ފުވައްމުލަކުގެ ނަރުދަމާ ނިޒާމު 6 މަސް ތެރޭގައި ހައްލުވާނެ، އިންޖީނުގޭގެ ހިދުމަތް އަންނަ އަހަރު ލިބޭނެ - ފެނަކަ އެމްޑީ
ފުވައްމުލަކު ނަރުދަމާ ނިޒާމަކީ ސަރުކާރު ވުޖޫދު ވުމަށް ފަހު، ހައްލުކުރުމަށް ދިމާވި އެއްމެ އުނގަދޫ މަސައްކަތް
ފެނަކަ ކޯޕަރޭޝަންގެ އެމްޑީ އަހްމަދު ސައީދު
ފުވައްމުލަކު ނަރުދަމާ ނިޒާމަށް ދިމާވެފައިވާ މައްސަލަ ތަކުގެހއްލު ކުރިއަށް އޮތް 6 މަސައްދުވަހުގެ ތެރޭގައި ލިބިގެންދާނެ ކަމަށާއި، އައު އިންޖީނުގޭގެ ހިދުމަތް އަންނަ އަހަރުގެ ތެރޭގައި ލިބޭނެ ކަމުގެ ޔަގީންކަން ފެނަކަ ކޯޕަރޭޝަންގެ މެނޭޖިންގ ޑިރެކްޓަރ އަހްމަދު ސައީދު ދެއްވައިފިއެވެ.
ފުވައްމުލަކުސިޓީގެ ނަރުދަމާ ނިޒާމުގެ ޢަމަލީ މަސައްކަތް ފެށުމާއި، އެ ސިޓީގެ އައު އިންޖީނުގޭގެ ބިންގާ އެޅުމުގެ ރަސްމިއްޔާތުގައި ވާހަކަ ދައްކަވަމުން ސައީދު ވިދާޅުވީ، ފުވައްމުލަކު ނަރުދަމާ ނިޒާމަކީ ސަރުކާރު ވުޖޫދު ވުމަށް ފަހު، ހައްލުކުރުމަށް ދިމާވި އެންމެ އުނގަދޫ މަސައްކަތް ކަމަށް ވިދާޅުވިއެވެ. މިފެނިގެންދަނި ކަމަކަށް ކަމެއް ކުރުމުގެ ނަތީޖާ ކަމަށާއި، މި ސަރުކާރުން ހަރުދަނާ ކަމާ އެކީ ނޫނީ ކަންތައް ނުކޮށްދޭނެ ކަމަށް ވިދާޅުވިއެވެ.
ފެނަކައިގެ ޒުވާން އިންޖިނިއަރިންގ ޓީމަކުން އެތައް ތަހުލީލު ތަކެއް ކުރަމުން ދިޔައިރުވެސް، މި ނިޒާމު ހައްލު ކުރުމަށް ބޭނުންވާ ކަންކަން ދެނެގަތުމަށް އުނދަގޫތައް ކުރިމަތިވިއެވެ. އެކަމަކުވެސް މިހާރު މިވަނީ ހައްލު ހޯދާފައި ކަމަށް ވިދާޅުވިއެވެ. މި ތަހުލީލުތައް ކުރަމުން ދިޔައިރު ދިމާވިދަތިތައް ރައީސައް ހިއްސާކުރި ކަމަށާއި، މިކަމުގައި އަވަސް ހައްލެއް ހޯދައި ފުވައްމުލަކު ރައްޔިތުންގެ މި ޒަރޫރީ ބޭނުން ވީހާވެސް އަވަހަކަށް ފުރިހަމަ ކުރުމަށް ރައީސް އެންގެވި ކަމަށް ވިދާޅުވިއެވެ.
މިކަމަށް ބޮޑު ހޭދައެއް ކުރަންޖެހޭތީ، އެ ކަން ހިއްސާ ކުރެއްވުމުން ވަގުތުން އެކަންތައްވެސް ހައްލުކޮށްދެއްވި ކަމަށް ސައީދު ވިދާޅުވިއެވެ.
