ޢަލީ ވަހީދު ދިރިއުޅުއްވާ ތަނެއް ހޯދައިގެން ކޯޓަށް ހާޒިރުކުރުމަކީ ކޯޓުން ކުރަންޖެހޭކަމެއް - ޕީޖީ
ޕީޖީ އޮފީހުން މޯލްޑިވްސް ޕޮލިސް ސަރވިސްއަށް އަލީ ވަހީދު ދިރިއުޅުއްވާ ތަނެއް ހޯދުމަށް ވަނީ އެދިފައި
ކުރީގެ ޓޫރިޒަމް މިނިސްޓަރ އަލީ ވަހީދު
ޢަލީ ވަހީދު ދިރިއުޅޭތަނެއް ހޯދައިގެން ކޯޓަށް ހާޒިރުކުރުމަކީ ކޯޓުން ކުރަންޖެހޭކަމެއްކަމަށް ޕްރޮސެކިއުޓަރ ޖެނެރަލްގެ އޮފީހުން ބުނެފިއެވެ.
ޕީޖީ އޮފީހުން މިހެން ބުނެފައި މިވަނީ، ކުރީގެ ޓޫރިޒަމް މިނިސްޓަރު އަލީ ވަހީދު ދިރިއުޅުއްވާ ތަނެއް ހޯދުމަށް ދައުލަތަށް ދިން މުއްދަތުގައި އެކަން އެނގިފައިނުވާ ކަމަށް ހައި ކޯޓަށް އަންގައިފައިވަނިކޮށެވެ. ކޯޓުގެ އެންގުމާއި ގުޅޭގޮތުން ރާއްޖެ އެމްވީއާއި ވާހަކަދައްކަމުން ޕީޖީ އޮފީހުން ވަނީ އަލީ ވަހީދުގެ ޕާސްޕޯޓު ދޫކޮށްލި މައްސަލަ ޕީޖީ އޮފީހުން، ހައި ކޯޓުގައި އިސްތިއުނާފުކުރުމުން، މިދިޔަ ހޯމަ ދުވަހު ބޭއްވި އިސްތިއުނާފު ޝަރީއަތުގައި އަލީ ވަހީދު ދިރިއުޅުއްވާ ތަނެއް ހޯދުމަށް ކޯޓުން އަންގާފައިކަމަށެވެ.
މިގޮތައް އެންގުމުން ޕީޖީ އޮފީހުން މޯލްޑިވްސް ޕޮލިސް ސަރވިސްއަށް އަލީ ވަހީދު ދިރިއުޅުއްވާ ތަނެއް ހޯދުމަށް އެދިފައިވާކަމަށް ވިދާޅުވިއެވެ. ކޯޓުން އެޑްރެސް ހޯދުމަށް އޭޕްރީލް 6 ވަނަ ދުވަހުގެ މެންދުރު 02:00އާއި ހަމައަށް މުޙުލަތު ދީފައިވާއިރު، މި މުޙުލަތުގެ ތެރޭގައި ފުލުހުންނަށް އެޑްރެސް ހޯދިފައިނުވާއިރު، މިކަން ޕީޖީއިން ހައި ކޯޓަށް އަންގާފައިވާކަމަށް ވަނީ ބުނެފައެވެ. ޕީޖީއިން ވަނީ މިވަގުތު ވެސް ޢަލީ ވަހީދު ދިރިއުޅޭތަނެއް ހޯދުމުުގެ މަސައްކަތް ކުރަމުންދާކަމަށް ބުނެފައެވެ. އެހެންނަމަވެސް، ޕީޖީ އޮފީހުން ވަނީ ޖިނާޢީ މައްސަލަތަކުގައި ދަޢުވާ ލިބޭ މީހުން ކޯޓަށް ހާޒިރުކުރުމަކީ ކޯޓުން ކުރަންޖެހޭކަމެއްކަމަށާއި، މިކަން ޤާނޫނުގައި ވެސް ބަޔާންކޮށްފައިވާކަމަށް ބުނެފައެވެ.
