ކުރިއަށް އޮތް ލޯކަލް ކައުންސިލް އިންތިޚާބުގައި ރައްޔިތުން ނުރުހިފައި ތިބި ބޮޑު މަންޒަރު ސަރުކާރަށް ދައްކަންޖެހޭ: މެންބަރު އަހުމަދު ދީދީ
ލޮލަށް ފެންނަ ތަރައްގީ ވެސް ލޮލަށް ނުފެންނަ ތަރައްގީގެ މަޝްރޫއެއް ވެސް ނުހިނގާ
ހުކުރު ދުވަހުގެ ރޭ އެމްޑީޕީން ފުވައްމުލައް ސިޓީގައި ބޭއްވި ޖަލްސާގައި މަރަދޫ ދާއިރާގެ މެންބަރު އަހުމަދު ދީދީ ވާހަކަދައްކަވަނީ
ކުރިއަށް އޮތް ލޯކަލް ކައުންސިލް އިންތިޚާބުގައި ރައްޔިތުން ނުރުހިފައި ތިބި ބޮޑު މަންޒަރު ސަރުކާރަށް ދައްކަންޖެހޭ ކަމަށް މަރަދޫ ދާއިރާގެ މެންބަރު އަހުމަދު ދީދީ ވިދާޅުވެއްޖެއެވެ.
ހުކުރު ދުވަހުގެ ރޭ އެމްޑީޕީން ފުވައްމުލައް ސިޓީގައި ބޭއްވި ޖަލްސާގައި މެންބަރު އަހުމަދު ދީދީ ވިދާޅުވީ މިއީ ވިޔާނުދާ ސަރުކާރެއް ކަމަށާއި، މިސަރުކާރަށް ރައްޔިތުންގެ ނުރުހުމުގެ ބޮޑު މެސެޖް ކުރިއަށް މިއޮތް ލޯކަލް ކައުންސިލް އިންތިޚާބުގެ ނަތީޖާއިން ދެއްކޭނެ ކަމަށެވެ.
ރާއްޖޭގެ ތަރައްގީއަށް އިޝާރާތް ކުރައްވައި މެންބަރު އަހުމަދު ދީދީ ވިދާޅުވީ ލޮލަށް ފެންނަ ތަރައްގީ ވެސް ލޮލަށް ނުފެންނަ ތަރައްގީގެ އެއްވެސް މަޝްރޫއެއް ނުހިނގާ ކަމަށެވެ. އަދި ރައްޔިތުންނަށް ފައިދާވާ އެއްވެސް ކަމެއް މި ސަރުކާރަށް ދޮޅު އަހަރުވެގެންދާއިރު، ކުރެވިފައިނުވާ ކަމަށް އޭނާ ވިދާޅުވިއެވެ.
ލޮލަށް ނުފެންނަ ތަރައްގީ ކުރިއަށްދާ ކަމަށް މިސަރުކާރުގެ ބޭފުޅުން ވިދާޅުވާތީ އެކަމަށް ރައްދު ދެއްވައި މެންބަރު އަހުމަދު ދީދީ ވިދާޅުވީ ހިލޭ ޑިގްރީ ޕްރޮގްރާމްއަކީ ކުރީ ސަރުކާރުގެ މަސައްކަތެއް ކަމަށާއި، އެކަން ވެސް ހުއްޓުވަން މިސަރުކާރުގެ ބޭފުޅުން ބޭނުންވާ ކަމަށެވެ. ނަމަވެސް ޒުވާނުންނާ ގުޅިފައިވާ ކަމަކަށްވާތީ، އެކަން ކުރަން ނުކުރެނީ ކަމަށް އޭނާ ވިދާޅުވިއެވެ.
މީގެ އިތުރުން މެންބަރު އަހުމަދު ދީދީ ވިދާޅުވީ މިއީ ދޮގު ހެދުމުގައި ހައްދުފަހަނައަޅާ ގޮސްފައިވާ ސަރުކާރެއް ކަމަށާއި، ރައީސް ވިދާޅުވާ ހުރިހާ ވާހަކަފުޅެއް ދާނީ ދިމާ އިދިކޮޅަށް ކަމަށެވެ.
ތިން ބާރުވަކިވެފައިވާ ޑިމޮކްރަސީއެއްގެ ދަށުން ވެރިކަން ހިންގުމަށް ވަޑައިގަންނަވާ މުޅި ނިޒާމު އެއްކޮށް ހަލާކު ކުރަމުންދާ ކަމަށް މެންބަރު އަހުމަދު ދީދީ ވިދާޅުވިއެވެ. އަދި މިހާރު މަސައްކަތް ކުރަމުންދަނީ ލާމަރުކަޒީ ނިޒާމު އެއްކޮށް ހަލާކު ކޮށްލުމަށް ކަމަށް ވިދާޅުވިއެވެ.
މި ބޭފުޅުން މި ވިދާޅުވަނީ ކައުންސިލްތައް ބާރުވެރިކުރުވުން ކައުންސިލްތަކުގެ އައްޕައަކީ ރައީސް މުއިއްޒޭ. އެބޭފުޅާއަށްށޭ މި ހިނގާނެ އެންމެ ރަނގަޅު ގޮތް އެނގޭނީ. އެހެންނަމަވެސް އެބޭފުޅާ ކައުންސުލްތަކުގެ ބާރު ކަނޑުވާލީ އެބޭފުޅާގެ މިނިސްޓްރީން، މިނިސްޓަރަކަށް ހުރެގެން. އޭގެފަހުން އެބޭފުޅާ އެކަނޑާލި ބާރުތައް އެބޭފުޅާ މޭޔަރަކަށް ހޮވިގެން މާލެސިޓީ ކައުންސިލަށް އައިސް އަނެއްކާ ބޭނުންވެއްޖެ.އެހެންވީމައެއް ދުވަހު ދައްކަވާ ވާހަކަ އާއި އަނެއް ދުވަހު ދައްކަވާ ވާހަކަ ދިމައެއް ނުވާ މިންވަރު މިހުރީ ފެންނަން.މަރަދޫ ދާއިރާގެ މެންބަރު އަހުމަދު ދީދީ
މެންބަރު އަހުމަދު ދީދީ ވިދާޅުވީ ކުރިއަށް އޮތްތަނުގައި ވެސް ރާއްޖޭގައި ރައްޔިތުން އެދޭ ޑިމޮކްރަޓިކް ނިޒާމު ބައްޓަން ކުރަމުންދާނީ އެމްޑީޕީން ކަމަށާއި، މިޕާޓީއާއެކު ހުރިހާ ރައްޔިތުން ގުޅިގެން މަސައްކަތް ކުރަންޖެހޭ ކަމަށެވެ.
