"ތްރޫ ދަ އައިސް އޮފް ވެންގޯ" އެގްޒިބިޝަން ހުޅުވައިފިއެވެ.

މިއުސްގެ ފަރާތުން، ނޭޝަނަލް އާޓް ގެލެރީ، ފެނަކަ ކޯޕަރޭޝަން، އުރީދޫ މޯލްޑިވްސް އަދި ތިންކް އެޑްވަރޓައިޒިންއާ ގުޅިގެން ބާއްވާ މި އެގްޒިިބިޝަން ހުޅުވައިދެއްވީ މިނިސްޓަރ އޮފް އާޓްސް، ކަލްޗަރ އެންޑް ހެރިޓޭޖް ޔުމްނާ މައުމޫންއެވެ.

5 ދުވަހުގެ މުއްދަތަށް ކުރިއަށްގެންދާ މި އާޓް އެގްޒިބިޝަނަށް ހުށަހަޅާފައިވަނީ "ތްރޫ ދަ އައިސް އޮފް ވެންގޯ" އިންޓަރނޭޝަނަލް އާޓް ކޮމްޕެޓިޝަންގެ ތެރެއިން ހުށަހަޅާފައިވާ ކުރެހުންތަކެވެ. އެގްޒިބިޝަން ހުޅުވުމުގެ ރަސްމިއްޔާތުގައި ބައިވެރިން ހުށަހެޅި ކުރެހުންތަކުގެ ތެރެއިން އެންމެ ރަނގަޅު ތިން ކުރެހުން ވަނީ ހޮވާފައެވެ.

މީގެ ތެރޭގައި ހިމެނެނީ މަޝްހޫރު ކުރެހުންތެރިޔާ ވިންސެންޓް ވެންގޯ ކުރެހުންތަކުގެ ސްޓައިލަށް ކުރަހާފައިވާ ކުރެހުންތަކެކެވެ. މި ކުރެހުންތަކުގެ ތެރެއިން އެއްވަނައަށް ގޮސްފައިވަނީ އަލީ އާޒިމް ކުރަހާފައިވާ ކުރެހުމެވެ. އެ ކުރެހުމުގައި ވަނީ މާލޭގެ ރާޅުގަނޑު ސަރަހައްދު ވެންގޯ ސައިޓަލަށް ކުރަހާފައެވެ.

ދެވަނައަށް ހޮވިފައިވަނީ މަރިޔަމް ޔުމްނު އަހުމަދު ޚާލިދު ކުރަހާފައިވާ ކުރެހުމެވެ. މި ކުރެހުމުން ދައްކުވައިދެނީ މަޑިއެއް ވެންގޯ ސްޓައިލަށް ކުރަހާފައިވާ މަންޒަރެވެ.

ތިންވަނައަށް ހޮވިފައިވަނީ ޒޯޔާ އުމަރު ކުރަހާފައިވާ ކުރެހުމެކެވެ. މި ކުރެހުމުންވެސް މާލޭގެ ރާޅުގަނޑު ސަރަހައްދާއި، މާލެ، ހުޅުމާލެ ގުޅާލާ ބްރިޖް ފެނެއެވެ.

މި އެގްޒިބިޝަން ހުޅުވައްދެއްވައި ވާހަކަފުޅުދައްކަވަމުން މިނިސްޓަރު ޔުމްނާ ވިދާޅުވީ ބައިނަލްއަގުވާމީ ފެންވަރުގައި ކުރިއަށް ގެންދިޔަ މި އާޓް ކޮމްޕެޓިޝަންގައި 12 ގައުމަކުން 300 އަށްވުރެ ގިނަ އެގްޒިބިޓަރުން ބައިވެރިވެފައިވާކަމަށެވެ. އެގްޒިބިޝަނުން ފެންނަން ހުރީ 80 ވަރަކަށް ކުރެހުން ކަމުގައިވީ ނަމަވެސް ކާމިޔާބު މަސައްކަތެއް ކުރެވިފައިވާކަމަށް މިނިސްޓަރު ވިދާޅުވިއެވެ.

މި ކުރެހުންތައް ބަހައްޓާފައިވަނީ ނޭޝަނަލް އާޓް ގެލެރީގައެވެ. މިމަހުގެ 1 އިން 5 އަށް ކޮންމެ ދުވަހެއްގެ ހެނދުނު 10:00 ން ހަވީރު 18:00 އަށް އަދި ރޭގަނޑު 20:00 ން 22:00 އަށް މި ކުރެހުންތައް ބަލާލެވޭނެއެވެ.