އެމްޑީޕީ ސަޕޯޓަރުންތަކެއް "ﷲ އަކްބަރު" ގޮވަމުން ފިޔާތޮށި ކުލަ ލާފައި ހުރި ރުކެއް ކަނޑާލި މައްސަލަ އެ ޕާޓީން ކުށްވެރިކޮށްފިއެވެ.
އެކަމާއި ގުޅިގެން އެމްޑީޕީން ކުރި ޓުވީޓެއްގައި ބުނެފައިވަނީ އެފަދަ އަމަލުތައް ހިންގުމަކީ އެ ޕާޓީން އެއްގޮތަކަށް ވެސް ހިތްވަރުދޭނެ ކަމެއް ނޫން ކަމަށެވެ. "އެމްޑީޕީގެ އެއްވެސް މެންބަރަކު އަދި މި ޕާޓީއަށް ތާއީދުކުރާ އެއްވެސް ފަރާތަކުން ވެސް މިފަދަ އަމަލުތައް ނުހިންގުމަށް އިލްތިމާސްކުރަން،" އެމްޑީޕީން ކުރި ޓްވީޓްގައި ބުނެފައިވެއެވެ.
އެމްޑީޕީ ސަޕޯޓަރުންތަކެއް ފިޔާތޮށި ކުލަ ލާފައިވާ ރުކެއް ކަނޑާލާ ވީޑިއޯ އެއް ސޯޝަލް މީޑިޔާގައި އަންނަނީ ވަރަށް ބޮޑަށް ވައިރަލްވަމުންނެވެ. މި ވީޑިއޯ ގިނަ ބަޔަކު ޝެއަރކުރަމުން އަންނައިރު މިކަމަށް ނުރުހުން ފާޅުކޮށް ގިނަ ބަޔަކު އަންނަނީ ޝުއޫރު ފާޅުކުރަމުންނެވެ.
ކަރަންޓު ކީހަކުން ރުއް ކަނޑާލަމުންދާއިރު އެމްޑީޕީގެ ގިނަ ސަޕޯޓަރުންތަކެއް އެމަންޒަރު ބަލަންތިބޭ މަންޒަރު ވީޑިއޯއިން ފެނެއެވެ. އަދި ރުއް ކަނޑާލަމުންދިޔަ ވަގުތު ބައެއް ސަޕޯޓަރުން "ﷲ އަކުބަރު" ގޮވަމުންދާ އަޑު އިވެއެވެ.
