ތޮއްޖެހިގެން ވޯޓުލާން ދާން މަޑު ނުކުރުމަށް އެޗްއާރްސީއެމުން ގޮވާލައިފިއެވެ.

ލޯކަލް ކައުންސިލް އިންތިޚާބުގައި ފާހަގަވިކަންކަން ހާމަކުރުމަށް އެޗްއާރްސީއެމުން ބޭއްވި ނޫސްވެރިންގެ ބައްދަލުވުމުގައި ބުނެފައިވަނީ ޚާއްސަ ހާލަތެއް ދިމާނުވާ ހުރިހާ ވޯޓު ފޮއްޓެއްގައި ގަޑިއަށް ވޯޓުލުން ފެށުނު ކަމުގައެވެ. ކޮވިޑް ނުފެތުރޭ ގޮތަށް ވޯޓުލުން ކުރިއަށް ގެންދިއުމަށް އިލްތިމާސްކޮށް އެޗްއާރްސީއެމުން ވަނީ ތޮއްޖެހިގެން ވޯޓުލާން ދާން މަޑު ނުކޮށް ވީހާވެސް އަވަހަށް ވޯޓުލާން ދިއުމަށް ގޮވާލާފައެވެ.

މިހާތަނަށް އައިރު ވޯޓުލާން ދިޔަ މީހުން މަދުކަން ފާހަގަކޮށް އެ އިދާރާއިން ބުނީ ބައެއް ވޯޓު ފޮށިތަކުގައި ވޯޓުލުން ފެށުން ލަސްވި ސަބަބަކަށްވެސް މިކަން ވެގެން ދިޔަކަމަށެވެ. ބައެއް މަރުކަޒުތަކުގައި މީހުން އެއްވެ ތިބޭއިރު ގައިދުރުކަން ނެތްކަން ފާހަގަކުރެވޭ ކަމަށާއި މާސްކްއެޅުން ފިޔަވައި ދެން ހުރި ގައިޑްލައިންތަކަށް ތަބާނުވާކަން ފާހަގަވާކަމަށް ވެސް ބުނެފައިވެއެވެ.

ރާއްޖޭގައި އާންމުކޮށް އިންތިޚާބުތަކުގައި ވޯޓުލާން ނިކުންނަ އަދަދުތަކަށް ބަލާއިރު ކައުންސިލް އިންތިޚާބަށް ނިކުންނަ މީހުން މަދެވެ. އެންމެ ފުރަތަމަ 2011 ވަނަ އަހަރު ބޭއްވި ލޯކަލް އިންތިޚާބުގައި ވޯޓު ދިނުމުގެ ހައްގު ލިބިފައިވާ މީހުންގެ ތެރެއިން އެ ހައްގު އަދާކުރީ 72.11 އިންސައްތައެވެ. އޭގެފަހުން 2014 ވަނަ އަހަރު ބޭއްވި ލޯކަލް އިންތިޚާބުގައި އެ ހައްގު އަދާކުރީ 64.5 ޕަސެންޓު މީހުންނެވެ. އެންމެ ފަހުން 2017 ވަނަ އަހަރު ބޭއްވި އިންތިޚާބުގައި ހައްގު އަދާކުރީ 65.9 ޕަސެންޓު މީހުންނެވެ.

މިއަހަރު ބާއްވާ ކައުންސިލް އިންތިޚާބުގައި ވޯޓު ދިނުމުގެ ހައްގު ލިބިފައިވަނީ 273،128 (ދެލައްކަ ހަތްދިހަ ތިން ހާސް ސަތޭކަ އަށާވީސް) މީހުންނަށެވެ. އިންތިޚާބު މިބޭއްވީ ކޮވިޑްގެ ޕެންޑަމިކް ތެރޭގައެވެ. ރާއްޖޭގެ މިހާރުގެ ހާލަތަށް ބަލާއިރުވެސް ކޮވިޑްގެ އެކްޓިވް ކޭސްތަކުގެ އަދަދު ހުރީ ތިންހާހަށްވުރެ މަތީގައެވެ. ޕޮޒިޓިވްވި މީހުންނާއި ކަރަންޓީނުގައި ތިބި މީހުންނަށް ގާނޫނުން ލިބިދޭ ހައްގެއްގެ ދަށުން ވޯޓުލާން ދިއުމުގެ ފުރުސަތު އެބައޮތެވެ.