ސަރުކާރުން ބަޖެޓުގެ 95 ޕަސެންޓު ހުސްކޮށްލާ, އެ ފައިސާއަށް ވާ ގޮތް ކިޔައިދޭނެ އެއްވެސް ބޭފުޅެއް ނެތް: މެންބަރު ނާޒިލް
މުޅި ރާއްޖޭގެ ތަރައްގީގެ މަޝްރޫއުތައް ވަނީ ހުއްޓިފައި
ހުކުރު ދުވަހުގެ ރޭ އެމްޑީޕީން ފުވައްމުލައް ސިޓީގައި ބޭއްވި ޖަލްސާގައި ހިތަދޫ ދެކުނު ދާއިރާގެ މެންބަރު އިބްރާހިމް ނާޒިލް ވާހަކަދައްކަވަނީ
ސަރުކާރުން ބަޖެޓުގެ 95 ޕަސެންޓު ހުސްކޮށްލާ ކަމަށާއި، އެ ފައިސާއަށް ވާ ގޮތް ކިޔައިދޭނެ އެއްވެސް ބޭފުޅެއް ނެތް ކަމަށް އެމްޑީޕީގެ ޕާލަމަންޓްރީ ގްރޫޕް (ޕީޖީ) ލީޑަރު، ހިތަދޫ ދެކުނު ދާއިރާގެ މެންބަރު އިބްރާހިމް ނާޒިލް ވިދާޅުވެއްޖެ އެވެ.
ހުކުރު ދުވަހުގެ ރޭ އެމްޑީޕީން ފުވައްމުލައް ސިޓީގައި ބޭއްވި ޖަލްސާގައި މެންބަރު ނާޒިލް ވިދާޅުވީ މުޅި ރާއްޖޭގެ ތަރައްގީގެ މަޝްރޫއުތައް ހުއްޓިފައިވާ ކަމަށާއި، ފުއްވައްމުލައް ސިޓީގެ ތަރައްގީ ވެސް ހުއްޓިފައިވާ ކަމަށެވެ. މިސަރުކާރާއެކު، މިހާތަނަށް މިސިޓީގައި ވެސް ތަރައްގީއަށް އެއްވެސް ކަމެއް ކޮށްފައިނުވާ ކަމަށާއި، ކުރީ ސަރުކާރުގައި ކުރަމުން އައި ކަންކަން ވެސް ހުއްޓިފައިވާ ކަމަށް މެންބަރު ނާޒިލް ވިދާޅުވިއެވެ.
ބަޖެޓަށް އިޝާރާތް ކުރައްވައި މެންބަރު ނާޒިލް ވިދާޅުވީ ފައިސާއަށް ވާ ގޮތް ނޭނގޭ ކަމަށާއި، 95 އިންސައްތަ ސަރުކާރުން ބޭނުންކޮށް ހުސްކުރާ ކަމަށާއި، ފައިސާއަށް ވާނުވާ ކިޔައިދޭނެ ބޭފުޅަކު ނެތް ކަމަށެވެ. އަދި ބާކީ 5 ޕަސެންޓަކީ ކައުންސިލްތަކުގެ ފައިސާ ކަމަށާއި، އޭގައި ސަރުކާރަށް އަތް ނުލެވޭތީ އެ 5 ޕަސެންޓު ވެސް ހޯދުމަށް މިސަރުކާރުން މަސައްކަތް ކުރާ ކަމަށް އޭނާ ވިދާޅުވިއެވެ.
