53 މީހުންނާއެކު އިންޑޮނީޝިއާގެ ސަބްމެރީނެއް ގެއްލިއްޖެ

ބާލީގެ އުތުރު ސަރަހައްދަކަށް 53 މީހުނާއެކު އިންޑޮނީޝިއާގެ ސަބްމެރީނެއް ގެއްލިއްޖެއެވެ.

އެގައުމުގެ ކަނޑުގެ ސިފައިން މިހާރު ގެންދަނީ، ކަނޑުގެ މަގުންނާއި ވައިގެ މަގުން ސަބްމެރީން ހޯދުމުގައި ހަރަކާތްތެރިވަމުންނެވެ. މި މަސައްކަތުގައި އަވައްޓެރި އޮސްޓްރޭލިއާ އާއި ސިންގަޕޫރުގެ އެހީތެރިކަމަށް ވެސް މިހާރު ވަނީ އެދިފައެވެ.

އިންޑޮނީޝިއާގެ ކަނޑުގެ ސިފައިންނާއި ހަވާލާދީ މީޑިއާތަކުން ރިޕޯޓުކޮށްފައިވާ ގޮތުގައި، ކޭ.އާރް.އައި ނަންގަލާ ނަމަކަށް ކިޔާ މި ސަބްމެރީން ގެއްލިފައިވަނީ ހަތިޔާރުގެ ތަމްރީނެއް ކުރިއަށް ގެންދަނިކޮށެވެ.

މިކަމާ ގުޅިގެން އިންޑޮނީޝިއާގެ ޑިފެންސް މިނިސްޓްރީން ނެރުނު ބަޔާނުގައި ވާގޮތުން، ބާލީއާއި ގާތްގަނޑަކަށް 60 މޭލު ބޭރުން ގެއްލިފައިވާ މި ސަބްމެރީނާއި އޭގައި ތިބި މީހުން ހޯދުމުގެ މަސައްކަތް ކެނޑިނޭޅި ގެންދަނީ ކުރަމުންނެވެ. މިމަސައްކަތުގައި އަވައްޓެރި ގައުމުތަކުގެ އެހީތެރިކަމަށް އެދި ކުރެވުނު މަސައްކަތަށް، އޮސްޓްރޭލިއާއި ސިންގަޕޫރުގެ އިތުރުން އިންޑިއާގެ ފަރާތުން މިހާރު ޖަވާބެއް ލިބިފައި ވާކަމަށް ބުނެފައިވެއެވެ.

އިންޑޮނީޝިއާގެ ޑިފެންސް މިނިސްޓްރީން ބުނީ، ކަނޑު ދަތުރުކުރާ ގިނަ އަދަދެއްގެ އުޅަނދުފަހަރު، ސަބްމެރީން ހޯދުމުގެ މަސައްކަތުގައި ބޭނުންކުރަމުން ދާކަމަށެވެ. އޭގެތެރޭގައި ހައިޑްރޯ ގްރެފިކް ސާވޭ ޝިޕެއް ހިމެނޭކަން ވެސް އެ މިނިސްޓްރީން ފާހަގަކުރެއެވެ.

މި ސަބްމެރީނާ ގުޅުން ކެނޑިފައިވަނީ، ބުދަ ދުވަހުގެ  ފަތިހު 4:30 ހާއިރު ކަމަށް ޑިފެންސް މިނިސްޓްރީން މައުލޫމާތުދެއެވެ.

ސަބްމެރިން 600 ނުވަތަ 700 މީޓަރު އަޑިއަށް ފެތިފައިވާ ކަމަށް ލަފާކުރެވޭ ކަމަށް ސިފައިންގެ އޮފިސަރަކާއި ހަވާލާދީ ސީއެންއެން-އިންޑޮނީޝިއާ ބުނެއެވެ.