ވެރިކަމުގެ ނިޒާމާ ހެދި ބަގުޑި ބައްދަން ހަދައިގެން މުސްތަގުބަލުގެ ޖީލުތައް ދަރަނިވެރި ވެދާނެ - މަވޯޓާ ޝަރީފް
ވެރިކަން ނުހިންގި ކަންތައްތައް ބޮއްސުންލައިގެން ހިނގައްޖެ ހާލަތެއްގައި މެނުވީ، ނިޒާމު ބަދަލުކުރަން އުޅުމަކީ ހެޔޮވާ ވާރުގެ ކަމެއް ނޫންކަމަށް ޝަރީފް ވިދާޅުވި
މަރަދޫ ދާއިރާގެ މެންބަރު އިބްރާހިމް ޝަރީފް (މަވޯޓާ ޝަރީފް)
ވެރިކަމުގެ ނިޒާމާ ހެދި ބަގުޑި ބައްދަން ހަދައިގެން މުސްތަގުބަލުގެ ޖީލުތައް ދަރަނިވެރިވެގެން ހިނގައިދާނެ ކަމަށް ރައްޔިތުންގެ މަޖިލީހުގެ މަރަދޫ ދާއިރާގެ މެންބަރު އިބްރާހިމް ޝަރީފް (މަވޯޓާ ޝަރީފް) ވިދާޅުވެއްޖެއެވެ.
ރާއްޖޭގައި އޮތް ރިޔާސީ ނިޒާމު، ބަރުލަމާނީ ނިޒާމަކަށް ބަދަލުކޮށް، ބޮޑުވަޒީރަށް ވެވަޑައިގަންނަވަން ބޭނުންފުޅުވާކަމަށް މަޖިލީހުގެ ރައީސް މުހައްމަދު ނަޝީދު، ރައިސޫލްޖުމްހޫރިއްޔާ އިބްރާހިމް މުހައްމަދު ސާލިހަށް ހުށަހެޅުއްވުމާ ގުޅިގެން، ވެރިކަމުގެ ނިޒާމު ބަދަލުކުރުމުގެ އަޑުތައް މިހާރު މި ވަނީ ގަދަވެފައެވެ.
މިކަމާ ގުޅޭގޮތުން، ރާއްޖެ ޓީވީގެ ފަލަސުރުޚީ ޕްރޮގްރާމްގައި ވާހަކަފުޅު ދައްކަވަމުން މަވޯޓާ ޝަރީފް ވިދާޅުވީ، ރިޔާސީ ނިޒާމަކީ ރާއްޖޭގެ ރައްޔިތުން ވޯޓު ލައިގެން ކަނޑައަޅާފައި އޮތް ނިޒާމެއް ކަމަށާއި، ނިޒާމާ ހެދި ވެރިކަން ނުހިންގި، ކަންތައްތައް ބޮއްސުންލައިގެން ހިނގައްޖެ ހާލަތެއްގައި މެނުވީ، ނިޒާމު ބަދަލުކުރަން އުޅުމަކީ ހެޔޮވާ ވާރުގެ ކަމެއް ނޫން ކަމަށެވެ. އަދި އެހެން ނޫންކަމަށް ވާނަމަ، އެއްވެސް ނިޒާމެއް ހަރުދަނާވެ، ރައްޔިތުންނަށް މަންފާހުރި ވެރިކަމެއް ކުރެވޭނެ ދުވަހެއް ނުފެންނާނެ ކަމަށް މަވޯޓާ ޝަރީފް ވިދާޅުވިއެވެ.
ދިވެހިރާއްޖެއަކީ ޒުވާން އާބާދީއެއް އޮތް ގައުމެއްކަން ފާހަގަކުރައްވައި ޝަރީފް ވިދާޅުވީ، ގިނަ ވަޒީފާ އުފެއްދުމުގެ ބޭނުން ވަރަށް ބޮޑަށް ޖެހިފައި ވާކަމަށާއި، ރާއްޖޭގައި ހުރި މަދު ވަސީލަތްތަކުގެ ބޭނުން ހެޔޮގޮތުގައި ހިފަން ބާރު އަޅަންޖެހިފައި ވަާކަމަށެވެ. އަދި ރާއްޖޭގައި ލިބެން ހުރި މަދު ވަސީލަތްތައް ބޭނުން ކޮށްގެން ރާއްޖޭގެ އުފެއްދުންތެރިކަން އިތުރު ކުރުމުގެ ބަދަލުގައި، ވެރިކަމާއި ވެރިކަމުގެ ނިޒާމާއި ހެދި ބަގުޑި ބައްދަން އުޅެފިނަމަ އަންނަން އޮތް ޖީލުތައް ދަރަނިވެރިވެގެން ހިނގައިދާނެ ކަމަށެވެ.
ރާއްޖޭގައި ވެރިކަން ހިންގާނެ ނިޒާމެއް ކަނޑައެޅުމަށް، އާންމު ރައްޔިތުންގެ ފެންނަ ނުފެންނަ ވޯޓެއް ނަގާފައިވަނީ 2007 ވަނަ އަހަރުއެވެ. އެފަހަރު ރައްޔިތުންގެ 62 އިންސައްތަ އަޣުލަބިއްޔަތުން ނިންމާފައިވަނީ ރާއްޖޭގައި އޮންނަން ޖެހޭނީ ރިޔާސީ ނިޒާމެއް ކަމަށެވެ. އެހެން ނަމަވެސް، އޭގެ ފަހުން ވެސް ދޭތެރެ ދޭތެރެއިން ރާއްޖޭގައި އޮންނަން ފެންނަ ވެރިކަމުގެ ނިޒާމާ ގުޅޭގޮތުން ބަހުސް ކުރެވެމުން ދެއެވެ.
