ޑިންގީއެއް ބަންޑުން ޖަހާލައި އެކަކު ގެއްލިއްޖެ
4 ޖޫން 2017 | އާދީއްތަ 22:00ގެއްލުނީ 27 އަހަރުގެ ފުލުހަކު
ކޯސްޓްގާޑުގެ ލޯންޗެއް: އައްޑު އަތޮޅުން ގެއްލިގެން އުޅޭ މީހާ ހޯދުމުގެ މަސައްކަތް ދަނީ ކުރަމުން
އައްޑޫގައި ފަރު މަސްވެރިކަމަށް ނުކުމުގެ އުޅުނު ޑިންގީއެއް ބަންޑުން ޖަހާލައި އޭގެން ދަތުރުކުރި އެކަކު ގެއްލިއްޖެ އެވެ.
އެމްއެންޑީއެފުން ބުނި ގޮތުގައި ތިން ތިބި މި ބޮއްކުރާ ބަންޑުން ޖަހާލާފައި ވަނީ ހިތަދޫ ކަނޑުއޮޅި ތެރެއަށެވެ. މި ހާދިސާ ރިޕޯޓްކޮށްފައި ވަނީ މިރޭ 8:30 ހާއިރު ކަމަށް ވެސް އެމްއެންޑީއެފުން ބުނެ އެވެ.
ޑިންގީ ބަނޑުން ޖަހާލިއިރު ޑިންގީގައި ތިބީ ތިން ދިވެހިންނެވެ. އޭގެ ތެރެއިން ދެ ދިވެހިން ވަނީ ފަތާފައި ގޮސް ޝަންގްރި-ލާ ރިސޯޓަށް އަރާފައި ކަމަށާއި މިހާދިސާގައި ނުފެނިފައި ވަނީ އުމުރުން 27 އަހަރުގެ ޒުވާނެއް ކަމަށް އެމްއެންޑީއެފުން ބުނެ އެވެ.
ބައެއް ފަރާތަކުން ރިޕޯޓްކޮށްފައިވާ ގޮތުގައި، ގެއްލިގެން ހޯދާ ފުލުހަކީ ހިތަދުއަށް ނިސްބަތްވާ މީހެކެވެ. އަދި ފަތާފައި ޝަންގްރި-ލާއަށް އެރީ ފޭދޫއަށް ނިސްބަތްވާ ދެ މީހުންނެވެ.
އެމްއެންޑީއެފުން ބުނި ގޮިތުގައި ގެއްލުނު މީހާ ހޯދުމުގެ މަސައްކަތް ސަދަން އޭރިއާ ކޯސްޓްގާޑް ސްކޮޑްރަންގެ ސިފައިން ދަނީ ކުރަމުންނެވެ. މީނާ ގެއްލުނުއިރު ލައިގެން ހުރީ ކަޅުކުލައިގެ އަތްދިގު ޖަރޒީއަކާއި ކަޅުކުލައިގެ ޓްރެކްޝޫޓެއް ކަމަށް މަޢުލޫމާތު ލިބިފައިވެއެވެ.
ގެއްލުނު މީހާއާ ބެހޭ އެއްވެސް ޚަބަރެއް ވޭތޯ މިސަރަހައްދުން ދަތުރުކުރާ އުޅަނދުފަހަރުންނާއި މިހިސާބު ރަށްތަކުން ބަލައިދިނުން އެދެމެވެ. އަދި މީނާއާއި ބެހޭ އެއްވެސް މަޢުލޫމާތެއް ލިބިއްޖެނަމަ ލަސްނުކުރައްވާ އެމްއެންޑީއެފް ކޯސްޓްގާޑްގެ ހިލޭ ގުޅޭނަމްބަރު 191 ނުވަތަ 3395981 އަދި 3398898 ފޯނަށް ގުޅުއްވައި ދެއްވުން ވެސް އެމްއެންއެންޑީާއެފުން އެދެ އެވެ.
