ކެމްޕެއިންގައި މެންބަރުންގެ މުސާރަ ބޮޑުކަމަށް ވިދާޅުވި ޝުޖާއު މިހާރު ވިދާޅުވަނީ 80،000 ރުފިޔާގެ މުސާރަ ކުޑަ ކަމަށް
މެންބަރުންގެ އަސާސީ މުސާރައަކީ 42500، ލިވިންގް އެލަވަންސާއި ކޮމިޓީ އެލަވަންސާއެކު 82500 ރުފިޔާ ލިބޭ
ބާރަށު ދާއިރާގެ ޕީއެންސީ މެންބަރު އިބްރާހިމް ޝުޖާއު
ރައްޔިތުންގެ މަޖިލީހުގެ މެންބަރުންގެ މުސާރަ ބޮޑު ކަމަށާއި، ކުޑަކުރަންޖެހޭ ކަމަށް ކެމްޕޭނުގައި އަޑަށް ބާރުލާ އެންމެ ގިނައިން އެ ވާހަކަ ދެއްކެވި ރައްޔިތުންގެ މަޖިލީހުގެ ބާރަށު ދާއިރާގެ ޕީއެންސީގެ މެންބަރު އިބްރާހިމް ޝުޖާއު މެންބަރުންނަށް ލިބޭ 80،000 ރުފިޔާގެ މުސާރަ އަކީ ކުޑަ މުސާރައެއް ކަމަށް ވިދާޅުވެއްޖެއެވެ.
ބާރަށު ދާއިރާގެ މެންބަރު އިބްރާހީމް ޝުޖާއު ހުށަހަޅުއްވާފައިވާ، ރައްޔިތުންގެ މަޖިލީހުންގެ މެންބަރުންގެ އަދަދު ކޮންމެ ފަސް އަހަރަކުން އިތުރުވަމުންދާދިއުމާ މެދު 20 ވަނަ ރައްޔިތުންގެ މަޖިލީހުގެ މެންބަރުން ދެކެވަޑައިގަންނަވާ ގޮތެއް ދެނެގަތުމަށް ޓަކައި ހުށަހަޅުއްވާފައިވާ ގަރާރަށް ބަހުސްކުރައްވަމުން މެންބަރު ޝުޖާއު ވިދާޅުވީ ރައްޔިތުންގެ މަޖިލީހަށް އައުމަށް ޓަކައި މަސައްކަތްކުރާ ގިނަ މީހުން ރައްޔިތުންގެ މަޖިލީހުގެ މެންބަރުންގެ މުސާރައާ ގުޅޭގޮތުން ޝަކުވާކުރައްވާނެ ކަމަށެވެ.
މަޖިލީހުގެ މެންބަރުންގެ މުސާރަ ކުޑަކަމަށް ވިދާޅުވެ މެންބަރު ސުޖާއު ވިދާޅުވީ މަޖިލީހުގެ މެންބަރުންނަށް ލިބެނީ 42500 ރުފިޔާ ކަމަށާއި، ސިޓީ ކައުންސިލަރަކަށް ލިބޭ 30000 ރުފިޔާ ކަމަށެވެ. މީގެ އިތުރުން މުސާރައިގެ އިތުރުން އެލަވަންސެއްގެ ގޮތުގައި ލިބެނީ 20000 ރުފިޔާ ކަމަށާއި، އެއީ ދުނިޔޭގެ ކޮންމެ ގައުމެއްގެ ވެސް ސެކަންޑް ހޯމް އެލަވަންސްގެ ގޮތުގައި ލިބިވަޑައިގަންނަވާ އެލަވަންސް ކަމަށް ސުޖާއު ވިދާޅުވިއެވެ.
ޝުޖާއު ވިދާޅުވީ މެންބަރުންނަށް ލިބިވަޑައިގަންނަވާ 42،500 ރުފިޔާއާއި 20،000 ރުފިޔާގެ ލިވިންގ އެލަވަންސް އަދި ކޮމިޓީ އެލަވަންސްގެ ގޮތުގައި ލިބޭ 20،000 ރުފިޔާއާއެކު މެންބަރަކަށް ލިބިވަޑައިގަންނަވާ 82،500 ރުފިޔާ ކުޑަ ކަމަށެވެ.
ޝުޖާއު ވިދާޅުވީ ނޫސްވެރިން ވެސް މަޖިލީހަށް އިންތިހާބުވުމުގެ ކުރިން ދައްކަނީ މަޖިލީހުގެ މެންބަރުންގެ މުސާރަ ކުޑަ ވާހަކަ ކަމަށާއި، މަޖިލީހަށް ހޮވިވަޑައިގަތީމައި އެވާހަކަ ނުދައްކާ ކަމަށާއި، އެއީ ހޭދަ ބޮޑުވީމަ ކަމަށެވެ.
މެންބަރު ޝުޖާއު ވިދާޅުވީ މުސާރައާއި އިނާޔަތްތަކަށް ހަމަޖެހޭ އުސޫލުން، ރައްޔިތުން ބަލައިގަންނަ ގޮތަށް ގެނެވެން ޖެހޭ ކަމަށެވެ.
މަޖިލިސް އިންތިހާބުގެ ކެމްޕޭންގެ ތެރެއިން ބޭއްވި ބަހުސްގައި ޝުޖާއު އޭރު ވިދާޅުވެފައިވަނީ މަޖިލީހުގެ މެންބަރުންގެ މުސާރަ ކުޑަކުރުމަށް ވެސް ވަކާލާތު ކުރާނީ އޭނާ ކަމަށާއި އެސަބަބަށްޓަކައި އޭނާ އިހުތިޔާރުކުރަންޖެހޭ ކަމަށެވެ.
ރައްޔިތުންގެ މަޖިލީހުގެ މެންބަރަކަށް އަސާސީ މުސާރައިގެ ގޮތުގައި 42،500 ރުފިޔާއާއި 20،000 ރުފިޔާގެ ލިވިންގ އެލަވަންސް އަދި ކޮމިޓީ އެލަވަންސްގެ ގޮތުގައި ލިބޭ 20،000 ރުފިޔާއާއެކު މެންބަރަކަށް 82،500 ރުފިޔާ ލިބިވަޑައިގަންނަވައެވެ.
