ޖިހާދު ފުރުމަށް ހުއްދައެއް ނުދިން، ޖިހާދު ވިދާޅުވީ މިއީ "ޝަރަފުގެ އިނާމު" ކަމަށް
ޖިހާދު ވިދާޅުވީ، ކޯޓުން ނިންމާފައިވާ ނިންމުން އިންސާފުވެރި ނޫން ކަމަށް
ކުރީގެ ނައިބުރައީސް އަބްދުﷲ ޖިހާދު: ޖިހާދުގެ މައްޗަށް އުފުލާފައިވާ ދައުވާއާ ގުޅިގެން ފުރުން މަނާކޮށް، ކްރިމިނަލް ކޯޓުން މީގެ ކުރިންވެސް އަމުރު ނެރުނު
ކ. ފުށިދިއްގަރު ފަޅު މައްސަލައިގައި ކުރީގެ ނައިބު ރައީސް އަބްދުﷲ ޖިހާދުގެ މައްޗަށް އުފުލާފައިވާ ދައުވާއާ ގުޅިގެން ފުރުން މަނާކުރުމަށް ކްރިމިނަލް ކޯޓުން އަނެއްކާވެސް ނިންމައިފިއެވެ.
ހޯމަ ދުވަހު ކްރިމިނަލް ކޯޓުގައި ކުރިއަށްދިޔަ އަޑުއެހުމުގައި ޖިހާދުގެ ފަރާތުން ބޭސްފަރުވާއަށް ފުރަން ބޭނުންވާކަން ފާހަގަ ކުރައްވައި ހުށައަޅުއްވާފައިވާ ހުށައެޅުއްވުމާ ގުޅޭގޮތުން ގާޒީ ވަނީ ގޮތެއް ނިންމަވާފައެވެ. އެގޮތުން ޖިހާދަކީ ބޭސްފަރުވާއަށް ރާއްޖެއިން ބޭރަށް ވަޑައިގަންނަވަން ޖެހޭ ބޭފުޅެއް ނަމަވެސް، އެކަމާ ގުޅޭ ލިއެކިއުންތައް ހުށައަޅާފައި ނުވާކަމަށް ވިދާޅުވެ ގާޒީ ވަނީ ފުރުމަށް ހުއްދަ ނުދިނުމަށް ނިންމާފައެވެ.
އެކަމާ ގުޅޭގޮތުން "ރާއްޖެއެމްވީ"އާ ވާހަކަ ދައްކަވަމުން ޖިހާދު ވިދާޅުވީ، ކޯޓުން ނިންމާފައިވާ ނިންމުން އިންސާފުވެރި ނޫން ކަމަށެވެ. އެގޮތުން ބޭސްފަރުވާއަށް ވަޑައިގަންނަވަން ޖެހޭކަމާމެދު ޝައްކެއް ނެތްކަން ކޯޓުންވެސް ފާހަގަ ކުރައްވައި، ދައުލަތުންވެސް ޖިހާދު ފުރުމަށް އިއުތިރާޒު ނުކުރާއިރު، ހުށައަޅަން ޖެހެނީ ކޮން ލިއެކިއުންތަކެއްކަންވެސް ޝަރީއަތުން ސާފުކޮށްދީފައި ނުވާކަމަށް ޖިހާދު ވިދާޅުވިއެވެ.
ޖިހާދުގެ މައްޗަށް އުފުލާފައިވާ ދައުވާއާ ގުޅިގެން ފުރުން މަނާކޮށް، ކްރިމިނަލް ކޯޓުން މީގެ ކުރިންވެސް އަމުރު ނެރުނެވެ. ނަމަވެސް އެ އަމުރު ހައިކޯޓުން ބާތިލް ކުރުމުން، ސުޕްރީމް ކޯޓުންވެސް އޭރު ވަނީ ހައިކޯޓުގެ ހުކުމަށް ތާއީދުކޮށްފައެވެ. ކްރިމިނަލް ކޯޓުން ޖިހާދު ފުރުން މަނާކޮށް، ޖިހާދުގެ ޕާސްޕޯޓް ހިފެހެއްޓުމަށް ނެރުނު އަމުރު، ޖިހާދުގެ ފަރާތުން އޭރު ހައިކޯޓުގައި އިސްތިއުނާފް ކުރުމުން، ޖެނުއަރީ މަހުގެ 13 ވަނަ ދުވަހު ހައިކޯޓުން ވަނީ ކްރިމިނަލް ކޯޓުން ނެރެފައިވާ އަމުރު ބާތިލްކަމަށް ނިންމާފައެވެ. އެހެންކަމުން ޕްރޮސެކިއުޓަރ ޖެނެރަލްގެ އޮފީހުން އޭރު ވަނީ ހައިކޯޓުގެ ނިންމުން ސުޕްރީމް ކޯޓުގައި އިލްތިމާސްކޮށްފައެވެ. މި މައްސަލާގައި ސުޕްރީމް ކޯޓުން ވަނީ ކްރިމިނަލް ކޯޓުން ޖިހާދު ފުރުން މަނާކޮށް ޕާސްޕޯޓު ހިފެހެއްޓި އަމުރު ބާތިލްކަމަށް ހައިކޯޓުން ނިންމާފައިވާ ނިންމުން ރަނގަޅުކަމަށް ނިންމައި، ހައިކޯޓުގެ ނިންމުމަށް ތާއީދުކުރައްވާފައެވެ.
