"ދެ ރައީސުން ޕާޓީއަށް ދެރަގޮތެއް ނުހަދާނެ"

ލޯކަލް ކައުންސިލް އިންތިޚާބަށް މޯލްޑިވިއަން ޑިމޮކްރަޓިކް ޕާޓީ(އެމްޑީޕީ)ން ޖެހި އަދަދުތައް ދިމާނުވެ މާލެ ސިޓީން ކުރިމަތިވި ބޮޑު ނާކާމިޔާބީއާއެކު ދެން ތިލަވާން ފެށީ މާކުރިއްސުރެވެސް ޕާޓީތެރޭގައި ލާން ފަށާފައިހުރި ރެނދުތަކެއްގެ އަޑެވެ. ރެނދުތައް ލަމުން އައި ކަން ޕާޓީގެ އާންމު މެމްބަރުންނަށްވެސް ދިޔައީ ފެންނަމުންނެވެ. އެހެންނަމަވެސް ކޮންމެ ފަހަރަކުވެސް އެރެނދުތަކުގައި ކޮންމެވެސް ކަހަލަ ބޭހެއް ހާކާލައިގެން އެއީ ނުވާ ކަންތައްތަކެއް ކަމަށް ހަދާލައިގެން ތިބެނީއެވެ.

ފުރަތަމަ ފަހަރަށް ރާއްޖޭގައި ގިނަ ޕާޓީތައް އެކުވެގެން ބޭއްވި ރިޔާސީ އިންތިޚާބު އެމްޑީޕީއަށް ކާމިޔާބުކުރެވި އެވެރިކަމުގެ ދައުރު ފުރިހަމަނުވަނީސް މަގުމަތިން ވެރިކަން ވެއްޓުނެވެ. އެއަށްފަހު 7 އަހަރު ދުވަހު އެމްޑީޕީގެ އާންމު މެމްބަރުންނާއި ލީޑަރޝިޕުން އުފުލި ބުރައާއެކު އަނެއްކާވެސް ވެރިކަމަށް ވަނީ އާދެވިފައެވެ. ނަމަވެސް ކޯލިޝަންގެ ބުރަ އާއި ޕާޓީގެ ތެރޭގައި އުފެދިފައިވާ ފެކްޝަންތަކުގެ ސަބަބުން ވެރިކަމަށް އައުމަށް އެޕާޓީން ރައްޔިތުން ކައިރީގައި ދައްކަމުންދިޔަ ވާހަކަތައް އަދި ހަގީގަތަކަށް ހަދައިދެވޭ ތަނެއް ނުފެނެއެވެ. ނުވަތަ އެކަމުގައި ވަނީ ވަރަށް ބޮޑަށްވެސް ލަސްތަކެއް ކުރިމަތިވެފައެވެ.

މިހުރިހާ ކަންބޮޑުވުންތަކާއި މާޔޫސްކަމާއެކުވެސް އެމްޑީޕީއަށް ލިބިފައިވާ އެންމެ ބޮޑު އެއް ހިތްހަމަޖެހުމަކީ އެޕާޓީގެ ރައީސް، އަދި ކުރީގެ ރައީސް މުހައްމަދު ނަޝީދު އާއި ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހުއެވެ. "ދެ ރައީސު"ންނެވެ.

އެ ދެރައީސުން އެއް ގަލަކަށް އަރައި ތިބުމަކީ އެމްޑީޕީއާއި އެޕާޓީގެ މެމްބަރުންނަށް ނުހަނު މުހިންމު އަދި އެހާމެ ބޭނުންތެރިކަމެކެވެ. ދެ ރައީސުންނަކީ މިވަގުތު ދެ ބާރުގެ ވެރިންނެވެ. ސުޕަރ މެޖޯރިޓީއާއެކު އެމްޑީޕީން ބޭނުންވާ ސިޔާސަތުތައް ތަންފީޒުކުރަން ހިތަކަށް ލިބިފައިވާއިރު ދެ ރައީސުން އެއް މިސްރާބަކަށް މަސައްކަތްކުރުމަކީ މުހިންމު ކަމެކެވެ.

ވެރިކަމަށް އައިސް 2019 ވަނަ އަހަރުގެ މެއި މަހު އެކުލަވާލެވުނު 19 ވަނަ ރައްޔިތުންގެ މަޖިލީހުގައި އެމްޑީޕީއަށް ސުޕަރ މެޖޯރިޓީ ލިބުނެވެ. މިއީ އަދި ރާއްޖޭގައި އަލަށްވީ ކަމެކެވެ. އެއް ޕާޓީއަކަށް އެހާ ބޮޑަށް އަދި މިހާތަނަށް ރައްޔިތުން އިތުބާރުކޮށް އެހާ ބޮޑު މެޖޯރިޓީއެއް ދީފައެއް ނުވެއެވެ. އެއާއެކު ޕާޓީގެ އާންމު މެމްބަރުން އުފަލުން ފޮޅުނެވެ. އެއީ ސުޕަރ މެޖޯރިޓިއާއެކު އެމްޑީޕީން ވީ ވައުދުތައް ފުއްދުމަށް ފަސޭހަވާނެތީއެވެ.

