ވަހީދުގެ ފުރާނަ ނުރައްކަލަށް ހުށަހެޅުމުގެ ނިޔަތުގައި އަންނަނީ މަސައްކަތްކުރަމުން، މައްސަލަ ތަހުގީގުކުރަން ގޮވާލަން: އެމްޑީޕީ

ރައްޔިތުންގެ މަޖިލީހުގެ އުނގޫފާރު ދާއިރާގެ މެމްބަރ މުޙައްމަދު ވަޙީދު، ކެމްޕޭން ތަޤްރީރެއްގައި ދެއްކެވި ވާހަކަފުޅަކާ ގުޅުވައިގެން އޭނާގެ ފުރާނަ ނުރައްކަލަށް ހުށަހެޅުމުގެ ނިޔަތުގައި ބައެއް ފަރާތްތަކުން ހިންގަމުންދާ ޢަމަލުތައް އެންމެ ހަރުއަޑުން ކުށްވެރިކުރާކަމަށާއި އެ މައްސަލަ ތަޙްޤީޤްކޮށް ފިޔަވަޅުއެޅުމަށް ކަމާބެހޭ މުއައްސަސާތަކަށް އެމް.ޑީ.ޕީ. ޕާރލަމެންޓްރީ ގްރޫޕުން ގޮވާލައިފިއެވެ.

މުހައްމަދު ވަހީދު ރަށްވެހި ފަތިސް ކެމްޕެއިން ތެރޭގައި ދައްކަވާފައިވާ ވާހަކައެއްގެ 24 ސިކުންތު ހިމެނޭ ވީޑިއޯއެއް ސޯޝަލް މީޑިޔާގައި އަންނަނީ ދައުރުކުރަމުންނެވެ. މަރަށްމަރު ހިފުމަކީ ވަރަށް "ސިކު" ބައެއް ކުރާނެ ކަމެއްކަމަށް ވަހީދު ވިދާޅުވާކަމަށް ބުނެ މިވީޑިއޯ ސޯޝަލް މީޑިޔާގައި ދައުރުކުރަމުން އަންނައިރު ވަހީދުގެ ފޮޓޯ ޖަހައިގެން އެކި ކަހަލަ ޕޯސްޓްތައް ހަދައިގެން އަންނަނީ ސޯޝަލް މީޑިޔާގައި ދައުރުކުރަމުންނެވެ.

ވައިރަލް ވަމުންދާ މިވީޑިއޯގައި ވަހީދު ވިދާޅުވަނީ "އަޅުގަނޑުމެންގެ މުޅި މިނިވަންކަން ނަގާލަމުން މީހުން މަރަންވެގެން ގިސާސް ހިފާނަމޭ ކިޔައިގެން ކެބިނެޓަށް މިއޮށް ގަރުނުގައި ކެބިނެޓަށް އިންޖެކްޝަން ޖަހާލީމާ މަރުވާންދާއިރު ހަށިގަނޑު ވާންވާގޮތް ޕްރެޒެންޓޭޝަން ހަދައިގެން ހުށަހެޅި ބައެއް. ސިކު ބައެއްގެ ވާހަކަ މިދައްކަނީ. މިތަނުންދަނީ އޭކޭފޯޓީސެވަން އަޅުވައިގެން، ބަޑި ހިފައިގެން." މިހެންނެވެ.

މިކަމާއި ގުޅިގެން އެމްޑީޕީގެ ޕާލަމަންޓްރީ ގްރޫޕުން ނެރެފައިވާ ބަޔާނެއްގައި ބުނެފައިވަނީ އުނގޫފާރު ދާއިރާގެ މެމްބަރ މުޙައްމަދު ވަޙީދު އެ ތަޤްރީރުގައި ފާހަގަކުރެއްވި ނުކުތާ އަމާޒުކުރައްވާފައިވަނީ ދީނަށް ނުވަތަ ދީނީ ޙުކުމަކަށް ނޫންކަމާއި، އެއާޚިލާފަށް އޭނާގެ ވާހަކަ އަމާޒު ކުރައްވާފައިވަނީ މަރުގެ އަދަބު ދިނުމުގެ ނަމުގައި ކުރީގެ ސަރުކާރުގައި ތިބި ބަޔަކު ކަންކުރި ގޮތަކަށް ކަމަށްވާއިރު، އެވާހަކަ ގަސްދުގައި އޮޅުވާލައިގެން ބައެއް ދީނީ ޢިލްމުވެރިންނާއި، ބައެއް ސިޔާސީ މީހުންނާއި އަދި ބައެއް މީޑިއާތަކުން އެކަން ފިތުނައަކަށް ވާގޮތަށް ހެދުމުގެ ސަބަބުން، އޭނާގެ ފުރާނައަށް ނުރައްކާކުރުވުމަށް ބައެއް ފަރާތްތަކުން ގޮވާލަމުންދާކަން ކަންބޮޑުވުމާއެކު ފާހަގަކުރާކަމަށެވެ.

އުނގޫފާރު ދާއިރާގެ މެމްބަރ މުޙައްމަދު ވަޙީދު ދެއްކެވި ވާހަކައެއްގެ ޙަޤީޤަތް ގަސްދުގައި އޮޅުވާލައި ފިތުނަ އުފައްދައިގެން އޭނާގެ ފުރާނަ ނުރައްކަލަށް ހުށަހެޅުމުގެ ނިޔަތުގައި ޢަމަލުކުރާ ފަރާތްތަކުން އެކަން ވަގުތުން ހުއްޓާލުމަށް އެމް.ޑީ.ޕީ. ޕާރލަމެންޓްރީ ގްރޫޕުން ގޮވާލާކަމަށް މިބަޔާނުގައި ބުނެފައިވެއެވެ. އަދި މިކަމުގައި ހުރި ނުރައްކާ ބޮޑުކަމަށްޓަކައި މިފަދަ މައްސަލަތައް ވަގުތުން ތަޙްޤީޤްކޮށް ފިޔަވަޅުއެޅުމަށް ދައުލަތުގެ ކަމާބެހޭ މުއައްސަސާތަކަށް ގޮވާލާކަމަށް ބަޔާނުގައި ބުނެފައިވެއެވެ.