ރަމަޟާންމަހު ޕޯޓުތެރޭގައި މަސައްކަތް އިންތިޒާމްކުރެވިފައިވާ ގޮތް ނައިބުރައީސް ބައްލަވާލައްވައިފި
18 އެޕްރީލު 2021 | އާދީއްތަ 17:19އެހެން އަހަރުތަކާއި ޚިލާފަށް މިއަހަރުގެ މިހާހިސާބަށްވެސް ގިނަ އަދަދަކަށް މުދާ އެތެރެކުރާކަން އެމްޕީއެލުން ފާހަގަކުރޭ
މާލެ ވިޔަފާރިވެރިންގެ ބަނދަރަށް ނައިބުރައީސް ކުރެއްވި ޒިޔާރަތުގެ ތެރެއިން
ރަމަޟާންމަހު ޕޯޓުތެރޭގައި މަސައްކަތް އިންތިޒާމްކުރެވިފައިވާ ގޮތް ރައީސުލްޖުމްހޫރިއްޔާގެ ނައިބު ފައިސަލް ނަސީމް ބައްލަވާލައްވައިފިއެވެ.
ރައީސުލްޖުމްހޫރިއްޔާގެ ނައިބު ފައިސަލް ނަސީމް މާލެ ވިޔަފާރިވެރިންގެ ބަނދަރަށް ކުރެއްވި ޒިޔާރަތުގައި ޕޯޓުތެރޭގައި މަސައްކަތް އިންތިޒާމްކުރެވިފައިވާ ގޮތުގެ ތަފުސީލު އެމްޕީއެލްގެ ސީއީއޯ ޝާހިދު އަލީ ވަނީ އަރުވާފައެވެ. ރަމަޟާންމަހާ ދިމާކޮށް މޯލްޑިވްސް ޕޯޓްސް ލިމިޓެޑްގެ އޮޕަރޭޝަންތަކަށް ބަދަލުތަކެއް ވަނީ ގެނެސްފައެވެ. ބަދަލުތައް ގެނަޔަސް، ރަމަޟާންމަހު ވިޔަފާރި ބަނދަރުން މުދާ ބޭރުކުރުމުގައި ދައްޗެއް ކުރިމަތިނުވާނެކަމަށް ޝާހިދު އަލީ ވިދާޅުވިއެވެ.
އެމްޕީއެލްގެ ސީއީއޯ މީގެ ކުރިން ވަނީ އެހެން އަހަރުތަކާއި ޚިލާފަށް މިއަހަރުގެ މިހާ ހިސާބަށްވެސް ގިނަ އަދަދަކަށް މުދާ އެތެރެކުރާކަން ފާހަގަވެފައިވާކަމަށް ވިދާޅުވެފައެވެ. ޝާހިދު ވިދާޅުވީ ރަމަޟާންމަހަށް ތައްޔާރުވުމުގެ ގޮތުން އެ ކުންފުންޏައް އިތުރު މުވައްޒަފުން ނަގާފައިވާ ކަމަށާއި، ޚާއްސަކޮށް މުދާ ކްލިއަރކުރުމަށް އިތުރު މުވައްޒަފުންތަކެއް ނަގާފައިވާ ކަމަށެވެ. މީގެ އިތުރުން ކާބޯތަކެތި ހިފައިގެން އަންނަ ކާގޯ ބޯޓުތަކުން ބަންދު ދުވަސްކަމުގައިވީ ނަމަވެސް މުދާ ހުސްކުރުމުގެ މަސައްކަތް އެހެން މަސްތަކެކޭ އެއްފަދައިން ކުރަމުން ގެންދާނެކަމަށް ޝާހިދު ވަނީ ވިދާޅުވެފައެވެ. އެމްޕީއެލްގެ ޚިދުމަތްތައް އެހެން މަސްތަކެކޭ އެއްފަދައިން ދިނުމުގެގޮތުން ރަމަޟާންމަހުވެސް އެމްޕީއެލްގެ މުވައްޒަފުން ބޯޓުތައް އައުމާއިއެކު ހަރަކާތްތެރިވާނެ ކަމަށާއި، ވިޔަފާރި ބަނދަރަށް ބާރުބޮޑުވާނަމަ ދަންވަރު ޑިއުޓީއަށްވެސް މުވައްޒަފުން ނެރުމަށް ނިންމާފައިވާކަމަށް ޝާހިދު ވިދާޅުވިއެވެ.
ރޯދަމަހު އެމްޕީއެލުގެ މަސައްކަތުގެ ރަސްމީ ގަޑިތައް ކަނޑައަޅާފައިވަނީ ހެނދުނު 9:00ން ހަވީރު 4:00ށް ރޭގަނޑު 9:00ން 10:30 އަށެވެ. ނަމަވެސް އަވަހަށް ހަލާކުވާ ޒާތުގެ މުދާ ކްލިއާ ކުރަން ޖެހިއްޖެ ހާލަތެއްގައި ބަންދު ދުވަސްތަކުގައިވެސް އޮޕަރޭޝަން ކުރިއަށް ގެންދާނެކަމަށް ޝާހިދު ވިދާޅުވިއެވެ. މީގެ އިތުރުން އެމްޕީއެލުން ވަނީ މުދާ އަވަހަށް ކްލިއާކުރުމަށް ހުޅުމާލެ ޕޯޓަށް މުދާ ގެންދިއުމުގައިވެސް ވިޔަފާރިވެރިންނަށް ލުއިތަކެއް ދީފައެވެ. އެގޮތުން ހުޅުމާލެއަށް މުދާ ގެންދާއަގު ކުޑަ ކޮށްފައިވާކަމަށް އެމްޕީއެލުން ބުނެއެވެ.