އެހެންނަމަވެސް އެންމެ ފުރަތަމަވެސް މަޖިލީހުގެ ރައީސް ކަނޑައަޅަން ޖެހުނު ހިސާބުން އެމްޑީޕީގެ ތެރޭގައި "ދެ ރައީސު"ންގެ ކޯޅުމެއް އުޅޭކަން ތިލަވާން ފެށިއެވެ. އެކޯޅުން ގަނޑު މައިތިރިވެ އެކަން އޮބިގެން ދިޔައީ ސީދާ ރައީސް ނަޝީދު މަޖިލީހުގެ ރައީސްކަމަށް ވަޑައިގެންނެވުމަށް ހުށަހެޅުއްވުމުނެވެ.

މީގައި ފާހަގަކޮށްލަން ޖެހޭ އަނެއްކަމަކީ ދެ ރައީސުންގެ ގުޅުމެވެ. ދެ ރައީސުންނަކީ ބެސްޓް ފްރެންޑުންނެވެ. އެންމެ ކުޑައިރުއްސުރެވެސް ގާތްކޮށް އުޅުއްވި ކޮންމެ ބޭފުޅަކަށްވެސް އަނެއް ބޭފުޅެއްގެ ކަންކަން އެނގިވަޑައިގަންނަވާ ދެ ބޭފުޅުންނެވެ. މިއީ އަބަދުވެސް ދެ ބޭފުޅުން ދައްކަވަމުންދިޔަ ވާހަކައެވެ. ކުރައްވާ ކޮންމެ ކަމެއް ކުރައްވަނީ ދެ ބޭފުޅުން މަޝްވަރާކުރައްވައިގެންނެވެ. ދެ ބޭފުޅުންގެ ދޭތެރޭގައި އެއްވެސް މައްސަލައެއްނެތެވެ. ނުވެސް އޮންނާނެއެވެ. މިއީ އަބަދުވެސް އެދެބޭފުޅުން ދައްކަވަމުން ދިޔަ ވާހަކައެވެ. އެހެންނަމަވެސް އަބަދުވެސް މަންޒަރުން ފެނުނީ އެހެން ކަމެކެވެ.

ދެ ރައީސުންގެ ފެކްޝަނެއް ވަނީ އުފެދިފައެވެ. ރައްޔިތުންގެ މަޖިލީހުގެ ތެރެއިން އެކަން ވަރަށް ބޮޑަށް ސާފުވެގެންދެއެވެ. 65 މެމްބަރުންގެ ތެރޭގައި ރައީސް ޞާލިހުގެ މެމްބަރުންނާއި ރައީސް ނަޝީދުގެ މެމްބަރުންގެ އެބަތިއްބެވިއެވެ. ދެ ފެކްޝަންގެ ކޯޅުންގަނޑު ދޭތެރެއަކުން ޖަލްސާތަކާއި ކޮމިޓީތަކުންވެސް އަޑުއިވިގެންދެއެވެ. ކޮންމެ ކަމެއް ނިމިގެންދަނީ ޑިމޮކްރަސީއަކީ ޚިޔާލު ތަފާތުވުންތައް އެއްގޮތް ކޮށްގެން ކުރިޔަށްދާ ކަމެކެވެ. އެމްޑީޕީއަކީ ޑިމޮކްރަޓިކް ޕާޓީއެކެވެ. އެޕާޓީގެ ތެރޭގައި ހުރި މިފަދަ ހިތްހަމަނުޖެހުންތައް އަމިއްލައަށް ހައްލުކުރާނެއެވެ. ނަމަވެސް ޕާޓީއަށް ދެރަގޮތެއް ނުހަދާނެއެވެ.

