އިންޑޮނީޝިއާއިން 53 މީހުންނާއެކު ގެއްލުނު ސަބްމެރިންގެ ބައިތަކެއް ކަމަށް ބެލެވޭ ބައެއް ތަކެތި ފެނިފައިވާ ކަމަށް އެ ގައުމުގެ އޮފިޝަލުންނާ ހަވާލާދީ ބައިނަލްއަގްވާމީ މީޑިއާތަކުން ބުނެފިއެވެ.

ކޭ.އާރް.އައި ނަންގަލާ ނަމަކަށް ކިޔާ މި ސަބްމެރީން ގެއްލިފައިވަނީ ކަނޑުއަޑީގެ މިސައިލުގެ ތަމްރީނެއް ކުރިއަށް ގެންދަނިކޮށެވެ. މި ސަބްމެރިންއާ ގުޅުން ކެނޑިފައިވަނީ، ބުދަ ދުވަހުގެ  ފަތިހު 4:30 ހާއިރު ކަމަށް އެ ގައުމުގެ ޑިފެންސް މިނިސްޓްރީން ކުރިން ބުނެފައިވެއެވެ.

ސަބްމެރިންގެ ބައިތަކެއް ކަމަށް ބެލެވޭ ބައެއްތަކެތި އެ ސަރަހައްދުން ފެނިފައި ވާއިރު، އޭގެތެރޭގައި ހިމެނެނީ ކަނޑު އަޑީގެ މިސައިލުން ރައްކާތެރިވާން ބޭނުންކުރާނެ އާލާތްތަކާއި، ގިރިސްފުޅި އަކާއި، ނަމާދުކުރަން ބޭނުންކުރާ މުސައްލަތަކެކެވެ. މިތަކެތި ފެނުމާ ގުޅިގެން އިންޑޮނީޝިއާގެ ކަނޑުގެ ސިފައިންގެ ޗީފް އޮފިސަރު ޔުޑޯ މަރްގޯނޯ ވިދާޅުވީ، ގެއްލިފައިވާ ސަބްމެރިން، ފެތިފައިވާ ކަމަށް ގަބޫލު ކުރެއްވޭ ކަމަށެވެ.

ކުރިން އިންޑޮނީޝިއާއިން ބަލާފައިވަނީ ކޭ.އާރް.އައި ނަންގަލާ ގެއްލިފައި ވާކަމަށެވެ. އެހެންނަމަވެސް ބައިތައް ފެނުމާ ގުޅިގެން، ސަބްމެރިން ކަނޑު އަޑިއަށް ފެތިފައިވާކަމަށް އިންޑޮނީޝިއާގެ ކަނޑުގެ ސިފައިން މިހާރު ވަނީ ނިންމާފައެވެ. އަދި ސަބްމެރިންގައި ތިބި މީހުން ދިރިތިއްބާ ފެނިދާނެ ކަމުގެ އުންމީދު ނެތް ކަމަށް ވަނީ ނިންމާފައެވެ.

އޮފިޝަލުން ބުނީ، 53 މީހުންނަށް ބޭނުންވާނެ އޮކްސިޖަން ހޮނިހިރު ދުވަހާ ހަމައަށް ހުސްވާނެ ކަމަށެވެ. އަދި ސަބްމެރީން ހޯދުމަށް ހެދި ސްކޭންތައް ދައްކާގޮތުން ސަބްމެރިން ވަނީ 850 މީޓަރު (2788 ފޫޓު) އަޑިއަށް ގޮސްފައި ކަމަށާއި، އެއީ ސަލާމަތްވުމުގެ ފުރުސަތު އޮތްވަރަށްވުރެ މާ އަޑި ކަމަށް އޮފިޝަލުން ބުނެއެވެ. އެ ސަބްމެރިން އަކީ 500 މީޓަރު (1640 ފޫޓު) އަޑިއަށް ދެވޭ ގޮތަށް ފަރުމާކޮށްފައިވާ ސަބްމެރިންއެކެވެ.

ސަބްމެރިން ފެތެން މެދުވެރިވި ސަބަބު މިހާތަނަށް ހޯދިފައެއް ނުވެއެވެ.