ކުޅުދުއްފުށި ސިޓީގެ ފުރަތަމަ މޭޔަރުގެ ގޮނޑިއާއެކު ތިން ސިޓީއެއްގެ މޭޔަރުކަން އެމްޑީޕީއަށް
11 އެޕްރީލު 2021 | އާދީއްތަ 01:52އައްޑޫގެ މޭޔަރުކަން ކާމިޔާބު ކުރެއްވީ އަލީ ނިޒާރު
ލޯކަލް ކައުންސިލް އިންތިޚާބު 2020
ކުޅުދުއްފުށި ސިޓީ ފުރަތަމަ މޭޔަރުގެ ގޮނޑި ހިމެނޭނެހެން ތިން ސިޓީއެއްގެ މޭޔަރުކަން ވެރިކަންކުރާ އެމްޑީޕީން ކަށަވަރުކޮށްފިއެވެ.
ލޯކަލް ކައުންސިލް އިންތިޚާބުގެ ވަގުތީ ނަތީޖާ ދައްކާ ގޮތުން، ކުޅުދުއްފުށީގެ މޭޔަރުކަމަށް ވާދަކުރައްވާ ކެންޑިޑޭޓުންގެ ތެރެއިން، އެމްޑީޕީގެ ކެންޑިޑޭޓް މުހައްމަދު އާތިފަށް 1841 ވޯޓު ލިބިވަޑައިގެންފައިވެއެވެ. އޭނާއާ އެންމެ ކައިރިން ވާދަކުރައްވާ ޕީޕީއެމްގެ ކެންޑިޑޭޓް އަބްދުﷲ އިގްބާލަށް ލިބިވަޑައިގެންނެވީ 1222 ވޯޓެވެ.
ހަމައެހެންމެ އެ ދާއިރާއަށް އަމިއްލަ ގޮތުން ވާދަކުރެއްވި އާދަމް ޝަރީފް މުހައްމަދަށް 129 ވޯޓު ލިބިވަޑައިގެންފައިވެއެވެ. ދެން އެ ދާއިރާއަށް ވާދަކުރެއްވި އަހުމަދު ސައީދަށް ލިބިވަޑައިގެންނެވީ 109 ވޯޓެވެ.
ކުޅުދުއްފުށީގެ އިތުރުން އައްޑޫ ސިޓީގެ މޭޔަރުކަމާއި ފުވައްމުލައް ސިޓީގެ މޭޔަރުކަން ވެސް ނަގާފައިވަނީ އެމްޑީޕީންނެވެ. އެގޮތުން އައްޑޫ ސިޓީގެ މޭޔަރުކަން އެމްޑީޕީގެ ކެންޑިޑޭޓް އަލީ ނިޒާރު ކާމިޔާބު ކުރެއްވިއިރު ފުވައްމުލައް ސިޓީގެ މޭޔަރުކަން ކާމިޔާބު ކުރެއްވީ އިސްމާއީލް ރަފީގެވެ. ހަމަ އެއާއެކު ފުވައްމުލައް ސިޓީގެ ފަސް ގޮނޑިއެއް ކާމިޔާބުކޮށް، ކައުންސިލުގެ މެޖޯރިޓީ ވެސް އެމްޑީޕީން ހޯދާފައިވެއެވެ.
