ރާއްޖެއިން ބޭރުން ވެކްސިންގެ ފުރަތަމަ ޑޯޒް ޖަހާފައިވާ މީހުންނަށް ދެވަނަ ޑޯޒް ރާއްޖޭގައި ޖެހޭނެ އިންތިޒާމު ހަމަޖައްސައިފި
މިފަރާތްތަކުން ވެކްސިން ޖެހިކަމުގެ ލިޔުން އަދި އައި.ޑީ ކާޑު ނުވަތަ ޕާސްޕޯޓު ކޮޕީއެއް އީމެއިލްކުރުމުން އެއިންތިޒާމު ހަމަޖެހޭނެ
ރާއްޖޭގައި ކުރިޔަށްދާ ކޮވިޑް-19 ވެކްސިންޖެހުމުގެ ޕްރޮގްރާމްގެ ތެރެއިން
ދިވެހިރާއްޖޭގައި ދިރިއުޅޭ ފަރާތްތަކުގެ ތެރެއިން ރާއްޖެއިން ބޭރުން ކޮވިޝީލްޑް، ސިނޮފާރމް އަދި ފައިޒަރ ވެކްސިންގެ ފުރަތަމަ ޑޯޒް ޖަހާފައިވާ، ފަރާތްތަކަށް ދެވަނަ ޑޯޒް ރާއްޖޭގައި ޖެހުމުގެ އިންތިޒާމު ހަމަޖައްސައިދެވޭނެކަމަށް ހެލްތު ޕްރޮޓެކްޝަން އެޖެންސީ (އެޗްޕީއޭ)އިން ބުނެފިއެވެ.
އެޗްޕީއޭއިން ބުނީ މިފަރާތްތަކުން ވެކްސިން ޖެހިކަމުގެ ލިޔުން އަދި އައި.ޑީ ކާޑު ނުވަތަ ޕާސްޕޯޓު ކޮޕީ އެއް vaccine@health.gov.mv އީމެއިލްއަށް ފޮނުވުމަށް އެދޭކަމަށެވެ. އީމެއިލްގައި ނަން، އައި.ޑީ ކާޑު ނުވަތަ ޕާސްޕޯޓު ނަންބަރު، ގުޅޭނެ ނަންބަރު، ވެކްސިންގެ ބާވަތް އަދި ވެކްސިން ޖެހި ތާރިޚު ހިމަނަންވާނެކަމަށް އެޗްޕީއޭއިން ބުނެއެވެ.
ފެބްރުއަރީ މަހުގެ 1 ވަނަ ދުވަހުން ފެށިގެން ރާއްޖޭގައި ކޮވިޑް-19ން ދިފާއުވުމަށް ވެކްސިން ޖަހަމުން އަންނައިރު 251،139 މީހަކު ފުރަތަމަ ޑޯޒް އަދި 5،753 މީހަކު ދެވަނަ ޑޯޒް ޖަހާފައިވާކަމަށް އެޗްޕީއޭގެ އެންމެ ފަހުގެ ތަފާސްހިސާބުތަކުން ދައްކައެވެ. އެޗްޕީއޭއިން ބުނެފައިވަނީ ރާއްޖޭގެ އާބާދީގެ 57 އިންސައްތަ މީހުން ވަނީ ވެކްސިންގެ ފުރަތަމަ ޑޯޒް ޖަހާފައިކަމަށެވެ.
ރާއްޖޭގައި ޖަހަމުން އަންނަނީ ކޮވިޝީލްޑް ވެކްސިނާއި ސިނޮފަރމް އަދި ފައިޒަރ ވެކްސިނެވެ. މީގެތެރެއިން ފައިޒަރ ވެކްސިން ޖަހަމުން އަންނަނީ ކަނޑައަޅާފައިވާ ވަކިފަރާތްތަކަކަށް މާލޭގައި އެކަންޏެވެ.
