މުއިއްޒުއަށް ކައުންސިލްދިނުމަކީ ޑްރެކިއުލާއަށް ބްލަޑްބޭންކު ދިނުން ކަހަލަ ކަމެއް: ނަޝީދު
6 އެޕްރީލު 2021 | އަންގާރަ 18:18މާލޭގެ ހިންގުން ސިޓީ ކައުންސިލާ ހަވާލުކޮށް އެކަން އެމްޑީޕީއަށް ދޭން އެންމެ ބޮޑަށް ބޭނުން ވަނީ މާލޭ ރައްޔިތުން
ރައީސް މުހައްމަދު ނަޝީދު
އިދިކޮޅު ޕީޕީއެމް ޕީއެންސީ ކޯލިޝަންގެ ފަރާތުން ކުރިއަށް އޮތް ލޯކަލް ކައުންސިލް އިންތިހާބުގައި މާލޭގެ މޭޔަރުކަމަށް ވާދަކުރައްވާ ކެންޑިޑޭޓް ޑރ. މުހައްމަދު މުއިއްޒުއަށް އެ މަގާމު ދިނުމަކީ ޑްރެކިއުލާއަކަށް ބްލަޑް ބޭންކު ދިނުން ކަހަލަކަމެއް ކަމަށް އެމްޑީޕީގެ ރައީސް މުހައްމަދު ނަޝީދު ވިދާޅުވެއްޖެއެވެ.
އެ ޕާޓީގެ ފަރާތުން ވާދަ ކުރައްވާ ކެންޑިޑޭޓް އަނަސް އަބްދުއްސަތާރުގެ ކެމްޕޭން ހަރަކާތްތަކުގެ ތެރެއިން މައްޗަންގޮޅީ މެދު ދާއިރާގެ ރައްޔިތުންނާއެކު ބޭއްވި ކަންމަތީ ބައްދަލުވުމުގައި ވާހަކަދައްކަވަމުން ރައީސް ނަޝީދު ވިދާޅުވީ މާލޭގެ ހިންގުން ސިޓީ ކައުންސިލްއާ ހަވާލުކޮށް އެކަން އެމްޑީޕީއަށް ދޭން އެންމެ ބޮޑަށް ބޭނުން ވަނީ މާލޭ ރައްޔިތުން ކަމަށެވެ. އިދިކޮޅު ވެރިކަމުގައި ސިޓީ ކައުންސިލްގެ ބާރު ކަނޑުވާލާ ހަދާލިގޮތް އެންމެނަށްވެސް ފެންނާނެކަން ފާހަގަކުރައްވާ ރައީސް ނަޝީދު ވިދާޅުވީ އިދިކޮޅުން ކުރިކަމަކީ އެތަނުގައި ތިބި ގޮނޑި މޭޒު ތަންތަނަށް އުކާ ކައުންސިލަރުންނަށް އެތަނަށް ނުވަދެވޭ ގޮތް ހަދާ އެތަން ކަފުން ކުރީ ކަމަށެވެ.
މިއަދު ނިކުމެ މިއުޅެނީ ލާމަރުކަޒީ ނިޒާމެއް ގެންނާށޭ ބުނެ ކިތަންމެ ވާހަކައެއް ދެއްކި ނަމަވެސް އެކަން ގަބޫލު ނުކުރެވޭކަމަށް ވިދާޅުވިއެވެ.
ރައީސް ނަޝީދު ވިދާޅުވީ މި ކެމްޕޭން ތެރޭގައި އެންޓި ކެމްޕޭންގެ ގޮތުގައި ސަރުކާރަށް ކަމެއްނުވާ ކަމަށްބުނެ ބައެއް މީހުން ވާހަކަދައްކަމުން އަންނަ ކަމަށެވެ. އެކަމަކު މި ސަރުކާރު ހޮވުނީ މާލެ ރައްޔިތުންނަށް ދެން އެއްވެސް އިތުރު ގޮތެއް ނެތި ކުރީގެ ރައީސް ޔާމީން ބޭރުކުރަން ބޭނުންވެފައި ތިބި ވަރުން ކަމަށާއި، އެކަމަށްޓަކާ ވަރަށް ބޮޑަށް ޝުކުރުވެރިވާ ކަމަށެވެ. އަދި މަޖިލިސް އިންތިހާބުގައިވެސް މާލެ ހުސްކޮށް އެމްޑީޕީއަށް ވޯޓުދީ އެމްޑީޕީގެ މެމްބަރުން ހޮވި ހޮވުމަށްވުރެ ބޮޑަށް ވަކި ޝުކުރުވެރިވެވޭނެ ކަމެއްވެސް ނެތްކަމަށް ރައީސް ނަޝީދު ވިދާޅުވިއެވެ. އެކަމަކު އަމާޒަކީ މާލެ ސިޓީގެ ކަންކަން އެންމެ ފުރިހަމައަށް ރަނގަޅުކުރުން ކަމަށާއި، އެކަމަށް ސިޓީ ކައުންސިލަކީވެސް އެމްޑީޕީގެ ތަނަކަށް ހަދަން ޖެހޭކަމަށް ރައީސް ނަޝީދު ވިދާޅުވިއެވެ.
ރައީސް ނަޝީދު ވިދާޅުވީ ލާމަރުކަޒީ ނިޒާމަކީ ހަމައެކަނި އަތޮޅުތެރެއަށް އޮތް ކަމެއް ނޫން ކަމަށެވެ. އެ ނިޒާމުގެ އެންމެ ފޮނި މީރުކަން މާލެއިންވެސް ފެންނާނެ ކަމަށާއި އެކަން ލިބޭނެކަމަށް ވިދާޅުވިއެވެ. އެގޮތުން މާލެ ވަރުގެ އަގުބޮޑު ރައުސުލްމާލެއް އޮތް ތަނެއް މުޅި ރާއްޖޭގައިވެސް ނެތްކަމަށާއި އެ ބޭނުންކޮށްގެން މުޅި ގައުމުވެސް ތަރައްގީ ކުރެވޭނެކަމަށް ވިދާޅުވިއެވެ.
އެ ހުރިހާ ވިސްނުމެއްވެސް ހުރީ އެމްޑީޕީގައި ކަމަށާއި އިދިކޮޅު ކޯލިޝަނަކީ ކަންކަން މަރުކަޒު ކުރުމުގައި މާހިރުން ކަމަށް ވިދާޅުވެ ކުރިއަށް އޮތް ލޯކަލް ކައުންސިލް އިންތިހާބުގައި އެމްޑީޕީއަށް ވޯޓު ދިނުމަށް އެމަނިކުފާނު ވަނީ ގޮވާލައްވާފައެވެ.
