ކޮވިޑް-19 ޖެހިގެން އިތުރު މީހަކު ނިޔާވެ، ޖުމުލަ 68ށް އަރައިފި
ނިޔާވެފައިވަނީ އުމުރުން 82 އަހަރުގެ ދިވެހި އަންހެނެއް
ދަރުމަވަންތަ ހޮސްޕިޓަލް
ކޮވިޑް-19ށް ފަރުވާ ހޯދަމުން ދިޔަ އިތުރު ދިވެއްސަކު ނިޔާވެއްޖެއެވެ.
ހެލްތް އިމަރޖެންސީ އޮޕަރޭޝަން ސެންޓަރު (އެޗްއީއޯސީ) އިން ބުނީ ނިޔާވެފައިވަނީ ދަރުމަވަންތަ ހޮސްޕިޓަލުގެ ޑީއެޗް-11ގައި ފަރުވާ ދެމުންދިޔަ އުމުރުން 82 އަހަރުގެ ދިވެހި އަންހެނެއް ކަމަށެވެ.
ރާއްޖެއިން މިހާތަނަށް ކޮވިޑް ޖެހިގެން ނިޔާވެފައިވެފައިވާ މީހުންގެ އަދަދު މި ވަނީ 68 ށް އަރާފައެވެ. ޖުމްލަ 58 މީހަކަށް މިވަގުތު ހޮސްޕިޓަލުގައި ފަރުވާ ދެމުންދާއިރު މުޅި ރާއްޖެއިން މިހާތަނަށް 25،939 މީހަކަށް މި ވައިރަސް ޖެހިފައިވެއެވެ. މީގެ ތެރެއިން 23،242 މީހުން ވަނީ ބަލިން ފަސޭހަވެފައެވެ.
ރާއްޖެއިން މިހާރު ފެންނަ ކޮވިޑްގެ ކޭސްތައް މަދުވެ، ލުއިތައް ދިން ނަމަވެސް ރައްކާތެރިކަމުގެ ގޮތުން އަޅަންޖެހޭ އެންމެހާ ފިޔަވަޅުތައް އެޅުމަށް ކަމާ ގުޅޭ މާހިރުން އަންނަނީ ތަކުރާރުކޮށް އިރުޝާދު ދެމުންނެވެ. މީގެ ކުރިން ކޮވިޑް-19ގެ ކޭސްތައް އިތުރުވިއިރު އުމުރުން ދުވަސްވީ މީހުން މިބަލީގައި ނިޔާވި މިންވަރު ވަނީ އިތުރުވެގެން ގޮސްފައެވެ. އަދި ކޮވިޑްގެ ތިންވަނަ ރާޅު ރާއްޖެއަށް ބިންދާލިއިރު، ރައްޔިތުން ކޮވިޑް ނަގަނީ އާދައިގެ ބައްޔެއްގެ ގޮތުގައި ކަމަށް ހެލްތު އެމަރޖެންސީ އޮޕަރޭޝަން ސެންޓަރުގެ ޓެކްނިކަލް އެޑްވައިޒަރީ ގްރޫޕް (ޓެގް)ގެ މެމްބަރު ޑރ. އަޙްމަދު ޝަހީދު ވަނީ ވިދާޅުވެފައެވެ.
