އިނގިރޭސި ޕްރިމިއާ ލީގުގައި ހޮނިހިރު ދުވަހުގެރޭ އާސެނަލް ބަލިކޮށް ގަދަ ހަތަރެއްގެ އުއްމީދު އެންމެ ފަހުގެ ޗެމްޕިއަން ލިވަޕޫލުން އާކުރިއިރު، ލެސްޓާ ސިޓީ ބަލިކޮށް ލީގު ޗެމްޕިއަންކަން ހޯދުމާ ގާތަށް މެންޗެސްޓާ ސިޓީ ޖެހިލައިފިއެވެ.

ގަދަ ހަތަރެއްގެ އުއްމީދު ލިވަޕޫލުން އާކުރީ ރަށުން ބޭރުގައި ކުޅުނު މެޗުން އާސެނަލް އަތުން 3-0 ގެ ނަތީޖާއަކުން މޮޅުވެގެންނެވެ.

މި މެޗުގެ ފުރަތަމަ ހާފުގައި ލަނޑެއް ނުފެނުނު ނަމަވެސް، މުޅި މެޗު ކޮންޓްރޯލް ކޮށްގެން ކުޅެފައިވަނީ ލިވަޕޫލުންނެވެ. އެގޮތުން ލިވަޕޫލުން މި މެޗުގައި ގިނަ ހަމަލާތަކެއް އުފެއްދިއިރު، އެ ޓީމުން ލީޑު ނަގާފައިވަނީ މެޗުގެ 64 ވަނަ މިނެޓުގައެވެ. ޓްރެންޓް އަލެކްސަންޑަ-އާނޯލްޑް ނަގައިދިން ހުރަހަކުން މި ލަނޑު ލިވަޕޫލަށް ކާމިޔާބުކޮށްދިނީ ބަދަލު ކުޅުންތެރިއެއްގެ ގޮތުގައި ކުޅެން އެރި ޑިއޯގޯ ޖޮޓާއެވެ.

އަދި އޭގެ ހަތަރު މިނެޓު ފަހުން ލިވަޕޫލަށް ލީޑު ފުޅާކޮށްދިން ލަނޑު ކާމިޔާބުކޮށްދިނީ މުޙައްމަދު ސަލާހެވެ. އަދި މެޗު ނިމެން އަށް މިނެޓަށް ވެފައި ވަނިކޮށް، އާސެނަލުގެ ގަބްރިއެލް މަގަލްހައެސް ހެދި ގޯހެއްގެ ފައިދާ ނަގައި، މެޗުގައި މޮޅު ކުޅުމެއް ދެއްކި ޖޮޓާ ވަނީ ލިވަޕޫލުގެ ތިންވަނަ ލަނޑު ކާމިޔާބުކޮށްދީފައެވެ.

މި މޮޅާއެކު ތާވަލުގެ ފަސްވަނައަށް ލިވަޕޫލް ޖެހިލިއިރު، އެ ޓީމަށް ކުޅުނު 30 މެޗުން ވަނީ 49 ޕޮއިންޓް ލިބިފައެވެ. ތާވަލުގެ ހަވަނައަށް ވެއްޓުނު ވެސްޓް ހޭމް ޔުނައިޓެޑަށް 29 މެޗުން 49 ޕޮއިންޓް ލިބިފައިވާއިރު، ހަތަރުވަނައިގައި އޮތް ޗެލްސީއަށް 30 މެޗުން ލިބިފައިވަނީ 51 ޕޮއިންޓެވެ. މީގެ އިތުރުން ލިވަޕޫލް އަތުން ބަލިވި އާސެނަލް އޮތީ ތާވަލުގެ ނުވަވަނައިގައި 30 މެޗުން 42 ޕޮއިންޓާއެކުއެވެ.

މީގެ އިތުރުން ލީގު ޗެމްޕިއަންކަން ހޯދުމާ ގާތަށް ސިޓީ ޖެހިލީ ރަށުން ބޭރުގައި ކުޅުނު މެޗުން ލެސްޓާ އަތުން 2-0 ގެ ނަތީޖާއަކުން މޮޅުވެގެންނެވެ. މި މެޗުން ސިޓީ މޮޅުވިއިރު، ބާކީ އޮތް ހަތް މެޗުގެ ތެރެއިން ހަތަރު މެޗުން މޮޅުވެގެން ސިޓީއަށް ލީގު ޗެމްޕިއަންކަން ކަށަވަރުކުރެވޭނެއެވެ.

ލެސްޓާގެ ދަނޑުގައި ކުޅުނު މެޗުގައި ސިޓީން މޮޅު ކުޅުމެއް ދެއްކިއިރު، އެ ޓީމުން ލީޑު ނަގާފައިވަނީ ދެވަނަ ހާފު ފަށައިގެން 13 ވަނަ މިނެޓުގައެވެ. މި ލަނޑު ސިޓީއަށް ކާމިޔާބުކޮށްދިނީ ބެންޖަމިން މެންޑީއެވެ. އަދި މެޗުގެ 74 ވަނަ މިނެޓުގައި ރަހީމް ސްޓާލިން ދިން ބޯޅައަކުން ގަބްރިއެލް ޖީސޫސް ވަނީ ލަނޑެއް ޖަހައި، ސިޓީގެ ލީޑު ފުޅާކޮށްދީފައެވެ.

މި މޮޅާއެކު ތާވަލުގެ އެއްވަނައިގައި ސިޓީ އޮތީ 17 ޕޮއިންޓުގެ ލީޑަކާއެކުއެވެ. އެގޮތުން ކުޅުނު 31 މެޗުން ސިޓީއަށް 74 ޕޮއިންޓް ލިބިފައިވާއިރު، ދެވަނައިގައި އޮތް މެންޗެސްޓާ ޔުނައިޓެޑަށް 29 މެޗުން ވަނީ 57 ޕޮއިންޓް ލިބިފައެވެ. އަދި ސިޓީ އަތުން ބަލިވި ލެސްޓާ އޮތީ ތާވަލުގެ ތިންވަނައިގައި 30 މެޗުން 56 ޕޮއިންޓާއެކުއެވެ.