ގޮންޖެހުންތަކެއް ހުރިނަމަވެސް އަމާޒަކީ މާލެއަށް ބަރޯސާވުން ކުޑަކޮށް އަތޮޅުތެރޭގެ ސިއްހީ ނިޒާމް ވަރުގަދަ ކުރުން - މިނިސްޓަރ
އެމީހަކު ހުރި ކޮންމެ ތަނަކުން ފެންވަރު ރަނގަޅު ސިއްހީ ޚިދުމަތް ދިނުމަކީ މަގްސަދެއް
އަހްމަދު ނަސީމް، މިނިސްޓަރ އޮފް ހެލްތް
ޚަރަދުބޮޑުވެފައި އުނދަގޫ ކަމަކަށްވިޔަސް ސަރުކާރުގެ އަމާޒަކީ މާލެއާ ރާއްޖޭގެ އެހެން ސަރަހައްދުތަކުގައި ދިރިއުޅޭ ރައްޔިތުންނަށް ލިބެންހުރި ސިއްހީ ޚިދުމަތްތަކުގެ ތަފާތު ކުޑަކޮށް ސިއްހީ ފަރުވާއަށް މާލެއަށް ބަރޯސާވާންޖެހޭ މިންވަރު ދައްކުރުން ކަމަށް ހެލްތް މިނިސްޓަރ އަހުމަދު ނަސީމް ވިދާޅުވެއްޖެއެވެ.
ދުނިޔޭގެ ސިއްހަތު ދުވަހުގެ މުނާސަބަތުގައި ދެއްވި ޚިތާބުގައި ހެލްތް މިނިސްޓަރ ނަސީމް ވިދާޅުވީ ހަމަހަމަ ކަމާއި އިންސާފު ގާއިމު ކުރުމުގެ ފަލްސަފާއަކީ އަދުގެ ސަރުކާރުގެ ސިޔާސަތުތަކާއި ތަރައްގީގެ އެންމެހާ މަސައްކަތްތައް ވުޖޫދުވެ ބައްޓަން ކުރުމަށް އެންމެބޮޑަށް ބަރޯސާވާ މަސްދަރު ކަމަށެވެ. އަދި ތަރައްގީގެ އެންމެހާ މަޝްރޫއުތައް އަދި ވަކިން ޚާއްސަކޮށް ސިއްހީ ފަރުވާގެ ނިޒާމާއި ސިއްހީ ޚިދުމަތްތައް، ޖަޒީރާވަންތަ މިގައުމަށް އެންމެ އެކަށީގެންވާ ގޮތަށް ލާމަރުކަޒު ކުރެވިގެން ރޭވިފައި މިވަނީ، އެމީހަކު ހުރި ކޮންމެ ތަނަކުން ފެންވަރު ރަނގަޅު ސިއްހީ ޚިދުމަތް ހަމަހަމަ ކަމާއިއެކު ދިނުމުގެ މުހިއްމު މަގުސަދުގައި ސިއްހީ ފަރުވާގެ އަސާސީ ހައްގު ކަށަވަރުކުރުމަށް ކަމަށެވެ.
ސަރުކާރުން މިހާތަނަށް މި ވިސްނުމުގައި ސިއްހީ ޚިދުމަތުގެ ނިޒާމުތަކަށް ގެނެސްފައިވާ ބަދަލުތަކަށް އަދި ވަކިން ޚާއްސަކޮށް އަތޮޅުތެރެއަށް އަމާޒުކުރެވިގެން ރޭވިފައިވާ ސިއްހީ ފަރުވާގެ ބޮޑެތި މަޝްރޫއުތަކަކީ، މިހާތަނަށް ރާއްޖެ މިދާއިރާގައި ދެކެފައިނުވާފަދަ އިންގިލާބީ ކުރިއެރުންތައް ގެނުވައިދޭނޭ ކަންކަން ކަމަށެވެ. ގުދުރަތީ ގޮތުން ދިވެހިރާއްޖެ އުފެދިފައިވާ ގޮތަށް ބަލާއިރު މީހުން ދިރިއުޅޭ ހުރިހާ ރަށެއްގައި ފެންވަރު ރަނގަޅު ޚިދުމަތް ދިނުމަށް ގިނަ ގޮންޖެހުންތަކާ ކުރިމަތިލާންޖެހޭ ކަމަށް މިނިސްޓަރ ވިދާޅުވިއެވެ.