ނަމަވެސް މީގައި ފާހަގަކޮށްލަން ޖެހޭ ކަމަކީ އަބަދު ޚިޔާލު ތަފާތުވެގެން ދެ ފެކްޝަނެއްގެ ދެމެދުގައި ވާދަވެރިކަން އުފެދިފައި އޮންނައިރު އޭގެ އަސަރު ޕާޓީއަށް ނުކޮށް ނުދާނެކަމެވެ. އެކަން މީގެ ދުވަސްކޮޅެއް ކުރިން ތިލަވި ބަރުލަމާނީ، ރިޔާސީ ބަހުސަށް ބަލާލުމުންވެސް އެނގެއެވެ. ރައީސް ނަޝީދު ބޭނުންފުޅުވަނީ ބަރުލަމާނީ ނިޒާމު ގެންނާށެވެ. އެކަން ރައީސް ޞާލިހަށް ދަންނަވާފައިވާއިރު ރައީސް ޞާލިހު ވިދާޅުވެފައިވަނި އެކަން ނިންމާނީ ރައްޔިތުންނެވެ.

އެހެންނަމަވެސް ރައީސް ނަޝީދަށް ތާއީދުކުރާ ފަރާތްތަކުން ބަރުލަމާނީ ނިޒާމު ޕްރޮމޯޓްކުރުމުގެ ކެމްޕެއިނެއްވެސް ފެށިއެވެ. އެކަމާއި ދެކޮޅަށް ރައީސް ޞާލިހު އެއްޗެއް ވިދާޅުނުވި ކަމުގައިވިޔަސް އެނގިގެންދަނީ ރައީސް ޞާލިހު ބަރުލަމާނީ ނިޒާމަށް ތާއީދުކުރައްވާ ރައީސް ނަޝީދު ދެކެވަޑައިގަންނަވަމުން އަންނަ ބޮޑުވަޒީރު ކަމުގެ ހުވަފެންފުޅު ހަގީގަތަކަށް ހެއްދެވުމަށް މަސައްކަތް ނުކުރައްވާ ކަމެވެ. އެއީ ރައީސް ޞާލިހަށް ތާއީދުކުރާ ބައެއް ފަރާތްތަކުން ބަރުލަމާނީ ނިޒާމު ގެންނަން ބޭނުން ނޫންކަމަށް ވިދާޅުވެ ވާހަކަ ދައްކަވާފައިވާތީއެވެ.

ބަރުލަމާނީ، ރިޔާސީ ބަހުސް ވެގެންދިޔައީ އެމްޑީޕީގެ ކުރިމަގުވެސް ކަނޑައެޅިގެންދާނެ ބަހުސަކަށް ކަމަށް ހީވާ ހިސާބަށް ބައެއް ފަހަރު ކަންކަން ފެންނަމުންދިޔައެވެ. އެބަހުސް ހިނގަމުންދަނިކޮށް ދެން ދިމާވީ އެއަށްވުރެ މާ ބޮޑު ކަމެކެވެ. އެއީ އެމްޑީޕީގެ ރައީސް އަދި ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދަށް އަމާޒުކޮށް މެއި މަހުގެ 6 ވަނަ ދުވަހު ދިން ބޮމުގެ ހަމަލާއެވެ. އެހަމަލާއަށް ފަހު ރައީސް ޞާލިހު ވަނީ ރައީސް ނަޝީދު ފަރުވާ ހޯއްދަވަމުން ގެންދެވި އޭޑީކޭ ހޮސްޕިޓަލަށް ހަމަ އެރޭ ވަޑައިގަންނަވާފައެވެ. ނަމަވެސް އެސަރަހައްދަށް އެއްވެ ތިބެ ރައީސް ނަޝީދުގެ ސަޕޯޓަރުން ގެންދިޔައީ ރައީސް ޞާލިހު އޭޑީކޭއަށް ވަޑައިގެންނެވުމުން އެމަނިކުފާނުގެ އިސްތިއުފާއަށް ގޮވަމުންނެވެ.

އެހިސާބުން އަދި ނިމުނީކީ ނޫނެވެ. އެ ހަމަލާއާ ގުޅިގެން އެކި ކަންކަން ފުރޮޅިގެން އަންނަވަރަކަށް ރައީސް ނަޝީދާއި ރައީސް ޞާލިހުގެ ފެކްޝަނުން އެއް ބަޔަކު އަނެއް ބަޔަކަށް ދައްކަމުންދާ ވާހަކަތަކުން މިއީ އެއް ޕާޓީއެއްގެ ބަޔެކޭތޯވެސް ސުވާލުކުރެވޭ ހިސާބަށް ދެއެވެ. ނަޝީދަށް ދިން ހަމަލާގެ ތަހުގީގަށް ސަރުކާރުން ހުރަސް އަޅަމުންދާ ކަމުގެ ތުހުމަތުތައް ކުރަމުންދަނީ ސީދާ ޕާޓީގެ ތެރެއިންނެވެ. އެފަދަ ވާހަކަތައް ވަޓްސް އެޕްގްރޫޕްތަކާއި ސޯޝަލް މީޑިޔާގައި އަދި ގައުމީ މަޖިލީހުގެ ބައްދަލުވުންތަކުގައި ގެންދަވަނީ ދައްކަވަމުންނެވެ. ވާހަކަތަކުގެ މިސްރާބު ހުރި ގޮތުން މިއީ ފަސޭހަ ރަހުމަތަކުން ފަސޭހަވެގެންދާނެ ލައްގަނޑެއްކަމަކަށް ނުފެނެއެވެ.

