ކޮވިޑް-19ން އަރައިގަތުމަށް އަދި ވަރަށް ދުވަސް އެބައޮތް ކަމަށް، ޑަބްލިޔުއެޗްއޯގެ ޑިރެކްޓަރ ޖެނެރަލް ޓެޑުރޮސް އަދަނޮމް ގެބްރިޔޭސުސް ވިދާޅުވެއްޖެއެވެ.

ޓެޑްރޮސް ވިދާޅުވީ، ކޮވިޑް-19އިން މުޅިން އަރައިނުގަނެވުނު ނަމަވެސް ރައްކާތެރިކަމުގެ ގޮތުން އަޅަންޖެހޭ ފިޔަވަޅުތަކާއެކު ކޮންޓްރޯލް ކުރެވިދާނެ ކަމަށެވެ. އަހަރު ފެށިގެން ދެމަހެއްހާ ދުވަހުގެ ތެރޭގައި ކޭސްތަކުގެ އަދަދު ތިރިވެގެންދިޔުމުން މިއީ ކޮންޓްރޯލް ކުރެވިދާނެ ބައްޔެއްކަން އެނގޭ ކަމަށް ވިދާޅުވިއެވެ. ކޭސްތައް އިތުރުވާން ފެށީ ރައްކާތެރިކަމުގެ ގޮތުން އަޅާފައިވާ ފިޔަވަޅުތަކާއި މިންގަނޑުތަކަށް އަމަލުކުރުމަށް ޚިޔާލު ތަފާތުވުން އުފެދެން ފެށުމުންނެވެ.

ޓެޑްރޮސް ވިދާޅުވީ، އިންޑިއާއަކީ މިހާރު ބްރެޒިލަށްވުރެ ގިނަ ކޭސްތައް ފެނި، ދުނިޔެއިން ދެވަނައަށް އެންމެ ގިނަ ކޭސް ރެކޯޑް ކުރެވުނު ގައުމު ކަމަށެވެ. 1.4 ބިލިއަން މީހުންގެ އާބާދީ އޮންނަ އިންޑިއާއިން ކޮވިޑްގެ ނުރައްކާތެރި ދެވަނަ ރާޅާ ކުރިމަތިލަމުން އަންނައިރު އެގައުމުގައި ވެކްސިން ދިންކަމަށް ރެކޯޑް ކޮށްފައިވަނީ، 105 މިލިއަން މީހުންނަށެވެ.

ބަލި ފެތުރޭ މިންވަރު އިތުރުވަނީ ރައްކާތެރި ކަމުގެ ފިޔަވަޅުތައް އެޅުމުގައި ގެންގުޅޭ އުސޫލުތައް ރަނގަޅަށް ތަންފީޒުނުކުރެވުމާއި އަޅަމުންދާ ފިޔަވަޅުތަކާމެދު އޮންނަ އިތުބާރު ކުޑަވުމުންކަމަށް ވިދާޅުވިއެވެ. މިހާތަނަށް 780 މިލިއަނަށްވުރެ ގިނަ މީހުންނަށް ކޯވިޑް-19ގެ ވެކްސިން ދިން ނަމަވެސް ބަލި ފެތުރުން ހުއްޓުވުމަށް މާސްކު އެޅުމާއި އިޖުތިމާއީ ގައިދުރުކަން ބެހެއްޓުމަކީ ކޮންމެހެން މުހިންމު ކަމެއް ކަމަށް ވިދާޅުވިއެވެ.

ކޯވިޑް-19 ޖެހުމަކީ މާބޮޑު މައްސަލައެއް ނޫންކަމަށް ބައެއް މީހުން ޤަބޫލުކުރާކަމަށް ވެސް ޑިރެކްޓަރ ޖެނެރަލް ވިދާޅުވިއެވެ.