ސޯޝަލް މީޑިއާގައި އިންޒާރުދިނުން މިހާރު މައްސަލައަކަށް ނުވެދާތަން ފެންނަ ކަމަށް ހިއުމަން ރައިޓްސް ކޮމިޝަން (އެޗްއާރްސީއެމް) ގެ ކުރީގެ ނައިބް ރައީސް އަހުމަދު ތޮލާލު ވިދާޅުވެއްޖެ އެވެ.
ރާއްޖެޓީވީގެ ސުންގަޑި ޕްރޮގްރާމަށް ދިން އިންޓަވިއުއެއްގައި ތޮލާލު ވިދާޅުވީ، ޔާމީން ރަޝީދު އަނިޔާވެރިގޮތަކަށް މަރާލާފައި ވާއިރު، އޭނާ އަށް ދިން އިންޒާރުތަކުގެ ވާހަކ ފުލުހަށް ހުށަހަޅާ ސޯޝަލް މީޑިއާގައި ހާމަކުރި ކަމަށާއި، އެހެންނަމަވެސް މިހާރު އެފަދަ އިންޒާރުތައް ސޯޝަލް މީޑިއާގައި ދިނުމުން އެއްވެސް މައްސަލައަކަށް ނަހަދާތަން ފެންނަ ކަމަށެވެ.
އެގޮތުން ތޮލާލު ވިދާޅުވީ، ސޯޝަލް މީޑިއާގައި އިންޒާރު ދޭ މީހުންގެ މައްސަލަތައް ނުބަލާ މިހާރަކަށް އައިސް ހަމައެކަނި ބަލަމުން އަންނަނީ ހިޔާލުފާޅުކުރާ މީހުންގެ މައްސަލަތައް ކަމަށާއި، އެމީހުންތައް ފުލުހުންގެ ބެލުމުގެ ދަށަށް ގެންގޮސް ތަހުގީގުކޮށް ބަންދުވެސް ކުރަމުން އަންނަ ކަމަށެވެ.
މީގެއިތުރުން ތޮލާލު ވިދާޅުވީ، ބައެއް ފަރާތްތަކުގެ އަމިއްލަ ޓުވިޓާ އެކައުންޓުތަކުން ޔާމީން ރަޝީދަށް އިންޒާރުދީ ފުލުހުންގެ ޓުވިޓާ ޓެގްކޮށްފަވެސް ޓުވީޓުތަކެއް ކޮށްފައިވާ ކަމަށާއި، އެހެންނަމަވެސް އެ މައްސަލަތައްވެސް ބަލާފައިނުވާކަން އޭނާ ވަނީ ފާހަގަކުރައްވާފަ އެވެ.
ދައުލަތުގެ މުއައްސަސާއަކުން ރައްޔަތުންގެ ހައްގަކަށް އިހުމާލުވާކަމުގެ ޝަކުވާ އަންނަނަމަ އެ ޝަކުވާތައް ބެލުމުގެ ބާރު ގާނޫނުން އެ ކޮމިޝަނަށް ލިބިފައިވާކަމަށްވެސް ތޮލާލު ވަނީ ވިދާޅުވެފައެވެ.
ތޮލާލު ވިދާޅުވީ، އިންސާނީ ހައްގުތަކަށް އިހުތިރާމުކުރާ ސަގާފަތެއް އުފެދުމަށް މިހާރު މަސައްކަތްކުރަމުން އަންނަ ތަނެއް ނުފެންނަ ކަމަށާއި، ދައުލަތުން މިކަމާ ވިސްނަންޖެހޭ ކަމަށެވެ. އެގޮތުން މިކަމުން ސިޔާސީ މަންފާއެއް ލިބެންވެސް ނެތް ކަމަށް އޭނާ ވަނީ ބުނެފައެވެ.
ޓްރާންސްޕޭރެންސީ މޯލްޑިވްސްގައި މިވަގުތު އިސްކޮށް ހަރަކާތްތެރިވަމުން އަންނަ ތޮލާލު އަންނަނީ ޔާމީން ރަޝީދުގެ ގާތިލުން އިންސާފުގެ ކުރިމައްޗަށް ގެނައުމަށް ބުރަ މަސައްކަތްތަކެއްކޮށް، އަޑު އުފުލަމުންނެވެ.
