ކޮވިޑް-19 އާއި ގުޅިގެން ޖަމާއަތުގައި ގައިދުރުކަމާއެކު ނަމާދުކުރުން މިނިސްޓްރީ އޮފް އިސްލާމިކް އެފެއާޒުން ނިމުމަކަށް ގެނެސްފިއެވެ.

އިސްލާމިކް މިނިސްޓަރ ޑރ.އަހުމަދު ޒާހިރު އަލީ ކުރެއްވި ޓުވީޓެއްގައި ވިދާޅުވީ ގައިދުރުކޮށް ނަމާދު ކުރުމަށް ނިންމާފައިވާ ނިންމުން 2 އޭޕްރީލްވާ ހުކުރު ދުވަހުގެ މަޣުރިބު ނަމާދަށްފަހު ނިމުމަކަށް ގެނެސްފައިވާކަމަށެވެ. އަދި ހުކުރު ދުވަހުގެ މަޣުރިބު ނަމާދުން ފެށިގެން މިސްކިތްތަކުގައި ނަމާދުކުރާނީ ޖަމާއަތުގައި ކައިރި ކައިރީ ތިބެގެންނެވެ.

ކޮވިޑްގެ ހާލަތު ގޯސްވެ ޖަމާއަތުގައި ގައިދުރުކަމާއެކު ނަމާދުކުރުން ކުރިއަށްގެންދިޔުމަށް މާރޗް 1 ވަނަ ދުވަހު ވަނީ އަންގާފައެވެ. މާލޭގައި ކޮވިޑް-19ގެ ހާލަތު ގޯސްވެ މި ސަރަހައްދުގައި ޖަމާއަތުގައި ނަމާދުކުރުން މެދުކަނޑާލަންޖެހޭ ހާލަތަށް ގޮސްފައިވާކަމަށް އިސްލާމިކް މިނިސްޓްރީން ވަނީ އޭރު ބުނެފައެވެ. އެގޮތުން ކޮވިޑް-19 ރާއްޖޭގައި ހަލުވިކަމާއެކު ފެތުރެމުންދިއުމާއި، ހާލަތު އިތުރަށް ގޯސްވަމުންދާކަމަށް ކަމާބެހޭ އިދާރާތަކުން މައުލޫމާތު ދެއްވާފައިވާތީ، ފަތުވާ މަޖިލީހާއި ދީނީ އިލްމުވެރިންނާ މަޝްވަރާކޮށް، މިހާރުގެ ހާލަތަށް ރިއާޔަތްކޮށް، ރައްކާތެރިކަމުގެ ފިޔަވަޅެއްގެ ގޮތުން، 01 މާރޗް 2021 ވާ ހޯމަ ދުވަހުގެ މެންދުރު ނަމާދުން ފެށިގެން ކޮވިޑްގެ މިހާލަތުން ލުޔެއް ލިބެންދެން ގްރޭޓަރ މާލޭ ސަރަހައްދުގެ ހުރިހާ މިސްކިތެއްގައި ނަމާދުގެ ޖަމާއަތް، ގައި ދުރުކަމާއެކު ކުރިއަށް ގެންދިއުމަށް އިސްލާމިކް މިނިސްޓްރީން ވަނީ އޭރު އަންގާފައެވެ. މިގޮތަށް ނިންމާފައިވަނީ މިސްކިތުގެ ޖަމާއަތް މެދުކަނޑާލައި މިސްކިތް ބަންދުކުރުމަކީ ރައްޔިތުންނަށް ލިބޭނެ ވަރަށް ބޮޑު ހިތްދަތިކަމަކަށްވުމާއި، މިހާލަތުން އަރައިގަތުމަށް ކުރެވެން އޮތްކަމަކީ މިސްކިތް ބަންދު ކުރުމުގެ ބަދަލުގައި ގައިދުރުކަމާއިއެކު ނަމާދުގެ ޖަމާއަތް، ހެދުން ކަމުގައި ފަތުވާ މަޖިލީހާއި ބައެއް އިލްމުވެރިން ލަފާދެއްވާފައިވާތީކަމަށް އިސްލާމިކް މިނިސްޓްރީން އޭރު މައުލޫމާތުދެއެވެ.

ނަމާދު ގައިދުރުކޮށް ކުރުމަށް ނިންމި ނިންމުމާއިމެދު ދީނީ އިލްމުވެރިންގެ މެދުގައި ޚިޔާލު ތަފާތުވެސް ވެފައިވެއެވެ. ނަމަވެސް ރާއްޖޭގެ ފަތުވާ މަޖިލީހުންވެސް މިހާލަތުގައި ގައިދުރުކޮށް ނަމާދު ކުރެވިދާނެކަމަށްވަނީ ބުނެފައެވެ.