މިނިސްޓަރ ވިދާޅުވީ ރައްޔިތުންނާއި ގާތުން ސިއްހީ ޚިދުމަތްދީ ސިއްހީ ރައްކާތެރިކަން ދުރާލާ ކަށަވަރު ކުރުމުގެ ތެރެއިން މިހާރާއި ކުރިމަގުގެ ޖީލުތަކުގެ ސިއްހީ ދުޅަހެޔޮކަން ކަށަވަރުކުރުމަށް، ސިއްހީ އިބްތިދާއީ ޚިދުމަތް (ޕްރައިމަރީ ހެލްތުކެއަރ) ގެ އައު މަޝްރޫއެއް މުޅި ގައުމުގައި ފެށިގެންދާނެ ކަމަށެވެ. ޕްރައިމަރީ ހެލްތު ކެއަރގެ ވިސްނުމަކީ، ހެލްތު ކެއަރ ވޯރކަރުން ކުރީ ސަފުގައި ތިބެގެން އަދި އެހެނިހެން ހެލްތު ޕްރޮފެޝަނަލުންގެވެސް ދައުރު ފުޅާކޮށް ޓީމެއްގެ ގޮތުގައި، ރަށު ފެންވަރުގައި، ރައްޔިތުންނާއި ގާތުން ޚިދުމަތްތައް ފޯރުކޮށްދީ، ބަލިވުމުން ސިއްހީ މަރުކަޒަށް އައުމުން ފަރުވާ ދިނުމަށްވުރެ، ބަލިތަކުން ރައްކާތެރިވުމަށް ދުރާލާ މަސައްކަތް ކޮށް، ރައްޔިތުންގެ ޖިސްމާނީ، ނަފުސާނީ އަދި އިޖްތިމާއީ ދުޅަހެޔޮކަން ކަށަވަރުކުރުން ކަމަށެވެ.
ވެކްސިން ޕްރޮގްރާމް އިތުރަށް ހަރުދަނާކޮށް ކޮރޯނާ ވައިރަސް އާއި އަދި މިނޫންވެސް ޤައުމީ ވެކްސިން ޕަރޮގްރާމްގެ ތެރެއިން ދެވޭ ވެކްސިންތައް ކަށަވަރުކުރެވޭނެ ކަމަށް މިނިސްޓަރ ވިދާޅުވިއެވެ. އަދި ސިއްހީ ކުއްލި ނުރައްކަލެއް އަދި މިފަދަ އެހެން ކާރިސާއަކަށް ތައްޔާރުވުމުގެ ގޮތުން، ދާއިމީ ކަރަންޓީނު ފެސިލިޓީތައް ގާއިމު ކުރުމާއި، މިހާރު ރާއްޖޭގެ އެކި ހިސާބުގައި ގާއިމު ކުރެވިފައިވާ ކޮވިޑް ފެސިލިޓީތައް ކުރިމަގުގައި ވެސް ބޭނުންކުރެވޭނެހެން ބައްޓަންކޮށް ދެމެހެއްޓޭނެ ކަމަށެވެ.
މި މުނާސަބު ދުވަހުގައި އެންމެ ޚާއްސަ ގޮތެއްގައި، އަދި ފަޚުރުވެރިކަމާއިއެކު ފާހަގަކޮށް އެފަރާތްތަކަށް ހިތުގެ ފުންމިނުން، ކޮވިޑްގެ މަސައްކަތުގައި ޙަރަކާތްތެރިވެފައިވާ އަދި މިހާރުވެސް ހަރަކާތްތެރިވަމުންދާ ސިއްހީ ޚިދުމަތްތެރިންނާ، ވޮލަންޓިއަރުންނާ އަދި ޖުމްލަގޮތެއްގައި ފްރޮންޓްލައިންގައި މަސައްކަތް ކުރާ އެންމެހާ ފަރާތްތަކަށް މިނިސްޓަރ ވަނީ ޝުކުރު އަދާކުރައްވާފައެވެ. އަދި ސަލާމަތީ ބާރުތަކާއި، އެއަރޕޯޓްތަކާ ބޯޑަރ ކޮންޓްރޯލް މަސައްކަތާއި ދަތުރުފަތުރާއި ފަތުރުވެރިކަމުގެ ދާއިރާގައި ޚިދުމަތްދެއްވާ މުއައްސަސާތަކާއި ކުންފުނިތަކާއި އެންމެހާ މުވައްޒަފުންނަށް ވެސް ޝުކުރު އަދާކުރެއްވިއެވެ. މިނިސްޓަރ ވިދާޅުވީ އެއީ ކޮވިޑްގެ ބަތަލުންނާއި ބަތަލާއިން ކަމަށާއި، ޤައުމީ ރޫޙުގައި އެފަރާތްތަކުން އެކުރައްވަނީ އަގުހުރި ޚިދުމަތެއް ކަމަށެވެ.
މިނިސްޓަރުގެ ޚިތާބު ނިންމަވާލައްވަމުން ވިދާޅުވީ ފެންވަރު ރަނގަޅު ޞިއްޙީ ޚިދުމަތްތައް ހަމަހަމަކަމާއިއެކު ގާތުން ފޯރުވައިދީ ދުޅަހެޔޮކަން ކަށަވަރުކުރުމަށް ސަރުކާރުން ކުރާ އުއްމީދީ މަސައްކަތްތަކުގެ މަންފާ ރައްޔިތުންނަށް ލިބެމުން ދާނެކަމަށެވެ. އަދި އިލްތިމާސަކީ ސިއްހީ ދުޅަހެޔޮކަމާމެދު އަބަދުވެސް ފަރުވާތެރިވެ ކޮރޯނާ ވައިރަސްގެ މިހާލަތުން އިބްރަތް ލިބިގަނެ، ސިއްހަތަކީ ހާސް ނިޢުމަތެއް ކަމަށް ދެކި އެ ނިޢުމަތަށް ޝުކުރުވެރިވެ ދުޅަހެޔޮ ދިރިއުޅުމަކަށް އަހުލުވެރިވުން ކަމަށެވެ.
