އަޅުގަނޑު ތަންފީޒުކުރަމުން މިދަނީ ގުޅިފައިވާ ޕާޓީތަކުގެ މެނިފެސްޓޯ، އޭގައި ނިޒާމުގެ ވާހަކައެއް ނެތް - ރައީސް
29 ޑިސެމްބަރު 2022 | ބުރާސްފަތި 07:39ކޯލިޝަން މެނިފެސްޓޯގައި އެއްވެސް ގޮތަކަށް ނިޒާމީ ވޯޓެއް މި 5 އަހަރު ތެރޭގައި ނަގާނެ ވާހަކައެއް ނޯންނާނެ
ސަރުކާރު ކޯލިޝަންގައި ހިމެނޭ ލީޑަރުން
5 އަހަރުގެ މި ދަރުގައި ތަންފީޒުކުރައްވަމުން ގެންދަވަނީ ގުޅިފައިވާ ސިޔާސީ ޕާޓީތަކާއެކު އެކުލަވާލެވުނު މެނިފެސްޓޯ ކަމަށާއި، އެ މެނިފެސްޓޯގައި ނިޒާމު ބަދަލުކުރުމުގެ ވާހަކައެއް ނެތް ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހު ވިދާޅުވެއްޖެއެވެ.
ދުވަސްތަކަކަށްފަހު ނޫސްވެރިންނާއެކު ބޭއްވެވި ބައްދަލުކުރެއްވުމުގައި، ރާއްޖެ އެމްވީ އިން ދެންނެވި ސުވާލަކަށް ޖަވާބުދެއްވަމުން ރައީސް ޞާލިހު ވިދާޅުވީ އެމަނިކުފާނު ކެންޑިޑޭޓަކަށް ވެވަޑައިގެންނުވުމާއެކީގައި، ރައްޔިތުންނާއި ހިސާބަށް ދިއުމުގެ ކުރިން މެނިފެސްޓޯއެއް އެކުލަވާލެއްވި ކަމަށެވެ. އަދި އެ މެނިފެސްޓޯ އެކުލަވާލެއްވީ ކޯލިޝަންގައި ހިމެނޭ ހުރިހާ ޕާޓީތަކެއްގެ މަޝްވަރާއެކީގައި ކަމަށް ރައީސް ވިދާޅުވިއެވެ.
އެމަނިކުފާނު ވިދާޅުވީ އެ މެނިފެސްޓޯގައި އެއްވެސް ގޮތަކަށް ނިޒާމީ ވޯޓެއް މި 5 އަހަރު ތެރޭގައި ނަގާނެ ވާހަކައެއް ނޯންނާނެ ކަމަށެވެ.
ނިޒާމީ ވޯޓުގެ މައްސަލައިގައި ރައީސް ނަޝީދާއި ރައީސް ޞާލިހުގެ ގުޅުން ވަނީ ހީނަރުވެފައެވެ. ރައީސް ނަޝީދު ވިދާޅުވެފައިވަނީ އެންމެ މުހިންމު އިގްތިސާދީ ހަތިޔާރަކީ އިތުބާރު ކަމަށާއި އިތުބާރު ގެއްލިއްޖެއްނަމަ އިގްތިސާދީ ކަންކަން ކައްސާލައިގެން ދިއުމަކީ ވަރަށް ފަސޭހައިން ވާކަމެއް ކަމަށެވެ. އެހެންވެ، ވެރިކަމުގެ ނިޒާމާ ގުޅޭ ވޯޓެއް ނުނަގަން ވިދާޅުވެއްޖެނަމަ އެ މީހެއްގެ އިތުބާރު ގެއްލުނީ ކަމަށެވެ.
ރާއްޖޭގެ ވެރިކަން ކުރުމުގެ ނިޒާމު, ބަރުލަމާނީ ނިޒާމަކަށް ބަދަލު ކުރުމަށް ގާނޫނު އިސްލާހު ކުރުމާ ގުޅޭގޮތުން ރައީސް ނަޝީދު ވަނީ އެމްޑީޕީގެ ހަތަރުވަނަ ކޮންގްރެސްއަށް ހުށަހަޅުއްވާފައެވެ. އެކަމާ ރައީސުލްޖުމްހޫރިއްޔާ އިބްރާހިމް މުޙައްމަދު ސާލިހު އަދި ރާއްޖޭގެ ސިޔާސީ އެހެން ބައެއް އިސް ފަރާތްތަކުން ވެސް ދެކޮޅު ކަމަށް ވިދާޅުވެފައިވާއިރު ރައީސް ނަޝީދު ވިދާޅުވީ ނިޒާމީ ވާހަކަތަކުގެ ތެރެއަށް ރައީސުލްޖުމްހޫރިއްޔާ ވަދެވަޑައިގަންނަވަން ޖެހިވަޑައިނުގަންނަވާ ކަމަށެވެ. އަދި އެއީ ރައީސުލްޖުމްހޫރިއްޔާއާ ބެހޭ ވާހަކައެއް ނޫން ކަމަށް ވެސް ވިދާޅުވިއެވެ.
ރާއްޖެއަށް ބަރުލަމާނީ ނިޒާމް ގެންނަން ރައީސުލްޖުމްހޫރިއްޔާ އިބްރާހިމް މުހައްމަދު ސާލިހު ތާއީދު ނުކުރައްވާ ކަމަށް އެމަނިކުފާނު މީގެ ކުރިން ވަނީ ވިދާޅުވެފައެވެ. ރައީސް ވިދާޅުވީ އެމަނިކުފާނަށް ޕާސަނަލީ ގަބޫލުކުރެއްވެނީ މިހާރު މި އޮތްގޮތް (ރިޔާސީ ނިޒާމް)، އެއީ ރައްޔިތުންގެ ސީދާ ވޯޓަކުން، ރައްޔިތުންގެ ފުރިހަމަ އަގުބަލިއްޔަތަކުން ހޮވޭ ރައީސަކާއެކު އެކުލެވޭ ސަރުކާރަކަށް ހިންގުމުގެ ބާރު އޮތުން ކަމަށެވެ. ދެވަނަ ކަމަކަށް ރައްޔިތުން އިންތިހާބުކުރާ މަންދޫބުންގެ މައްޗަށް އެކުލެވޭ ރައްޔިތުންގެ މަޖިލީހަކުން ގާނޫނު ހެދުމުގެ ބާރު އޮތުން ކަމަށެވެ. އަދި މިނިވަންކަމާއެކީގައި ޝަރީއަތްކުރެވޭ ގޮތަށް ޖުޑިޝަރީ އޮތުމާއި، ތިންބާރު ވަކިކުރެވިފައި އޮތް މިފަދަ ނިޒާމެއް އެއީ އެމަނިކުފާނު ގަބޫލުކުރައްވާ ނިޒާމް ކަމަށެވެ.