އެއްބަޔަކު ގަބޫލުކުރާ ގޮތުގައި އެމްޑީޕީގެ ތެރޭގައި މިހާރުވަނީ ދެ ފެކްޝަނެއް އުފެދި ދެ ފެކްޝަންގެ މަސައްކަތްތައް ވަކިން ކުރަން ފަށާފައެވެ. ސަރުކާރުގައި ތިބިނަމަވެސް އެއް ބަޔަކު ގެންދަނީ އިދިކޮޅުގެ ރޯލު އަދާކުރަމުންނެވެ. ނަމަވެސް ދެ ރައީސުން އަދި މިކަމުގައި ފާޅުގައި އެއްޗެއް ވިދާޅެއްނުވެއެވެ. އެއްގޮތަކީ އަނެއްކާވެސް ބެސްޓް ފްރެންޑްކަމުގެ ޓެގް އަޅުއްވައިގެން ތިއްބެވީއެވެ. ނޫނީ ކޮންމެ ބޭފުޅަކުވެސް އެބޭފުޅަކު ކުރިޔަށް ކުޅޭނެ ކުޅި ބައި ރާއްވަވާ ޕާޓީގެ ތެރެއިން ބާރު ހޯއްދަވަން މަސައްކަތް ކުރައްވަނީއެވެ.

އެމްޑީޕީއަކީ އަބަދުވެސް ފިކުރެކޭ ބުނެއެވެ. އެއޮޑިއެއް ދުވަހަކުވެސް ނުފެތޭނޭ ބުނެއެވެ. އެއޮޑި ފެތެން ބޭނުންނުވާނެ އާންމު ރައްޔިތުންގެ އަދަދުވެސް މަދެއް ނޫނެވެ. އެފިކުރު ދެ ބައިވެއްޖެނަމަ ދެން ރާއްޖޭގެ ސިޔާސީ މަސްރަހަށް އަންނާނީ ކޮންކަހަލަ ބަދަލުތަކެއްތޯ ވިސްނަން އަދި މާ އަވަހެވެ. އެހެންނަމަވެސް ޒަމާނުއްސުރެވެސް ހައްގުތަކަށް ވަކާލާތުކުރަމުންދިޔަ ޕާޓީ ދެބައިވެގެން ގޮސްފިނަމަ އެއީ ރާއްޖޭގެ ސިޔާސީ މަސްރަހުގައި ވަކިން ޚާއްސަކޮށް ކުރިމަގަށް ވިސްނާނަމަ ފަސޭހަ ވިސްނުމެއް ނޫނެވެ.

ދެން އޮތީ އަބަދުވެސް ދެ ރައީސުން ވިދާޅުވާ ވާހަކައެވެ. އެއީ އެމްޑީޕީއަށް ދެރަގޮތެއް ނުހައްދަވާނެ ކަމުގެ ވާހަކައެވެ. އެތައް ބަޔެއްގެ ދަލާއި، ލެޔާއި ފުރާނަ ގުރަބާންކޮށްގެން ދެމިއޮތް ޕާޓީ ދެބައިވެ އެއް ބަޔަކު އަނެއް ބަޔަކު ސިޔާސީ ހަތުރުންނަށް ވާ މަންޒަރު ދެކެން ދެ ރައީސުން ބޭނުންފުޅުވޭތޯ އެއީ މިހާރުގެ ބޮޑު ސުވާލެވެ.

ޑީއާރުޕީއަށް ވީ ގޮތަށް ޕާޓީ ދެބައިވެ އެއް ޕާޓީ ތެރެއިން އެހެން ޕާޓީއެއް އުފެދިގެންވެސް ހަމަ ހިނގައިދާނެއެވެ. ނަމަވެސް އެއީ އަދި މިހާތަނަށް އެމްޑީޕީގެ ތެރެއިން ފެނިފައިވާ މަންޒަރެއް ނޫނެވެ. އެމްޑީޕީގެ ފިކުރު އެމްޑީޕީގެ ތެރެއިން ވަކިވެ އެހެން ޕާޓީއެއްގެ ގޮތުގައި އުފެދި ކާމިޔާބު ގޮތެއްގައި ސިޔާސީ ހަރަކާތް ރާއްޖޭގައި އަދި ހިންގިފައެއްނުވެއެވެ.