ފަންނުވެރިންގެ ހައްގުތައް ކަށަވަރުކުރުމަށް ގާނޫނެއް އެކުލަވާލަމުންދަނީ - ޔުމްނާ
ދިވެހި ކުރެހުންތެރީންނަށް އެކިއެކި އެކްސްޗޭންޖް ޕްރޮގްރާމްތައް މެދުވެރިކޮށް ރާއްޖެއިން ބޭރުން ތަމްރީނާއި ތަޖުރިބާ ހޯދުމުގެ ފުރުޞަތު ފަހިކުރުން
ޔުމްނާ މައުމޫން
ފަންނުވެރިންނަށް އެމީހުންގެ ހައްގުތައް ކަށަވަރުކޮށްދިނުމަށް ގާނޫނެއް ހެދުމުގެ މަސައްކަތް ކުރައްވަމުން އަންނަ ކަމަށް މިނިސްޓަރ އޮފް އާޓްސް، ކަލްޗަރ އެންޑް ހެރިޓޭޖް, ޔުމްނާ މައުމޫނު ވިދާޅުވެއްޖެއެވެ.
ދުނިޔޭގެ ކުރެހުމުގެ ދުވަހުގެ މުނާސަބަތުގައި ދެއްވި ޚާއްސަ މެސެޖުގައި މިނިސްޓަރ ވިދާޅުވީ، ކުރެހުންތެރިންނާއި އެހެނިހެން ފަންނާނުންނަށް ލިބުން މުހިންމު އެކިއެކި ޙައްޤުތަކާއި، ލިބުން ޙައްޤު އިހުތިރާމާއި ޙައިސިއްޔަތު ހޯދައިދިނުމަށް ފަންނުވެރިންގެ ހައްގުތަކުގެ ގާނޫނެއް އެކުލަވައިލުމުގެ މަސައްކަތް މިހާރު ކުރަމުން އަންނަ ކަމަށެވެ.
އަދި ކުރެހުމާއި، އެއާއި ގުޅުންހުރިދާއިރާތައް ތަރައްގީކުރުމަށް އަދުގެ ސަރުކާރުން ދަނީ ގިނަގުނަ މަސައްކަތްތަކެއް ކުރަމުން ކަމަށެވެ. އެގޮތުން ނޭޝަނަލް އާޓް ގެލެރީ ރަނގަޅު ފެންވަރަކަށް ތަރައްގީކުރުމުގެ މަސައްކަތް މިހާރު ކުރަމުން އަންނަ ކަމަށާއި، އަދި ދިވެހި ކުރެހުންތެރީންނަށް އެކިއެކި އެކްސްޗޭންޖް ޕްރޮގްރާމްތައް މެދުވެރިކޮށް ރާއްޖެއިން ބޭރުން ތަމްރީނާއި ތަޖުރިބާ ހޯދުމުގެ ފުރުޞަތު ފަހިކުރުމަށް މަސައްކަތް ކުރައްވާ ކަމަށް ވިދާޅުވެފައިވެއެވެ. ރާއްޖޭގެ އެކި ހިސާބުތަކުގައި ފަންނުވެރިކަން ކުރިއެރުވުމަށް މަރުކަޒުތަކެއް ޤާއިމުކުރުމުގެ މަސައްކަތް ރޭވިފައިވާކަމަށާއި، އެ މަރުކަޒުތައް މެދުވެރިކޮށް، ރާއްޖޭގެ އެކި ހިސާބުތަކުގައި ހުނަރުވެރި ކުރެހުންތެރިން ބިނާކުރުމުގެ މަސައްކަތް ކުރެވޭނެ ކަމަށް ވިދާޅުވެފައިވެއެވެ. ގާނޫނީ ދާއިރާގެ ތެރެއިން ކުރެވޭ މިފަދަ މަސައްކަތްތަކުން ކުރެހުންތެރިންނަށާއި އެހެނިހެން ފަންނާނުންނަށް އިތުރު ފުރުޞަތުތައް ލިބި، އާމްދަނީ ހޯދުމުގައްޔާއި، ފިކުރީ މުދާރައްކާތެރިކުރުމުގައި ލުއިތަކެއް ލިބިގެންދާނެކަން ވަނީ ފާހަގަކުރައްވާފައެވެ. އަދި ރާއްޖެއަކީ ކުރެހުންތެރިން ނިސްބަތުން ގިނަ ގައުމެއްކަން މިނިސްޓަރ ފާހަގަކުރެއްވިއެވެ.
އޭޕްރީލް މަހުގެ 15 ވަނަ ދުވަހަކީ ބައިނަލްއަގުވާމީގޮތުން ފާހަގަކުރާ ކުރެހުމުގެ ދުވަހެވެ. ދުނިޔޭގެ ކުރެހުމުގެ ދުވަހުގެ ގޮތުގައި އޭޕްރިލް މަހުގެ 15 ވަނަ ދުވަސް ކަނޑައެޅުނީ 2019 ވަނަ އަހަރު ބޭއްވުނު ޔުނެސްކޯގެ އާންމުޖަލްސާގައެވެ. މި ދުވަސް ފާހަގަކުރުމުގެ ބޭނުމަކީ މުޖުތަމަޢުއާއި ކުރެހުމާ ހުރި ގުޅުން ފާހަގަކޮށް، ކުރެހުން މެދުވެރިކޮށް ފާޅުކުރެވޭ ހިޔާލުތަކުގެ ސިންދަފާތުކަން ބަލައިގަނެ، ދެމެހެއްޓެނިވި ތަރައްޤީގައި ކުރެހުންތެރިން އަދާކުރާ މުހިންމު ރޯލު ފާހަގަކުރުމެވެ. އަދި ހަމަ މިއާއެކު މިދުވަސް ފާހަގަކުރުމުގެ އެންމެ މުހިންމު އެއް ބޭނުމަކީ ބޮޑުވަމުން އަންނަ ކުދީންގެ ތަފާތުތައް ދެނެގަނެ، އެކުދިންގެ ޝުޢޫރުތައް ފާޅުކުރުމަށް ބޭނުންކުރާ ވަސީލަތެއްގެ ގޮތުގައި ކުރެހުން ބޭނުންކުރުމަށް ސްކޫލް ދައުރުން ފެށިގެން އެ ކުދީންނަށް އެހީވުމުގެ މުހިއްމުކަން ފާހަގަކުރުމެވެ. މިދުވަސް ދުނިޔޭގެ ފެންވަރުގައި ފާހަގަކުރާ މިއީ ދެވަނަ އަހަރެވެ.
ކޯވިޑް19ގެ ޢާލަމީވަބާއާއެކު ކުރެހުންތެރީންނަށް ވަނީ އެތައް ގޮންޖެހުންތަކެއް ކުރިމަތިވެފައެވެ. އެހެންނަމަވެސް، ބަލައިލި ކޮންމެ ދިމާލަކުންމެ ފެންނަނީ ކުރެހުންތެރިން އިތުރު ހިތްވަރަކާއެކު މަސައްކަތް ފަށައިގަންނަ ތަނެވެ. މި ޢާލަމީ ވަބާގެ ބިރުވެރިކަމުގެ ތެރޭގައި ކުރެހުންތެރީންގެ ހިތްގައިމުކުރެހުންތައް ވެގެންދިޔައީ ހިތްތަކަށް ހަމަޖެހުން ގެނެސްދިން ފަރުވާއަކަށެވެ.