މި މައްސަލައިގައި ހައި ކޯޓުން ކުރި ޙުކުމުގައި ބުނެފައިވަނީ، ޖިހާދު ފުރުން މަނާކޮށް ކްރިމިނަލް ކޯޓުން ނެރިފައިވާ އަމުރަކީ ޝަރުއީ އަދި ޤާނޫނީ އުސޫލުތަކާ ޚިލާފަށް ނެރެފައިވާ އަމުރެއް ކަމަށެވެ. އަދި މައްސަލަ ބެއްލެވި ފަނޑިޔާރުންގެ އިއްތިފާޤުން އެ އަމުރު ވަނީ ބާތިލުކޮށްފައެވެ.
ޖިހާދުގެ ފަރާތުން އޭރު ހުށައެޅި އިސްތިއުނާފީ ނުކުތާތައް:
މި މައްސަލަ އިސްތިއުނާފުކޮށް ޖިހާދުގެ ފަރާތުން ހުށަހެޅި ފުރަތަމަ ނުކުތާއަކީ އޭނާ ރާއްޖެއިން ބޭރަށް ފުރުން މަނާކޮށްފައިވަނީ ޖިނާއީ އިޖުރާޢަތުގެ ޤާނޫނުގައި ކަނޑައަޅާފައިވާ އުސޫލުތަކާ ޚިލާފަށް ކަމަށެވެ.
ދެވަނަ ނުކުތާއެއްގެ ގޮތުން ޖިހާދުގެ ވަކީލުން ބުނެފައިވަނީ، އޭނާގެ މައްޗަށް ހުށަހަޅާފައިވާ ދައުވާއަކީ ޖިނާއީ އިޖުރާޢަތުގެ ޤާނޫނުގައި ބުނާ ބޮޑު ކުށަކަށް ނުވާއިރު، އިސްތިއުނާފު ކޮށްފައިވާ އަމުރުގައި އެއީ ބޮޑުކުށެއްކަމުގައި އޮތް އޮތުންވެސް އެއީ ހުށަހެޅިފައިވާ ދައުވާއާ ޚިލާފަށް ޝަރީއަތުން ކަނޑައަޅާފައިވާކަމެއް ކަމަށެވެ.
ތިންވަނަ ކަމެއްގެ ގޮތުން ޖިހާދުގެ ފަރާތުން ވަނީ، ކްރިމިނަލް ކޯޓުގެ މި އަމުރަކީ ޤާނޫނު އަސާސީގެ 41 ވަނަ މާއްދާއިން ލިބިދޭ ދަތުރުފަތުރުކުރުމުގެ އަސާސީ ޙައްޤަށް އުނިކަން އަންނަ ފަދަ އަމުރެއްކަން ބަޔާންކުރައްވާފައެވެ. އަދި ފުރުމަށް ހަމަޖެހިފައިވާ ތާރީޚާއި، ދެކޮޅު ޓިކެޓުވެސް ޖިހާދުގެ ފަރާތުން ހުށަހަޅާފައިވާކަން އިސްތިއުނާފުގައި ފާހަގަކޮށްފައިވެއެވެ.
ފަހު ނުކުތާއެއްގެ ގޮތުން ޖިހާދުގެ ފަރާތުން ހުށަހަޅާފައިވާ ނުކުތާއަކީ ކްރިމިނަލް ކޯޓުގެ މި އަމުރު ނެރުމުގައި ޙަވާލާދީފައިވާ ހައި ކޯޓުގެ ގަޟިއްޔާ ތަތްބީޤުކޮށްފައިވަނީ ޤާނޫނީ އުސޫލުތަކާ ޚިލާފަށްކަމަށް ބަޔާންކޮށް ހުށަހަޅާފައިވާ ނުކުތާއެވެ. އަދި އެ ކަންކަން ސުޕްރީމް ކޯޓުގައިވެސް ޖިހާދުގެ ފަރާތުން ފާހަގަކޮށްފައިވެއެވެ.
