ރަމަޟާން މަހު މަޖިލީހުގެ ޖަލްސާތައް ފަށާނީ ހެނދުނު 10:30ގައި
7 އެޕްރީލު 2021 | ބުދަ 06:53ރަމަޟާން މަހު ޖަލްސާތައް ކުރިއަށްދާނީ 10:30ން 12 ށް އަދި 1ން 2ށް
ރައްޔިތުންގެ މަޖިލީހުގެ ޖަލްސާގެ ތެރެއިން
ކުރިޔަށް އޮތް ރަމަޟާން މަހު ރައްޔިތުންގެ މަޖިލީހުގެ ޖަލްސާތައް ފަށާނީ ހެނދުނު 10:30ގައި ކަމަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެއެވެ.
ރަމަޟާން މަހުގެ ކުރިން ބާއްވާ އެންމެ ފަހު ޖަލްސާ ބުދަ ދުވަހު ކުރިޔަށްދާއިރު ރައީސް ނަޝީދު ވިދާޅުވީ މަޖިލީހުގެ ގަވާއިދާ އެއްގޮތަށް ޖަލްސާތައް ކުރިޔަށްދާނީ 10:30ން 12:00ށް ކަމަށެވެ. އެއަށްފަހު 1 ގަޑިއިރުގެ ހުސް ވަގުތުކޮޅަކަށްފަހު 1ން ފެށިގެން 2 ޖަހަންދެން ޖަލްސާތައް ކުރިޔަށްދާނެއެވެ.
ޖަލްސާތައް ކުރިޔަށްދާ ވަގުތު ކުޑަ ނަމަވެސް މަޖިލީހުގެ އެހެން މަސައްކަތްތައް ކުރިޔެކޭ އެއްގޮތަށް ދާނެކަމަށް ރައީސް ނަޝީދު ވިދާޅުވިއެވެ. އެގޮތުން ކޮމިޓީތަކުގެ މަސައްކަތްތައް ކުރިޔެކޭ އެއްގޮތަށް ކުރިޔަށްދާނެ ކަމަށްވެސް ވިދާޅުވިއެވެ.
ރައްޔިތުންގެ މަޖިލީހުގެ ފުރަތަމަ ދައުރުގެ ޖަލްސާތައް އޭޕްރީލް މަސް ނިމެންދެން ކުރިޔަށްދާނެއެވެ. އެހެންކަމުން މިއަހަރުގެ ފުރަތަމަ ދައުރުގެ ޖަލްސާތައް ރަމަޟާން މަހުގެ ވަކި ހިސާބަކަށް ކުރިޔަށްދާނެއެވެ.
