ފުރަތަމަ ހަފުތާގައި 26،500ށް ވުރެ ގިނަ ކޭސް ބިސް ކްލިއަރކޮށްފި

ރޯދަމަހުގެ ފުރަތަމަ ހަފުތާގައި އެމްޕީއެލުން 26،500ށް ވުރެ ގިނަ ކޭސް ބިސް ކްލިއަރކޮށްފިއެވެ.

މޯލްޑިވްސް ޕޯޓްސް ލިމިޓެޑުން އާންމުކޮށްފައިވާ ތަފާސްހިސާބުތައް ދައްކާގޮތުން އެ ކުންފުނިން ވަނީ ރޯދަމަހުގެ ފުރަތަމަ ހަފުތާގެ ތެރޭގައި 727 ކޮންޓެއިނަރުގެ މުދާ ކްލިއަރ ކޮށްފައެވެ. އެއީ 20 ފޫޓުގެ 367 ކޮންޓެއިނަރާއި 40 ފޫޓުގެ 360 ކޮންޓެއިނަރެވެ.

އޭޕްރިލް 13ން 17ށް އެމްޕީއެލުން ކްލިއަރކޮށްފައި ވަނީ ކެއިންބުއިމަށް ބޭނުންކުރާ ތަފާތު ބާވަތްތަކެވެ. އޭގެތެރޭގައި ރޯދަމަހު ގޭބީސީތަކުން އެންމެ ބޮޑަށް ޑިމާންޑުކުރާ ތަރުކާރީ އާއި މޭވާގެ ބާވާތްތައް ހިމެނެއެވެ. އެގޮތުން 26،520 ކޭސް ބިހާއި 18،786 ބަސްތާ ފިޔާ، 5،207 ބަސްތާ ކަރާ އަދި 2،600 ކޭސް އިނގުރުގެ އިތުރުން 2،125 ކޭސް އަލަނާސި އާއި 1،757 ބަސްތާ ކެބެޖު ކްލިއަރ ކޮށްފައިވެއެވެ. މީގެ އިތުރުން، އަލުވި، ޓޮމާޓޯ، ލުނބޯ، ބަރަބޯ އަދި ދޮންކެޔޮ ފަދަ މޭވާ އާއި ތަރުކާރީ ވެސް ކްލިއަރކޮށްފައިވެއެވެ.

ކޮވިޑް-19ގެ ސަބަބުން ރާއްޖެއަށް އެތެރެކުރާ މުދަލަށް ބަދަލުތަކެއް އައި ނަމަވެސް މިހާރު ރާއްޖެ އެތެރެކުރާ މުދަލުގެ އަދަދު އިތުރުވަމުން އަންނަ ކަމަށް އެމްޕީއެލުން ފާހަގަކުރެއެވެ. ރޯދަމަހަކީ އާންމުކޮށްވެސް ރާއްޖެއަށް އެތެރެކުރާ ކާބޯތަކެތީގެ އަދަދު އިތުރުވާ މަހަކަށްވާއިރު، މިތަކެތި ހަލާކުވިޔަ ނުދީ އަވަހަށް ކްލިއަރކުރުމުގެ ގިނަ އިންތިޒާމުތަކެއް އެމްޕީއެލުން ވަނީ ހަމަޖައްސާފައެވެ.

އެކުންފުނީގެ ޗީފް އެގްޒެކެޓިވް އޮފިސަރ ޝާހިދު އަލީ ވިދާޅުވީ އެހެން އަހަރުތަކާއި ޚިލާފަށް މިއަހަރު ގިނަ އަދަދަކަށް މުދާ އެތެރެކުރާކަން ފާހަގަވެފައިވާ ކަމަށާއި ރަމަޟާން މަހުގެ ކުރީ ކޮޅު ގިނަ އަދަދަކަށް މުދާ އަންނާނެކަމަށް ލަފާ ކުރެވޭ ކަމަށެވެ. އެހެންކަމުން ލަސްތަކެއް ނުވެ ވިޔަފާރި ބަނދަރުން މުދާ ބޭރު ކުރުމުގެ ގޮތުން ދުރާލާ ތައްޔާރުވާން ފަށާފައިވާ ކަމަށްވެސް ވިދާޅުވިއެވެ.

އެމްޕީއެލުން ވަނީ ރަމަޟާން މަހަށް ތައްޔާރުވުމުގެ ގޮތުން މުދާ ކްލިއަރ ކުރުމަށް އިތުރު މުވައްޒަފުންތަކެއް ނަގާފައެވެ. ކާބޯތަކެތި ހިފައިގެން އަންނަ ކާގޯ ބޯޓުތަކުން ބަންދު ދުވަސްކަމުގައިވީ ނަމަވެސް މުދާ ހުސްކުރުމުގެ މަސައްކަތް އެހެން މަސްތަކެކޭ އެއްފަދައިން ކުރަމުން ގެންދާނެ ކަމުގެ ޔަގީންކަން އެމްޕީއެލުން ވަނީ ދީފައެވެ.