ފުވައްމުލައް ސިޓީގައި 18 އަހަރުގެ ޒުވާނަކަށް ހަމަލާދީ ޒަހަމްކޮށްލައިފި
11 ޖޫން 2025 | ބުދަ 05:17ނޭފަތާއި، އަނގަމަތި ފަޅައިގެން ގޮސް، ކަނާއަތު ކޯމަތި ދުޅަވެ، އިތުރު ކުދި އަނިޔާވެފައިވޭ
ކްރައިމް ސީންއެއްގައި ޕޮލިސް ޓޭޕް ދަމާފައި
ފުވައްމުލައް ސިޓީގައި 18 އަހަރުގެ ޒުވާނަކަށް ހަމަލާދީ ޒަހަމްކޮށްލައިފިއެވެ.
ބުދަ ދުވަހު ފުލުހުން ބުނީ، ފުވައްމުލައް ސިޓީގައި މީހެއްގެ ގައިގައި ޖަހައި، މާރާމާރީ ހިންގާފައިވާ މައްސަލައެއް އަންގާރަ ދުވަހުގެ ރޭ 8:54 އެހާއިރު، ރިޕޯޓު ކޮށްފައިވާ ކަމަށެވެ.
މި މާރާމަރީގައި އަނިޔާވެފައިވަނީ 18 އަހަރުގެ ދިވެހި ފިރިހެނަކަށް ކަމަށް ފުލުހުން ބުނެއެވެ. އަދި ލިބިފައިވާ އަނިޔާތަކުގެ ތެރެއިން ބޭރުފުށުން ފެންނަން ހުރި އަނިޔާތެރޭގައި ނޭފަތާއި، އަނގަމަތި ފަޅައިގެން ގޮސް، ކަނާއަތު ކޯމަތި ދުޅަވެ، އިތުރު ކުދި އަނިޔާވެފައިވާ ކަމަށް ފުލުހުން ބުނެއެވެ.
މީގެ އިތުރުން ފުލުހުން ބުނީ، އެ ޒުވާނާއަށް އިތުރު ފަރުވާ ދިނުމަށް އައްޑޫ ސިޓީއަށް ގެންގޮސްފައިވާ ކަމަށެވެ.
މިމައްސަލައާ ގުޅޭގޮތުން އިތުރު ތަފްސީލެއް ފުލުހުން ހިއްސާ ކޮށްފައިނުވެއެވެ. އަދި މީހަކު ހައްޔަރު ކުރި ކަމެއް ނުވަތަ ނުކުރާ ކަމެއް ސާފެއް ނުވެއެވެ.
މި މައްސަލަ ފުލުހުން ގެންދަނީ އިތުރަށް ތަހުގީގު ކުރަމުންނެވެ.
