ފުލުހުންގެ މުއައްސަސާއަށް ރައްޔިތުންގެ ލޯބި ހޯދުމަށް ގިނަ ކަންކަން ކުރަންޖެހޭ: ސީޕީ
ފުލުހުންނާއި ރައްޔިތުންނާ އޮންނަ ގުޅުން މިހާރަށްވުރެ ބޮޑަށް ހަރުދަނާކުރަންޖެހޭ
ފުލުހުންގެ ޚިދުމަތުގެ 92 ވަނަ އަހަރީ ދުވަހުގެ ރަސްމީ ޖަލްސާގައި ކޮމިޝަނަރ އޮފް ޕޮލިސް އަލީ ޝުޖާއު ވާހަކަފުޅު ދައްކަވަނީ
ދިވެހިންގެ ފުލުހުންގެ ޚިދުމަތަކީ ރައްޔިތުންގެ ލޯތްބާއި އިހުތިރާމު ލިބިފައިވާ މުއައްސަސާއަކަށް ހެދުމަށް އަދިވެސް ވަރަށް ގިނަ ކަންކަން ކުރަންޖެހޭ ކޮމިޝަނަރ އޮފް ޕޮލިސް އަލީ ޝުޖާއު ވިދާޅުވެއްޖެއެވެ.
ކޮމިޝަނަރ މިހެން ވިދާޅުވީ ފުލުހުންގެ ޚިދުމަތުގެ 92 ވަނަ އަހަރީ ދުވަހުގެ ރަސްމީ ޖަލްސާގައި ވާހަކަފުޅު ދައްކަވަމުންނެވެ.
ކޮމިޝަނަރ ވިދާޅުވީ ރައްޔިތުންގެ ސަލާމަތާއި ރައްކާތެރިކަމަށް ވާންޖެހުނު ކޮންމެ ގުރުބާނީއެއް ފުލުހުން އެއްވެސް ފަސްޖެހުމެއްނެތި ވާނެކަމަށް ރައްޔިތުންނާއި މުޅި ގައުމު ހެކިވާނެ ކަމަށާއި ދިވެހި ފުލުހުންގެ ޚިދުމަތަކީ ރައްޔިތުންގެ ލޯތްބާއި އިހުތިރާމު ލިބިފައިވާ މުއައްސަސާއަކަށް ހެދުމަށް އަދިވެސް ވަރަށް ގިނަ ކަންކަން ކުރަންޖެހޭ ކަމަށެވެ.
ފުލުހުންނާއި ރައްޔިތުންނާ އޮންނަ ގުޅުން މިހާރަށްވުރެ ބޮޑަށް ހަރުދަނާކުރަންޖެހޭ ކަމަށާއި، ހުށަހެޅޭ މައްސަލަތައް މިހާރަށްވުރެ އަވަހަށް ނިންމަން މަސައްކަތް ކުރަންޖެހޭ ކަމަށް ކޮމިޝަނަރ ވިދާޅުވިއެވެ. އަދި ވިދާޅުވީ މިކަންކަން ހައްލުކުރުމަށް ހަރުދަނާ މަސައްކަތްތަކެއް ކުރަމުންދާ ކަމަށެވެ.
ކުށްމަދު އަމާންވެއްޓެއް ގާއިމް ކުރުމަށް ފުލުހުން ކުރަމުންދާ މަސައްކަތްތަކަށް އިޝާރާތް ކުރައްވައި ކޮމިޝަނަރ ވިދާޅުވީ، މި ދައުރުގައި އަތުލައިގަނެވުނު މަސްތުވާތަކެތީގެ މަގުމަތީގެ އަގު 1.4 ބިލިއަން ރުފިޔާއަށް ވުރެ ގިނަ ކަމަށެވެ. އަދި މި ދައުރުގެ މިހާތަނަށް 9000 އަށްވުރެ ގިނަ ބަނގުރަލާއި 698 ކިލޯގެ މަސްތުވާތަކެތި އަތުލައިގަނެފައިވާ ކަމަށް ކޮމިޝަނަރ ވިދާޅުވިއެވެ.
ކޮމިޝަނަރ ވިދާޅުވީ ރާއްޖެއަށް މަސްތުވާތަކެތި އެތެރެކޮށް އެ ތަކެތި ބޭނުންކޮށް އަދި އޭގެ ވިޔަފާރިކުރާ މީހުންނާއި އެކި ކަހަލަ ބޮޑެތި ކުށްތައްކުރާ ގުރޫޕުތައް އުފެދި އެ ގުރޫޕުތަކަށް ކުޑަކުދިން ވައްދައި އެ ގުރޫޕުތަކުގެ އިސް މީހުންނަށް މަންފާވާ ގޮތަށް ކުޑަކުދިން ބޭނުންކޮށްގެން މުއްސަނދިވެފައިވާ ގުރޫޕުތަކުގެ ލީޑަރުންގެ މައްސަލަތައް ތަހުގީގުކޮށް ހައްލުކުރުމަށް މިދައުރުގައި ފުލުހުންގެ މަސައްކަތްތައް ތަރުތީބު ކުރެވިގެންދާއިރު މި މައްސަލަތަކަށް ހައްލު ގެނައުމަށް ތަފާތު ކަމަކަށް މަސައްކަތެއް ފެށިފައިވާ ކަމަށެވެ.
