މިފަހަރު ބްރޯޑްކޮމް އަށް އައްޔަންކުރަން ތަޅުމަށް ފޮނުވީ ޝިފްލާގެ ނަން އެކަނި
21 އެޕްރީލު 2021 | ބުދަ 17:54ރައީސް ފޮނުއްވި ލިސްޓުގައި އިސްކަން ދީފައި ވަނީ ފާތިމަތު ސައުޝަންގެ ނަމަށް
ޝިފްލާ އިބްރާހިމް
މޯލްޑިވްސް ބްރޯޑްކާސްޓިން ކޮމިޝަން (ބްރޯޑްކޮމް)ގެ މެމްބަރުކަމަށް މި ފަހަރު ކުރިމަތިލި މެމްބަރުންގެ ތެރެއިން ޝިފްލާ އިބްރާހިމްގެ ނަން ކޮމިޓީން ފާސްކޮށް ތަޅުމަށް ފޮނުވައިފިއެވެ.
ބްރޯޑްކޮމްގެ މެމްބަރު ކަމަށް ޝިފްލާ ކުރިމަތިލި މިއީ ތިންވަނަ ފަހަރެވެ. މީގެ ކުރިން ފުރަތަމަ ފަހަރު އޭނާގެ ނަން ފާސްނުވީ ތަޅުމުންނެވެ. އަދި ދެވަނަ ފަހަރު ތަޅުމަށް ވެސް ފޮނުވާފައެއް ނުވެއެވެ. މި ފަހަރު ކޮމިޓީން ފާސްކޮށް ތަޅުމަށް ފޮނުވީ ޝިފްލާ ނަން އެކަންޏެވެ.
ބްރޯޑްކޮމް އަށް ކުރިމަތިލި މެމްބަރުންގެ ތެރެއިން މަޖިލީހަށް ރައީސް ފޮނުއްވި ލިސްޓުގައި ހިމެނެނީ ޝިފްލާގެ އިތުރަށް ފާތިމަތު ސައުޝަން އާއި ޑރ. މުހައްމަދު އިބްރާހިމްއެވެ. ޝިފްލާ ބްރޯޑްކޮމް އަށް ކުރިމަތިލާ ކޮންމެ ފަހަރަކު ވެސް ރައީސުލްޖުމްހޫރިއްޔާގެ ލިސްޓުގެ ކުރީގައި އޭނާގެ ނަން ހިމެނެއެވެ. އެކަމަކު މި ފަހަރު ރައީސްގެ ލިސްޓުގެ ކުރީގައި އޮތީ ސައުޝަންގެ ނަމެވެ. ރައީސް ނަން ފޮނުއްވި ތިން ބޭފުޅުންނާ ވެސް އިންޓަވިއު ކުރުމަށް ފަހު މިފަހަރު ކޮމިޓީން ފާސްވެ ތަޅުމަށް ފޮނުވާފައި ވަނީ ޝިފްލާގެ ނަން އެކަންޏެވެ. އެހެންވެ މިފަހަރު ތަޅުމުގައި ވޯޓަށް އަހާނީ ޝިފްލާ މެމްބަރު ކަމަށް އައްޔަންކުރުމަށް އެކަންޏެވެ.
ހަތް މެމްބަރުންގެ މައްޗަށް އެކުލެވޭ އެ ކޮމިޝަނުން މެމްބަރު ކަމަށް ހުޅުވާލީ ކޮމިޝަނުގެ މެމްބަރު އާމިނަތު ތަރާހަތު އިއްޒަތުގެ މަގާމުގެ މުއްދަތު ހަމަވާތީއެވެ.
މިފަހަރު ވެސް އެމަގާމަށް ޝިފްލާ ކުރިމަތިލާފައިވާއިރު އޭނާ އަކީ ނޫސްވެރިކަމުގެ ދާއިރާއިން މާސްޓާސް ހާސިލްކޮށް، މި ދާއިރާގައި ޚިދުމަތްކުރައްވާތާ 20 އަހަރަށް ވުރެ ގިނަ ދުވަސް ވެފައިވާ ބޭފުޅެކެވެ.