ހޯމަ ދުވަހު ހައިކޯޓުގައި ކުރިއަށްގެންދިޔަ އަޑުއެހުމުގައި އަލީ ވަހީދު ބައިވެރިވެވަޑައިގެންފައި ނުވާއިރު، މައްސަލަ ކުރިއަށް ގެންދެވިދާނެތޯ ވަނީ މަޝްވަރާކޮށްފައެވެ. ދައުލަތުން ދޭ ޖަވާބަކަށް ބެލުމަށް ފަހު، އެ މައްސަލަ ކުރިއަށް ގެންދިއުމާ މެދު ގޮތެއް ނިންމާނެ ކަމަށް އެ ދުވަހުގެ ޝަރީއަތުގައި މައްސަލަ ބައްލަވާ ބެންޗުން ވިދާޅުވިއެވެ. ނަމަވެސް ދައުލަތުން އެދިފައިވަނީ ޣައިރު ހާޒިރުގައި މައްސަލަ ކުރިއަށް ގެންދިއުމަށެވެ.
އަލީ ވަހީދުގެ ޕާސްޕޯޓު ހިފެހެއްޓުމަށް ނެރުނު އަމުރު ރަނގަޅުކަމަށް ހައިކޯޓުން ނިންމައިފިނަމަ، އޭނާގެ ޕާސްޕޯޓް ކެންސަލްކުރާނެ ކަމަށް ޕީޖީ އޮފީހުގެ އޮފިޝަލަކު ވަނީ "ރާއްޖެއެމްވީ" އަށް މައުލޫމާތުދީފައެވެ. އަލީ ވަހީދު ރާއްޖެއިން ބޭރަށް ފުރާވަޑައިގެންފައިވަނީ ޕާސްޕޯޓް ދޫކުރުމަށް ކްރިމިނަލް ކޯޓުން އަމުރު ނެރުމުގެ އެއް ދުވަސް ކުރިންނެވެ. އެގޮތުން ފެބްރުއަރީ މަހުގެ ނުވަވަނަ ދުވަހުގެ ރޭ 11:30 ހާއިރު އަލީ ވަހީދު ފުރާވަޑައިގެންނެވިއިރު، ފުރަތަމަ ވަޑައިގެންނެވީ ވެސް ތުރުކީގެ ވެރިރަށް އިސްތަންބޫލަށެވެ.
ޖިނާޢީ ބޮޑުކުށެއްގެ ދަޢުވާ އުފުލާފައިވާ މީހެއްނަމަ ނުވަތަ އެފަދަ ކުށެއްގެ ތަޙުޤީޤެއް ހިނގަމުންދާ މީހެއްނަމަ، އެމީހެއްގެ ޕާސްޕޯޓް ހިފަހައްޓާ ހާލަތުގައި ދަތުރުކުރުމުގެ ވަގުތީ ލިޔުމެއްގައި ނުވަތަ ބޭރަށް ދަތުރު ނުކުރެވޭނެ ގޮތަށް އުސޫލު ބަދަލުކުުރުމަށް މަޖިލީހުގެ ޖުޑިޝަރީ ކޮމިޓީން ވެސް ވަނީ ހުށަހަޅާފައެވެ.
ކުރީގެ މިނިސްޓަރ އޮފް ޓުއަރިޒަމް އަލީ ވަހީދުގެ މައްޗަށް ކްރިމިނަލް ކޯޓުން ނެރުނު ފުރުން މަނާކުރުމުގެ އަމުރު ބާތިލްކޮށްފައިވާ މައްސަލައާ ގުޅިގެން ރައްޔިތުންގެ މަޖްލީހުގެ 4 މެންބަރުން ސޮއިކުރައްވައި ހުށަހަޅުއްވާފައިވާ މައްސަލަ ޖުޑިޝަރީ ކޮމިޓީން ދިރާސާކޮށް ނިންމިގޮތުގެ ރިޕޯޓްގައި ބުނަނީ ޖިނާއީ ބޮޑު ކުށެއްގެ ދަޢުވާއެއް އުފުލިފައިވާ މީހެއްނަމަ ނުވަތަ އެފަދަ ކުށެއްގެ ތަޙުޤީޤު ހިނގަމުންދާ މީހެއްނަމަ އެމީހެއްގެ ޕާސްޕޯޓް ހިފަހައްޓާ ހާލަތުގައި ރާއްޖެއިން ބޭރަށް ފުރުމަށް ހުއްދަ ދޭންޖެހޭ ސަބަބުގެ އިތުރަށް މައްސަލައިގެ ބާވަތަށާއި އަދި މައްސަލައިގެ ވަށައިގެންވާ އެންމެހައި ކަންކަމަށް އެންމެ ފުޅާމިނެއްގައި ރިޢާޔަތްކުރުމަށް ހުށަހަޅާކަމަށެވެ.