ކުށްކުރާ ނެޓުވޯކުތަކުގައި ހަރަކާތްތެރިވާ ފަރާތްތަކަށް ލިބިފައިވާ މުއްސަނދިކަމަކީ ކިހިނެއް ލިބުނު މުއްސަނދި ކަމެއްތޯ ބަލައި އެފަދަ މީހުންނަށް އަމާޒުކޮށް ފައިނޭންޝިއަލް އިންވެސްޓިގޭޝަންތަކެއް ފެށިފައިވާ ކަމަށާއި، މި މަސައްކަތުގެ ތެރެއިން، ފުވައްމުލަކު ސިޓީގައި މަސްތުވާތަކެތީގެ ނެޓްވޯކަކުން 112 މީހަކު ހޯދައި 121 މައްސަލައެއް ތަހުގީގުކޮށް ޕްރޮސެކިއުޓަރ ޖެނެރަލްގެ އޮފީހަށް ފޮނުވާފައިވާ ކަމަށް ވިދާޅުވިއެވެ. އަދި މާލެއަށް ނިސްބަތްވާ ގުރޫޕެއްގެ ފައިނޭންޝިއަލް ތަހުގީގު ނިމިމި ނެޓްވޯކުގައި އުޅޭ މީހުން ދިރިއުޅޭ ތަންތަން ބަލަން ފެށިފައިވާ ކަމަށާއި ޖުމްލަ 11 މީހުން އެކުލެވޭ މި ނެޓްވޯކުގެ 64 މިލިޔަން ރުފިޔާ ދައުރުކުރި ގޮތް ތަހުގީގުކޮށް އެ ފައިސާތަކަކީ ކުށްކޮށްގެން ހޯދާފައިވާ ފައިސާތަކެއް ކަމަށް ތަހުގީގަށް ދެނެގަނެވިފައިވާ ކަމަށް ވެސް ކޮމިޝަނަރ ވިދާޅުވިއެވެ.
މި ނެޓްވޯކުގެ ބޮޑުންގެ ގޮތުގައި ބެލެވުނު ދެ މީހުންގެ މައްސަލަ ތަހުގީގުކޮށް ޕްރޮސެކިއުޓަރ ޖެނެރަލްގެ އޮފީހަށް ފޮނުވި، މި ދެ މީހުން ކުށްކޮށްގެން ހޯދި ފައިސާތައް ހަރަދުކޮށްގެން ގަނެފައިވާ އަގުބޮޑު މުދާތައް ދައުލަތަށް ނަގައިދުނުމަށް ވަނީ އެދިފައި. މި ދެ މީހުންގެ އެކައުންޓުގައި ފަސްދޮޅަސް މިލިޔަން ރުފިޔާ ފަސް އަހަރު ދުވަހުގެ ތެރޭގައި ދައުރުކޮށްފައިވޭ.ކޮމިޝަނަރ އޮފް ޕޮލިސް އަލީ ޝުޖާއު
ރާއްޖޭގައި ސްކޭމާއި ސައިބަރގެ މައްސަލަތައް އިތުރުވަމުންދާތީ އެ މައްސަލަތައް ބަލާނެ ޚާއްސަ އިންތިޒާމުތަކެއް ހަމަޖެހިފައިވާކަން ފާހަގަކުރައްވައި ކޮމިޝަނަރ ވިދާޅުވީ ރާއްޖެއަކީ ކުށްމަދު އަމާން ތަނެއްގެ ގޮތުގައި ބޭއްވުމަށް މިފަދަ ކިތަންމެ ކަމެއް ކުރެވިފައިވާ ކަމަށެވެ. އަދި ސައުވީސް ގަޑިއިރު ޚިދުމަތްދެވޭ ގޮތަށް ސްކޭމް ސެންޓަރެއް ގާއިމުކޮށް މަސައްކަތް ކުރެވެމުންދާ ކަމަށާއި ސައިބަރ އޮޕަރޭޝަން ސެންޓަރަކާއި ސައިބަރ ކްރައިމް އިންވެސްޓިގޭޝަނަށް ޚާއްސަ ތަނެއް އުފައްދައި ޚިދުމަތް ފެށިފައިވާ ކަމަށް ވިދާޅުވިއެވެ.
ދުނިޔޭގައި ކުރިއަރާފައިވާ ގައުމުތަކުގައި ގާއިމުވެފައިވާ ފަދަ ފުލުހުންގެ ޚިދުމަތަކަށް ދިވެހި ފުލުހުންގެ ޚިދުމަތް ހެދޭތޯ ދަނީ މަސައްކަތްކުރަމުން. ޒަމާނީ ތައުލީމާއި ޓެކްނޮލޮޖީ ބޭނުންކޮށްގެން ފުލުހުންގެ ޚިދުމަތް ދަނީ ތަރައްގީކުރަމުން. ދިވެހި ފުލުހުންގެ ޚިދުމަތް ޕްރޮފެޝަނަލް ހިދުމަތަކަށް ހެދުމުގެ ގޮތުން، ފުލުހުންގެ އަސާސީ ތަމްރީނު ކޯސް ނަހަދާ ތިބި 1000 ވުރެ ގިނަ ރެކްރޫޓުންގެ ތެރެއިން 748 ރެކްރޫޓޫން ތަމްރީނުކުރެވި، 1013 ފުލުހުން އެެ ފުލުހުންނާ ގުޅޭ ދާއިރާތަކުން ވަނީ ތަމްރީނު ކުރެވިފައި. އޭގެ ތެރެއިން 113 ފުލުހުން ރާއްޖެއިން ބޭރުން ވަނީ ތަމްރީނު ހާސިލުކޮށްފައި.ކޮމިޝަނަރ އޮފް ޕޮލިސް އަލީ ޝުޖާއު
ކޮމިޝަނަރ ވިދާޅުވީ ކުރިއަށް އޮތްތަނުގައި ވެސް ފުލުހުންގެ ޚިދުމަތް ހަރުދަނާކޮށް މުޅިރާއްޖެއަށް މި ޚިދުމަތުގެ ފެންވަރު ރަނގަޅުކުރާނެ ކަމަށެވެ.
