އިންޑިއާގައި ކޮވިޑް-19ގެ ކޭސްތައް އިތުރުވަމުންގޮސް، އެއްދުވަސްތެރޭ 150،000ށް ވުރެ ގިނަ މީހުން ޕޮޒިޓިވްވެއްޖެއެވެ.

އިންޑިއާގެ ހެލްތު މިނިސްޓްރީން ރިޕޯޓްކޮށްފައިވާ ގޮތުން އާދިއްތަ ދުވަހު 152،879 މީހުން ވަނީ އެގައުމުން ކޮވިޑަށް ޕޮޒިޓިވްވެފައެވެ. މިއީ މިހާތަނަށް އެގައުމުން އެއްދުވަސްތެރޭ މިއަދަދަށް މީހުން ޕޮޒިޓިވްވި ފުރަތަމަ ފަހަރެވެ. އިންޑިއާއަށް އައި ކޮވިޑްގެ މި އައު ރާޅާއިއެކު އެގައުމުން ގިނަ އަދަދެއްގެ ބަޔަކު ޕޮޒިިޓިވްވަމުންދާތީ ހޮސްޕިޓަލްތަކަށް ވަނީ ބާރު ބޮޑުވެފައެވެ.

މީގެ އިތުރުން ފާއިތުވި ފަސް މަސް ދުވަހުގެ ތެރޭގައި ފުރަތަމަ ފަހަރަށް އެންމެ ގިނަ އަދަދެއްގެ މީހުން މަރުވިކަމަށް އެގައުމުން ރިޕޯޓްކޮށްފައިވަނީވެސް އާދިއްތަ ދުވަހުއެވެ. އެއީ 839 މީހުންނެވެ. މިއާއިއެކު އެގައުމުން މަރުވި މީހުންގެ އަދަދު ވަނީ 169,275ށް އަރާފައެވެ.

އިންޑިއާއަކީ މުޅި ދުނިޔެއިން ތިން ވަނައަށް އެންމެ ގިނަ އަދަދެއްގެ މީހުން ޕޮޒިޓިވްވެފައިވާ ގައުމެވެ. އެގައުމުން 13.35 މިލިއަނަށް ވުރެ ގިނަ މީހުން ވަނީ ޕޮޒިޓިވްވެފައެވެ. އެގައުމުގައި ދަނީ ކޮވިޑް-19 އާއި ގުޅިގެން ދުނިޔޭގެ އެންމެ ބޮޑު އެއް ވެކްސިނޭޝަން ޕްރޮގްރާމް ކުރިއަށް ގެންދަމުންނެވެ.