ހުކުރު މިސްކިތް އާބާތުރަ ފިލުވުމުގެ މަސައްކަތް މިނިސްޓަރ ޔުމްނާ އަދި ސަފީރު މަހާވަރު ބައްލަވާލައްވައިފި
މިސްކިތާއި، މިސްކިތުގެ ވަށައިގެންވާ ސަރަހައްދު އާބާތުރަ ފިލުވުމުގެ މަސައްކަތް ކުރިއަށްދޭ
ހުކުރު މިސްކިތުގެ އާބާތުރަ ފިލުވުން
ހުކުރު މިސްކިތާއި މިސްކިތުގެ އާބާތުރަ ފިލުވުމަށް ކުރިއަށްދާ މަސައްކަތްތައް ހެރިޓޭޖް މިނިސްޓަރ އަދި އިންޑިއާއިން ރާއްޖެއަށް ކަނޑަޅުއްވާފައިވާ ސަފީރު ބައްލަވާލައްވައިފިއެވެ.
ހުކުރު މިސްކިތުގެ އާބާތުރަ ފިލުވައި މަރާމާތުކުރުމުގެ މަސައްކަތަކީ އިންޑިއާ ސަރުކާރުގެ ފަންނީ އަދި މާލީ އެހީއާއެކު ކުރިއަށްގެންދާ މަސައްކަތެކެވެ. މިގޮތުން ހުކުރު މިސްކިތާއި، މިސްކިތުގެ ވަށައިގެންވާ ސަރަހައްދު އާބާތުރަ ފިލުވުމުގެ މަސައްކަތް ކުރިއަށް އެބަދެއެވެ.
މި މަސައްކަތްތައް ކުރިއަށްދާގޮތް ހެރިޓޭޖް މިނިސްޓަރ ޔުމްނާ މައުމޫނާއި، އިންޑިއާއިން ރާއްޖެއަށް ކަނޑައަޅުއްވާފައި ހުންނަވާ ސަފީރު މުނޫ މަހާވަރު ވަނީ ބައްލަވާލައްވާފައެވެ. މިގޮތުން މިސްކިތުގެ އެތެރޭގެ އާބާތުރަ ފިލުވުމަށް ކުރެވޭ މަސައްކަތްތަކާއި، މިސްކިތުގެ ވަށައިގެންވާ ސަރަހައްުގައި ކުރެވޭ މަސައްކަތްތައް ބައްލަވާލައްވާފައިވެއެވެ.
މި މަސައްކަތްތައް ބައްލަވާލައްވައި ރާއްޖެއެމްވީއަށް ދެއްވި ޚާއްސަ އިންޓަރވިއުއެއްގައި މިނިސްޓަރ ޔުމްނާ ވިދާޅުވީ މި މަޝްރޫއަކީ އިންޑިއާ ސަރުކާރާ ގުޅިގެން ކުރިއަށްގެންދެވޭ ވަރަށް މުހިންމު މަސައްކަތެއް ކަމަށެވެ. މީގެ ތެރެއިން ވަރަށް ގިނަ މަސައްކަތްތައް މިހާރު ނިމިފައިވާކަމަށާއި އޭގެ ތެރޭގައި ހިރިގާ ސާފުކުރުމާއި، ލަކުޑިން ހަދާފައި ހުރި ބައިތައް ރައްކާތެރިކޮށް ގިނަ ދުވަހު ދެމެހެއްޓޭނެ ގޮތަށް މަސައްކަތް ފަށާފައިވާކަމަށް މިނިސްޓަރ ވިދާޅުވިއެވެ.
މިނިސްޓަރ ވިދާޅުވި އެ ސަރަހައްދުގައި ހުރި ގަސްތަކުގެ މުލުގެ ސަބަބުން މިސްކިތުގެ ބިނާއަށްވެސް ވަރަށް ބޮޑު ގެއްލުމެއް ވަމުންދާކަމަށެވެ. އެ މަސައްކަތް ހައްލު ކުރުމަށް ކޮންކްރީޓް ބެރިއަރ އެއް އަޅަމުންދާކަމަށް މިނިސްޓަރ ޔުމްނާ ވިދާޅުވިއެވެ. އަދި ކުރިއަށްއޮތް ތަނުގައި މިސްކިތުގެ އެތެރޭގެ ބައިތަކުގެ މަސައްކަތް ފެށިގެންދާނެ ކަމަށް މިނިސްޓަރ ވިދާޅުވިއެވެ.
މީގެ އިތުރުން ރާއްޖެއެމްވީއަށް މައުލޫމާތުދެއްވަމުން އިންޑިއާއިން ރާއްޖެއަށް ކަނޑައަޅާފައި ހުންނަވާ ސަފީރު ވަނީ މި މަސައްކަތުގައި ދިވެހި ސަރުކާރާ ވަރަށް ގާތުން މަސައްކަތްކުރައްވަމުންދާކަން ފާހަގަކުރައްވާފައެވެ. އަދި މިއީ ދިވެހިންނަށް މުހިންމު މަސައްކަތެއް ކަމުގައި ގަބޫލުކުރައްވާކަމަށާއި، މި މަސައްކަތުގެ މިހާ ހިސާބަށް އައިއިރުވެސް މިސްކިތަށް އައިސްފައިވާ ބަދަލު ފެންނަން ފަށާފައިވާކަމަށް މަހާވަރު ވިދާޅުވިއެވެ. މި މަސައްކަތް ނިމޭއިރު ހުކުރު މިސްކިތް ކުރިން ހުރި ގޮތަށް ފެނިގެންދާނެކަމަށްވެސް ސަފީރު ވިދާޅުވިއެވެ.
ހުކުރު މިސްކިތް ހިމާޔަތްކޮށް މަރާމާތުކުރުމުގެ މަސައްކަތް ކޮށްދިނުމަށް އިންޑިއާއިން ހުށައަޅާފައިވަނީ އިންޑިއާގެ ބޮޑު ވަޒީރު ނަރެންދުރަ މޯދީ ޖޫން 2019 ގައި ދިވެހިރާއްޖެއަށް ކުރެއްވި ރަސްމީ ދަތުރުފުޅުގެ ތެރެއިންނެވެ. މީގެ ތެރޭގައި މިސްކިތުގެ މަތިވަޑާންގަނޑާއި، ބީމްތަކާއި، ފުރާޅުތަކާއި، ޕްލާސްޓާ ވޯކް، ޑްރެއިނޭޖް އަދި ސައިނެޖް މަރާމާތުކުރުން ހިމެނެއެވެ. ހަމައެހެންމެ ލިޔެލާޖަހާފައިވާ ސަރަހައްދުތަކުގައި ކަތުރުފަނީގެ ސަބަބުން ލިބިފައިވާ ގެއްލުން ދެނެގަނެ އެކަށީގެންވާ ޓްރީޓްމަންޓް ދިނުންވެސް ހިމެނެއެވެ.
