އެމްޑީޕީން އެއްވެސް އިރެއްގައި ބަރުލަމާނީއަށް ތާއީދެއް ނުުކުރޭ - ރީކޯ
21 އެޕްރީލު 2021 | ބުދަ 10:22އެމްޑީޕީން އޭރު ބަރުލަމާނީ ނިޒާމަށް ތާއީދުކުރީ ކީއްވެކަން އޭރުގެ ވަލީ ކޮމެޓީގެ މެމްބަރުންނަށް އެގޭނެ
މޫސާ މަނިކު (ރީކޯ) - ބަރުލަމާނީ އަކީ އެމްޑީޕީގެ ފަލްސަފާއެއް ނޫން
އެމްޑީޕީގެ މައިގަނޑު ފަލްސަފާއަކީ ބަރުލަމާނީ ނޫންކަމަށް އެމްޑީޕީގެ ކުރީގެ ޗެއާޕާރސަން މޫސާ މަނިކު (ރީކޯ) ވިދާޅުވެއްޖެއެވެ.
ޓީވީ ޕްރޮގްރާމެއްގައި ވާހކަދައްކަވަމުން މޫސަ ވިދާޅުވީ އެމްޑީޕީގެ މައިގަނޑު ފަލްސަފާއަކީ ބަރުލަމާނީ ނޫން ކަމަށާއި ތިން ބާރު އެކުވެ މަސްހުނި ވެފައި އޮތް ވެރިކަމާ ދެކޮޅަށް ނުކުމެ އެކަން ބަދަލުކުރީ އެމްޑީޕީން ކަމަށެވެ. މިހާރު އަނެއްކާ މީގެ 30 އަހަރު ކުރިން އޮތްގޮތަށް ހުރިހާ ބާރެއް މަސްހުނި ކުރުމުގެ މަސައްކަތް ރައީސް ނަޝީދު ފެއްޓެވުމުން ބަލައި ނުގަނެވޭ ކަމަަށް ވެސް ވިދާޅުވިއެވެ.
މޫސަ ވިދާޅުވީ ކޮންމެ މީހަކު ރާއްޖޭގެ ވެރިކަމަށް އަންނަން ބޭނުން ވިޔަސް ނިޒާމު ބަދަލުނުކޮށް ވެރިކަމަށް އާދެވިދާނެ ކަމަށެވެ. ރާއްޖޭގައި މިހާރު މިއޮތީ އެ އުސޫލު ގެނެސްފައި ކަމަށެވެ. މޫސަ ވިދާޅުވީ ނިޒާމީ ވޯޓުގައި އެމްޑީޕީން އޭރު ބަރުލަމާނީ ނިޒާމަށް ތާއީދުކުރީ ކީއްވެކަން އޭރުގެ ވަލީ ކޮމެޓީގެ މެމްބަރުންނަށް އެގޭނެ ކަމަށާއި އެކަން ރައްޔަތުންނަށް ހާމަކުރަން ޖެހޭ ކަމަށެވެ.
މޫސަ ވިދާޅުވީ ނިޒާމު ބަދަލު ކުރުމަށް 2 ފަހަރުގެ މަތިން ޚާއްސަ މަޖިލީހުގައި ނެގި ވޯޓުވެސް އެއްވަރުވީކަމަށާއި މިކަން ޔައުމިއްޔާތަކުން ފެންނަން އޮންނާނެ ކަމަށެވެ. އެހާހިސާބުން ދެން ނިމުނީ ރައްޔިތުންގެ ފެންނަނުފެންނަ ވޯޓަކަށް ދިޔުމަށް ކަމަށެވެ. ވަލީ ކޮމިޓީގައި ނިޒާމުގެ ބަހުސް ރަސްމީ ގޮތެއްގައި ފެށުނީ އެހިސާބުން ކަމަށް މޫސަ ވިދާޅުވިއެވެ.
ރައީސް ސާލިހާއި ރައީސް ނަޝީދުވެސް ހިމެނޭ ގޮތަށް އޮތް ވަލީ ކޮމިޓީން ނިންމީ ރައީސް މައުމޫނު ރިޔާސީ ނިޒާމަށް ތާއީދު ކުރެއްވުމުން ބަރުލަމާނީއަށް ތާއީދުކުރުމަށެވެ. އެއީ ރާއްޖެއަށް ރިޔާސީ ނިޒާމު ގެންނަން ބޭނުންވާތީވެ، އެމްޑީޕީއަށް ތާއީދުކުރާ މީހުންވެސް ރިޔާސީ ނިޒާމަށް ވޯޓުދީ އެ ނިޒާމު ގެނައުމަށް ކަމަށް މޫސަ ވިދާޅުވިއެވެ.
އެކަމުން ބަލަން ބޭނުންވީ ވެރިކަން ބަދަލުކުރުމަށް އެމްޑީޕީއަށް ލިބޭނީ ކިހާވަރެއްގެ ތާއީދެއްތޯ އަންދާޒާ ކުރުމެވެ. ބަރުލަމާނީ ނިޒާމަށް އޭރު ތާއީދު ކުރެއްވީ އެ ބޭނުމުގައި ކަމަށް މޫސަ ވިދާޅުވިއެވެ.
ރައީސް ނަޝީދު ވެރިކަން ބޭނުންފުޅުނަމަ އެމްޑިޕީއަށް ބާރު އެބައޮތް ކަމަށާއި މިހާރު އަމަލުކުރަމުން އަންނަ އުސޫލު ބަދަލު ކުރަން ގައުމީ މަޖިލީހުން ނިންމައި 2023ގައި އިންތިޚާބުގައި ވާދަކުރެއްވޭނެ ކަމަށެވެ. އެމްޑީޕީގެ ގައުމީ މަޖިލީހުން މިހާރު ނިންމާފައިވާ ގޮތަކީ އެމްޑީޕީގެ ރައީސަކު އިންތިޚާބުވެއްޖެނަމަ ވިދިވިދިގެން ދެދައުރު ދިނުން ކަމަށެވެ. އެހެންނަމަވެސް އެ ބަދަލުކުރުމުގެ ބާރުވެސް ހަމަ އެމްޑީޕީގައި އެބައޮތްކަމަށް މޫސަ ވިދާޅުވިއެވެ. އެކަމަކު މިއީ ބޮޑުވަޒީރުކަން ބޭނުންވެގެން އެވާހަކަ ދައްކަވަން ވީ ވަގުތު ނޫންކަމަށް ވިދާޅުވެ މޫސަ ވަނީ ބަރުލަމާނީއަކީ އެމްޑީޕީގެ ފަލްސަފާއެއް ނޫންކަމަށް ވިދާޅުވިވާހަކަ ތަކުރާރު ކުރައްވާފައެވެ.