ކިހިނެތްތޯ ފައިސާއަށް މިވަނީ. މިވާހަކަ އަޅުގަނޑުމެންނަށް ސާފުކޮށްދެވޭނެ ވަޒީރެއް ވެސް ނެތް. ރައީސުލްޖުމްހޫރިއްޔާ އޮފީހުގެ ބޭފުޅެއް ވެސް ނެތް. އަދި އެހެން ބޭފުޅެއް ވެސް ނެތް އެފައިސާއަށް ވަނީ ކިހިނެތް ކަމެއް 95 ޕަސެންޓް ބަޖެޓުގެ 95 އަށް ވަނީ ކިހިނެތް ކަން ކިޔައިދޭނެ މީހަކު ނެތް. ދެން ބާކީ އޮންނަ 5 ޕަސެންޓް އެ ހުސް ނުކުރެވޭ މި ކައުންސިލަރުންނަށް. އެ ހުސްނުކުރެވޭތީ ކައުންސިލްތަކުގެ ސައިޒް ކުޑަކުރަން އެ ބަޖެޓު އަނބުރާ ސަރުކާރުގައި އިންނަ އިދާރާއަކަށް ސަރުކާރުގެ އިދާރާއަކަށް އެ ބަޖެޓު ގެންނަން މި މަސައްކަތް ކުރަނީ. އެއްކަލަ 5 ޕަސެންޓާ ނުކުޅެވިގެން. 95 ޕަސެންޓް އެބަ ހުސްކޮށްލާ ސަރުކާރު. 5 ޕަސެންޓް ކައުންސިލަށް ހުސް ނުކުރެވޭތީ އެ ހުސްކުރަން ވެގެން އެބޭފުޅުން މިހާރު މިމަސައްކަތް ކުރަނީ.އެމްޑީޕީގެ ޕާލަމަންޓްރީ ގްރޫޕްގެ ލީޑަރު، ހިތަދޫ ދެކުނު ދާއިރާގެ މެންބަރު އިބްރާހިމް ނާޒިލް
މެންބަރު ނާޒިލް ވިދާޅުވީ ރައީސް ޑރ.މުހައްމަދު މުއިއްޒު ބޭނުންފުޅުވާ ގޮތަށް ރައްޔިތުންގެ މަޖިލިސް މެދުވެރިކޮށް، ލާމަރުކަޒީ ނިޒާމަށް ގެންނަ ބަދަލަކީ ބަޖެޓުގައި ކައުންސިލްތަކަށް ކަނޑައަޅާފައިވާ 5 ޕަސެންޓްގެ ފައިސާގައި އަތް ނުލެވިގެން ގެންނަ ބަދަލެއް ކަމަށެވެ.
ލާމަރުކަޒީ ބާބަށް އެގެންނަ ބަދަލާއި، ކައުންސިލްތަކުގެ ސައިޒް ކުޑަ ކުރަން ގެންނަ ބަދަލަކީ ހަގީގަތުގައި އެއްކަލަ 5 ޕަސެންޓްގެ ފައިސާ ކޮޅުގައި އަތް ނުލެވިގެން އެބޭފުޅުން އެކުރާ ކަންތައްތަކެއް. އަޅުގަނޑު ދަންނަވާނީ ރައްޔިތުން މިގެންނަ ބަދަލުތަކަށް އާ ބަސް ބުނެގެން ނުވާނޭ. ރައްޔިތުން އާ ބަސް ބުނެފިއްޔާމުން ކުރިއަށް އޮތް އިންތިޚާބުތައް އަޅުގަނޑުމެންނާ ހިސާބުން ގެއްލި ހިނގައިދާނޭ. އަޅުގަނޑުމެން މިގެނައި ބަދަލާއެކު، ނިޒާމަށް ގެނައި ބަދަލާއެކު، ރައްޔިތުން ބޭނުންވާ ގޮތަކަށް މި ގާނޫނު އަސާސީގެ ތެރެއިން 2008 ވަނަ އަހަރު އަޅުގަނޑުމެންނަށް ފެށިގެން އައި ސަރުކާރުތަކުން ޚާއްސަކޮށް އެމްޑީޕީގެ 2008 ގެ ސަރުކާރާ އެމްޑީޕީގެ 2018 ގެ ސަރުކާރާ އަޅުގަނޑުމެންނަށް މިކުރެވުނު ތަޖުރިބާތައް. ޚާއްސަކޮށް ތަރައްގީގެ މަޝްރޫއުތައް އަޅުގަނޑުމެން އެނބުރި އަނެއްކާވެސް ބޭނުމިއްޔާ އަޅުގަނޑުމެން ޖެހޭނެ މިސަރުކާރަށް ބޮޑުތަނުން ނޫނެކޭ ބުނަން.އެމްޑީޕީގެ ޕާލަމަންޓްރީ ގްރޫޕްގެ ލީޑަރު، ހިތަދޫ ދެކުނު ދާއިރާގެ މެންބަރު އިބްރާހިމް ނާޒިލް
މެންބަރު ނާޒިލް ވިދާޅުވީ ރައްޔިތުން އެދޭ ތަރައްގީ ބޭނުންވާނަމަ މިސަރުކާރަށް ނޫނެކޭ ބުނަންޖެހޭ ކަމަށެވެ. އަދި ކުރިއަށް އޮތް ކައުންސިލް އިންތިޚާބުގައި އެމަންޒަރު ސަރުކާރަށް ދައްކަން ޖެހޭ ކަމަށް އޭނާ ވިދާޅުވިއެވެ.