ފުވައްމުލަކުގެ ނަރުދަމާ ނިޒާމަށް ދިމާވެފައިވާ މައްސަލަތައް ހައްލުކުރުމަށް ފެނަކަ ކޯޕަރޭޝަނާ ހަވާލުކުރީ މި އަހަރުގެ ފެބުރުއަރީ މަހުގައެވެ. 43 މިލިއަން ރުފިޔާ ދައުލަތުގެ ބަޖެޓުން ޚަރަދުކުރަމަށްވަނީ ހަމަޖެހިފައެވެ.
އައު އިންޖީނުގެ އެޅުމުގެ މަސައްކަތަށް އަލި އަޅުއްވާ ވާހަކަދައްކަވަމުން ސައީދު ވިދާޅުވީ، ފުވައްމުލަކު ސިޓީގެ އައު އިންޖީނުގޭގެ މަޝްރޫޢާއެކު އެ ރަށަށް ކަރަންޓުގެ ޚިދުމަތް ފޯރުކޮށްދިނުމުގައި މިހާރު ކުރިމަތިވާ މައްސަލަތައް ޙައްލުވެ، ތަނުގެ ހިންގުމުގެ ޚަރަދުތަކަށްވެސް ލުއިކަން ލިބިގެންދާނެއެވެ. ސަރުކާރުގެ އަމާޒަކަށްވީ، ފުވައްމުލަކުގައި މިހާރު ހުރި އިންޖީނުގެއަކީ އާއްމު ރައްޔިތުން ދިރިއުޅޭ ސަރަހައްދުގައި ހުރި ތަކަށް ވެފައި، އެތަން ރައްޔިތުންނަށް ތަކުލީފު ނުއުފުލޭތަނަކަށް ބަދަލުކުރުން ކަމުގައެވެ.
ކުރިއަށް އޮތް 18 މަސް ދުވަހުގެ ތެރޭގައި އައު އިންޖީނުގޭގެ ޚިދުމަށް އެސިޓީގެ ރައްޔިތުންނަށް ލިބިގެންދާނެ ކަމަށް ވިދާޅުވިއެވެ.
ފުވައްމުލަކު ސިޓީގެ މިހާރުގެ އިންޖީނުގޭގެ ޖުމްލަ ކެޕޭސިޓީއަކީ 5.4 މެގަވޮޓެވެ.
އައު އިންޖީނުގެ ޤާއިމުކުރަނީ 4 މެގަވޮޓްގެ 5 ޖަނަރޭޓަރުސެޓްގެ ޖާގަ ހިމެނޭގޮތަށް ޖުމްލަ 20 މެގަވޮޓްގެ ކެޕޭސިޓީ ޤާއިމުކުރެވޭގޮތަށެވެ. އެއާއެކު މި މަޝްރޫޢުގެ ދަށުން 8 ޓްރާންސްފޯމަރު ބެހެއްޓުމާއި، ޖުމްލަ 21 ކިލޯމީޓަރުގެ މީޑިއަމް ވޯލްޓޭޖުގެ ކޭބަލް އެޅުމާއި، އައު ފިއުލް ސްޓޯރޭޖް ޓޭންކުތައް ޤާއިމުކުރުމަށް ހަމަޖެހިފައިވެއެވެ.
މި މަޝްރޫޢުގެ މަސައްކަތްތައް ނިމޭއިރު ފުވައްމުލަކު ސިޓީއަށް ކުރިޔަށް އޮތް 30 ނުވަތަ 40 އަހަރަށް ދަތިނުވެ ބޭނުންވާ ވަރަށް ކަރަންޓުގެ ޚިދުމަތް ދިނުމުގެ ޤާބިލުކަން ހުންނާނެއެވެ.
