ނ. މާފަރުގައި ތަރައްގީކުރަން ހަމަޖެހިފައިވާ އެއާޕޯޓުގެ މަސައްކަތް، އެމްޑީއޭގެ ލީޑަރު އަހުމަދު ސިޔާމް (ސަން ސިޔާމް) ގެ ކުންފުންޏާ ހަވާލުކޮށްގެން ކުރިއަށް ގެންދާ މަސައްކަތް ހުއްޓާލުމުގެ ވަގުތީ އަމުރެއް ނެރެދެވެން ނެތް ކަަމށް ހައިކޯޓުން ހުކުމް ކޮށްފިއެވެ.

މާފަރު އެއާޕޯޓުގެ މަސައްކަތް ސަން ސިޔާމް ރިސޯޓްސްއާ މިދިޔަ މަހު ހަވާލު ކޮށްފައިވާއިރު، ހައި ކޯޓުން އަންގާރަ ދުވަހު އެގޮތަށް ނިންމީ އެ އެއާޕޯޓް ހަދަން މިލޭނިއަމް ކުންފުންޏާ ހަވާލު ކޮށްފައި ވަނިކޮށް އެ އެއްބަސްވުން ސަރުކާރުން އުވާލި މައްސަލައިގާ އެ ކުންފުނީގެ ފަރާތުން ސިވިލް ކޯޓަށް ހުށަހަޅާފައިވާ މައްސަލަ މިމެންދެން އެއާޕޯޓްގެ މަސައްކަތް ހުއްޓުވުމުގެ ވަގުތީ އަމުރަކަށް އެދުމުންނެވެ.

މިލޭނިއަމް އިން އެދުނީ އެއްބަސްވުން އުވައިލި މައްސަލާގައި އެ ކުންފުނިން ސިވިލް ކޯޓަށް ހުށަހަޅާފައިވާ މައްސަލަ ނިމެންދެން މާފަރު އެއާޕޯޓާ ގުޅޭ މުއާމަލާތެއް ނުކުރުމަށް އަމުރުކޮށް ދިނުމަށެވެ. އެކަމަކު ސިވިލް ކޯޓުން ވެސް  ނިންމާފައި ވަނީ އެފަދަ އަމުރެއް ނެރެދެވެން ނެތް ކަމަށެވެ.

މި މައްސަލަ އެ މިލޭނިއަމްގެ ފަރާތުން ހައި ކޯޓުގައި އިސްތިއުނާފް ކުރުމުން އެ ކޯޓުން ކުރި ހުކުމުގައި ވަނީ އެ ކުންފުނިން އެއާޕޯޓުގެ މަސައްކަތް އެކަށީގެންވާ ގޮތެއްގައި ކޮށްފައި ނުވާ ކަމަށެވެ.

އެގޮތުން އެއާޕޯޓްގެ ޚިދުމަތް ފަށަން ޖެހޭ މުއްދަތަށް މަސައްކަތް ނުނިންމޭނެ ކަމަށް މިލޭނިއަމް އިން ބުނާ ކަމަށެވެ. އެހެންވެ، އެ މައްސަލާގައި ހިމާޔަތް ލިބެންޖެހޭ މައުޟޫއީ ހައްގެއް ފާޅުކަން ބޮޑު ގޮތެއްގައި ފެންނަން ނެތް ކަމަށް ހައި ކޯޓުގެ ހުކުމުގައިވެ އެވެ.

މީގެ އިތުރުން ހައިކޯޓުގެ ހުކުމުގައި ވަނީ ވަގުތީ އަމުރެއް ނެރޭއިރު އަމުރު ރައްދުވާ ފަރާތުގެ މަސްލަހަތަށް ވެސް ބަލަން ޖެހޭ ކަމަށާއި މިލޭނިއަމް އިން އެދުނު އަމުރު ނެރެދީގެން ހިމާޔަތް ކުރެވޭ އެ ކުންފުނީގެ މަސްލަހަތަށް ވުރެ، އެ އަމުރު ނުނެރެފި ނަމަ ހިމާޔަތް ކުރެވޭ ދައުލަތުގެ މަސްލަހަތު ބޮޑު ކަމަށް ހުކުމުގައި ވެއެވެ.

