެވެ. ގައުމީ ކުތުބުޚާނާއިން ބުނީ މި ފޮތްހަރުތަކުން ފޮތް ދޫކޮށް އަދި ބަލައިގަތުމަށް އެއްވެސް ފަރާތެއް ނުވަތަ މެދުވެރިއަކު ނުހުންނާނެ ކަމަށާއި، ފޮތް ގެންދިއުމާއި ފޮތް ކިޔާ ނިމުމުން އެ ފޮތް، އަނބުރާ ފޮތްހަރަށް ގެނެސްދިނުމަކީ ފޮތް ގެންދިޔަ ފަރާތުގެ ޒިންމާއެއް ކަމަށެވެ.
މި މަސައްކަތުގެ ސަބަބުން ކުޑަކުދިންނާއި ބޮޑެތި މީހުންގެ މެދުގައި ފޮތްކިޔުމުގެ ޝައުގުވެރިކަން އާލާވެގެން ދާނެކަމަށް ގައުމީ ކުބުޚާނާއިން ބުނެއެވެ. މި ފޮތްހަރުތަކަށް ފޮތް ހަދިޔާ ކުރުމުގެ ފުރުސަތު ގައުމީ ކުތުބުޚާނާއިން ވަނީ ހުޅުވާލާފައެވެ.
އާދީއްތަ ދުވަހު ބެހެއްޓުނު ދެ ފޮތްހަރަކީ މާލޭސިޓީގައި ބެހެއްޓުމަށް ހަމަޖެހިފައިވާ މިކަހަލަ ފޮތްހަރުތަކުގެ ތެރެއިން ފުރަތަމަ ދެ ފޮތް ހަރެވެ. މުސްތަގުބަލުގައި މީގެ އިތުރު ފޮތްހަރުތައް ތަފާތު އެކި މައިޒާންތަކުގައި ބެހެއްޓުމަށް ގައުމީ ކުތުބުޚާނާއިން ވަނީ ނިންމާފައެވެ.
