އެމްޑީޕީގެ ގައުމީ ހިންގާ ކޮމިޓީގެ ބައްދަލުވުމުގެ އެޖެންޑާގައި މިރޭ މުހިއްމު ދެ ކަމެއް
24 އެޕްރީލު 2021 | ހޮނިހިރު 07:58ބައްދަލުވުން ތާވަލުކޮށްފައިވަނީ ހޮނިހިރު ދުވަހުގެރޭ 9:30ށް
ެއެމްޑީޕީގެ ގައުމީ މަޖިލީހުގެ ބައްދަލުވުމެއްގެ ތެރެއިން - މިރޭގެ ބައްދަލުވުމުގެ އެޖެންޑާގައި މުހިއްމު ދެކަމެއް ތާވަލުކޮށްފައިވޭ
މޯލްޑިވިއަން ޑިމޮކްރަޓިކް ޕާޓީ (އެމްޑީޕީ) ގެ ގައުމީ ހިންގާ ކޮމިޓީގެ ބައްދަލުވުމެއް ހޮނިހިރު ދުވަހުގެ ރެއަށް ތާވަލުކޮށްފިއެވެ.
މުހިއްމު ދެ ކަމެއް އެޖެންޑާ ކޮށްފައިވާ މި ބައްދަލުވުން ބާއްވާނީ ހޮނިހިރު ދުވަހުގެރޭ 9:30 ގައި ބިލަބޮން ހައި އިންޓަރނޭޝަނަލް ސުކޫލު ހޯލުގައެވެ.
ބައްދަލުވުމުގެ އެޖެންޑާގައި ހިމެނޭ އެއް ކަމަކީ އެމްޑީޕީގެ ދާއިރާތަކުގެ އިންތިޚާބު 2021 ގައި ބައިވެރިވާ ކެންޑިޑޭޓުންގެ ޝަރުތުތައް ކަޑައެޅުމެވެ. ދެވަނަ ކަމެއްގެ ގޮތުން ތާވަލު ކޮށްފައިވަނީ ނިމިގެން ދިޔަ ލޯކަލް ކައުންސިލް އިންތިޚާބާއި ގުޅޭ މައްސަލަތައް ކޯޓަށް ހުށައެޅުމާއިމެދު ގޮތެއް ނިންމުމެވެ.
އެމްޑީޕީގެ ގައުމީ މަޖިލީހުގެ ދާއިރާތަކުގެ އިންތިޚާބުގައި ވާދަކުރަން ނިންމާފައިވާކަން އެ ޕާޓީގެ މެމްބަރުން ދަނީ ހާމަ ކުރަމުންނެވެ. މީސްމީޑިއާގައި އެކި ކަހަލަ ކެމްޕެއިންތައްވެސް ފަށާފައިވާއިރު، އެމްޑީޕީން ދަނީ ދާއިރާތަކުގެ އިންތިޚާބަށް ވާންޖެހޭ ތައްޔާރީތައް ވަމުންނެވެ. އެމްޑީޕީގެ ގައުމީ މަޖިލީހަކީ އެމްޑީޕީގެ އަސާސީ ގަވާއިދުގެ 5ވަނަ ބާބުގައި ބަޔާންކުރެވިފައިވާ، ޕާޓީގެ 13 ގުނަވަނުގެ ތެރެއިން 2ވަނަ ގުނަވަނެވެ.