މާފަރު އެއާޕޯޓް ތަރައްގީ ކުރުމުގެ މަޝްރޫއު މިލޭނިއަމް ކެޕިޓަލް މެނޭޖްމަންޓް އިންވެސްޓްމަންޓް ޕްރައިވެޓް ލިމިޓެޑާ އެކު ހަދާފައި އޮތް އެއްބަސްވުން މިދިޔަ އަހަރުގެ ފެބްރުއަރީގައި ވަނީ އުވާލާފައެވެ.

މިލޭނިއަމް ކެޕިޓަލްއަކީ ކުރީގެ ނައިބު ރައީސް އަހްމަދު އަދީބުގެ އާއިލީ ބޭފުޅެއް ކަމުގައިވާ މ. ޝުރާ މަންޒިލް ހާމިދު އިސްމާއީލްގެ ހިއްސާ އޮންނަ ކުންފުންޏެކެވެ.

ރިޔާސީ ލޯންޗުކޮޅު ގޮވި ހާދިސާގެ ތަހުގީގަށް ހާމިދު އިސްމާއިލް ހައްޔަރުކޮށްފައިވުމުން، މާފަރު އެއާޕޯޓް ތަރައްގީ ކުރުމުގެ މަސައްކަތް މިލޭނިއަމް ކެޕިޓަލް އަށް ކުރެވޭނެ ކަމަށް ގަބޫލުނުކުރައްވާ ކަމަށް މިދިޔަ އަހަރުގެ ފެބްރުއަރީ 8 ވަނަ ދުވަހު ރައީސް ޔާމީން ވިދާޅުވެފައިވެ އެވެ. ރައީސް ޔާމީން އެހެން ވިދާޅުވީ، ސިޔާމްގެ އުފަން ރަށް ކަމަށްވާ ނ. ކުޑަފަރީ ބަނދަރު ހުޅުވުމުގެ ރަސްމިއްޔާތުގަ އެވެ.

މާފަރު އެއާޕޯޓް ތަރައްގީކުރަން ހުޅުވާލި ފުރުސަތުގައި ސަން ކުންފުންޏާއި ތުރުކީގެ ކުންފުނިން އެ މަޝްރޫއަށް ޝައުގުވެރިކަން ފާޅުކުރީ މިދިޔަ އަހަރުގެ މާޗް މަހުގެ ތެރޭގަ އެވެ. ނަމަވެސް، ބިޑް އެވަލުއޭޓް ނުކޮށް މިހާ ގިނަ ދުވަސްވީ ކީއްވެކަމެއް ސަރުކާރުގެ އެއްވެސް އިދާރާއަކުން ހާމައެއް ނުކުރި އެވެ.

ކުރިން ސަރުކާރުން ލަފާކޮށްފައިވާ ގޮތުގައި، މާފަރު އެއާޕޯޓުގެ މަޝްރޫއަކީ ގާތްގަނޑަކަށް 17 މިލިއަން ޑޮލަރު (262 މިލިއަން ރުފިޔާ) ގެ މަޝްރޫއެކެވެ.

މާފަރު އެއާޕޯޓް ތަރައްގީ ކުރުމަށާއި އިތުރު މަޝްރޫއަކަށް ސަން ކުންފުނިން ތިން ބިލިއަން ރުފިޔާގެ ލޯނެއް ނަގަން މަސައްކަތް ކޮށްފައިވެ އެވެ. އެ ލޯނަށް ދިވެހި ސަރުކާރުން ގެރެންޓީ ދިނުމަށް ހަމަޖެހިފައި އޮތްއިރު، ލޯނަށް ދިވެހި ސަރުކާރުން ގެރެންޓީ ދިންކަމެއް އަދި ކަށަވަރު ނުކުރެ އެވެ.