އަމިއްލަ ޖަމްއިއްޔާއެއް ކަމަށްވާ މާސީގެ ފަރާތުން ލޭ ހަދިޔާ ކުރުމުގެ ކެމްޕޭނެއް ހޮނިހިރު ދުވަހު ފަށައިފިއެވެ.
މާސީން ބުނީ، މި ހަރަކާތަކީ، ތެލެސީމިއާ ސެންޓަރަށް ލޭ ލިބުމުގެ ދަތިކަން ކުރިމަތިވެފައިވާތީ، ލޭގެ އެހީތެރިކަން ފޯރުކޯށްދިނުމަށް ބޭއްވޭ ޚާއްސަ ހަރަކާތެއް ކަމަށެވެ.
"އަހަރެމެންގެ ލޭ – އެކުދިންގެ ފުރާނަ " މި ޝިއާރުގެ ދަށުން ކުރިއަށްގެންދާ ކެމްޕޭން ހަރަކާތުގައި ލޭ ހަދިޔާ ކުރަން ބޭނުންވާ މީހުންނަށް، އޭޕްރީލް 3 ވަނަ ދުވަހުގެ ހެނދުނު 10 އަކުން ހަވީރު 6އަކާ ދެމެދު ތެލެސީމިއާ ސެންޓަރަށް ވަޑައިގެން ލޭ ހަދިޔާ ކުރެވޭނެ ކަމަށް، އެ ޖަމްއިއްޔާއިން މައުލޫމާތު ދެއެވެ.
މާސީގެ ނާއިބުރައީސާ މަރިޔަމް ނިޔާޝާ "ރާއްޖެއެމްވީ" އަށް ވިދާޅުވީ، ލޭ ހަދިޔާކުރުމުގެ ކެމްޕޭނަށް ތައްޔާރުވުމުގެ ގޮތުން، ސޯޝަލް މީޑިއާގައި، ޚާއްސަ ހަރަކާތްތަކެއް ކުރިއަށް ގެންގޮސްފައި ވާކަމަށެވެ. އަދި ކެމްޕޭނުގައި ރެޖިސްޓަރީ ކުރަން ބޭނުންވާ މީހުންނަށް އެފުރުސަތު ހުޅުވާލައިގެން ކުރިއަށް ގެންދެވިފައިވާ ކަމަށެވެ.
އެގޮތުން ކުރިއަށް ގެންދިޔަ ހަރަކާތުގައި 80 އަށް ވުރެ ގިނަ މީހުން ނަން ނޯޓު ކޮށްފައި ވާކަމަށް މާސީން މައުލޫމާތުދެއެވެ. މީގެއިތުރުން، ކުރިން ނަން ނޯޓު ކޮށްފައި ނުވާ މީހުންނަށް ވެސް، ލޭ ހަދިޔާ ކުރުމުގެ ހަރަކާތް ކުރިއަށްދާ ވަގުތު، ތެލެސީމިއާ ސެންޓަރަށް ދިއުމުން، ލޭ ނެގުމުގެ އިންތިޒާމު ހަމަޖެހިގެން ދާނެކަމަށް މާސީން ބުންޏެވެ.
ވީހާވެސް ގިނަބަޔަކު މި ހަރަކާތުގައި ބައިވެރިވެ ލޭ ހަދިޔާ ކުރާނެ ކަމަށް މާސީން އުންމީދުކުރެއެވެ.
މިއީ މާސީން އިސްނަގައިގެން ކުރިއަށް ގެންދާ، ލޭ ހަދިޔާ ކުރުމުގެ ފުރަތަމަ ކެމްޕޭނެވެ. އެހެން ނަމަވެސް ކުރިމަގުގައި، މިފަދަ ގިނަ ހަރަކާތްތައް ރާވާފައިވާ ވާކަމަށް މާސީން ބުނެއެވެ.
މާސީ އަކީ މުޖުތަމައުގައި އެހީތެރިކަމަށް ބޭނުންޖެހިފައިވާ މީހުންނަށް، އެހީތެރިވުމުގެ ގޮތުން ޒުވާނުންތަކެއް އިސްނަގައިގެން ހިންގާ ޖަމުޢިއްޔާއެކެވެ. އެގޮތުން ދަތި ހާލުގައި އުޅެމުންދާ މީހުންނަށް އެހީތެރިވުމަށް، ކޮންމެ އަހަރެއްގެ ރަމަޟާން މަހު، އެ ޖަމްއިއްޔާއިން ކުރިއަށްގެންދާ "ހަދިޔާ ވަށި" ޕްރޮގްރާމް ފާހަގަކޮށްލެވެއެވެ.
