މިއަދުވެސް މަގުމަތީގައި އިހުތިޖާޖް ކޮށްފި

ހޯމަ ދުވަހު ވެސް އިދިކޮޅު ފަރާތްތަކުން މަގުމައްޗަށް ނިކުމެ އިހުތިޖާޖް ކޮށްފިއެވެ.

ގުޅިފައިވާ ޕާޓީތަކުން ހޯމަ ދުވަހު ކުރިއަށް ގެންދިޔަ އިހުތިޖާޖް ފަށާފައިވަނީ ސޯސަން މަގުގައި އެމްޑީޕީގެ އޮފީސް ކުރިމަތިންނެވެ. އިހުތިޖާޖްގެ ބައިވެރިން ވަނީ ރައްޔިތުންގެ މަޖިލީހާ ހަމައަށްވެސް ގޮސްފައެވެ. އެއާއެކު އެސްއޯ ފުލުހުންގެ ގިނަ އަދަދެއްގެ ފުލުހުން އެސަރަހައްދަށް އައިސް އިހުތިޖާޖްގެ ބައިވެރިން ވަނީ ފަހަތަށް ޖައްސާފައެވެ.

އެމްޑީޕީ އޮފީސް ކުރިމަތިން ހަވީރު 4:45 ހާއިރު ފެށި މިއިހްތިޖާޖުގެ ބައިވެރިން ބޯޑުތަކަކާއެކު އިހުތިޖާޖް ކުރަމުން ދިޔައިރު މައިގަނޑު ގޮތެއްގައި ގޮވާލާފައި ވަނީ ރައްޔިތުންގެ މަޖިލީހުގެ ރައީސްގެ ޢަބްދުﷲ މަސީހުގެ އިތުބާރު ނެތްކަމަށް ގުޅިފައިވާ އިދިކޮޅު ޕާޓީތަކުގެ މެންބަރުން ހުށަހަޅާފައިވާ މައްސަލަ ކުރިއަށް ގެންދެވުމަށެވެ. އަދި ރައްޔިތުންގެ މަޖިލީހުގެ ގުޅިފައިވާ ޕާޓީތަކުގެ މެންބަރުންތަކެއްގެ ގޮނޑި ގެއްލިފައިވާ ކަމަށް އިލެކްޝަންސް ކޮމިޝަނުން ކަނޑައަޅާފައި ވާތީ އެއީ ކުރެވޭނެ ކަމެއް ނޫން ކަމަށާއި އެކަމާމެދު ސުޕްރީމް ކޯޓުން ގޮތެއް ނިންމައިދިނުމަށް ގޮވާލާ ކޮށްފައިވާ އިހުތިޖާޖުގެ ބައިވެރިން ވަނީ ގޮވާލާފައެވެ.

މީގެ އިތުރުން ގުޅިފައިވާ ޕާޓީތަކުގެ ރައްޔިތުންގެ މަޖިލީހުގެ މެންބަރުންތަކެއް ޖަލަށް ލާފައިވާތީ އެމެންބަރުން ދޫކޮށްލުމަށާއި ހައްޤު ނޫން އަދަބު ނުދިނުމަށް ގޮވާލާފައި ވެއެވެ.

އެސްއޯ ފުލުހުން ވަނީ އިހުތިޖާޖްގެ ބައިވެރިން މަގުމެދަށް ނިކުތަ ނުދީ ހިފަހައްޓާފައެވެ. އެއާއެކު އިހުތިޖާޖް ކޮށްފައިވަނީ އެމްޑީޕީ އޮފީސް ކުރިމަތީގައި ޕޭމެންޓް މަތީގައި ތިބެގެންނެވެ. އަދި ފުލުހުން ވަނީ ގިނަ މީހުން އެއްތަނަށް އެއްވިޔަ ނުދީ ދޭތެރެދޭތެރެއިން އިހުތިޖާޖްގެ ބައިވެރިން އެަސަރަހައްދުން ދުރަށް ޖައްސާފައެވެ.

އިހުތިޖާޖް ނިންމާލީ ހޯމަ ދުވަހުގެރޭ 9:30ގައި އެމްޑީޕީ ހަރުގޭގައި އިހުތިޖާޖް ކުރުމުގެ ޚާއްޞަ ހަރަކާތެއް ކުރިއަށް ގެންދާނެ ކަމަށް ބުނަމުންނެވެ.