ރޭޕާ ދެކޮޅަށް އަޑުއުފުލަން ކަމަށް ބުނެ އިދިކޮޅުން މަގުމައްޗަށް

އިދިކޮޅު ޕީޕީއެމް/ޕީއެންސީ ކޯލިޝަނުން ސިލްސިލާކޮށް ކުރަމުންދާ މުޒާހަރާގެ ތެރެއިން ރޭޕް ކުރުމާއި ދެކޮޅަށް އަޑު އުފުލުމަށް ކަމަށްބުނެ ހުކުރު ދުވަހު ވެސް މަގުތަކަށް އެއްވެ މުޒާހަރާ ކޮށްފިއެވެ.

ކޮވިޑް-19ގެ މިހާލަތުގައި ހެލްތް ޕްރޮޓެކްޝަން އޭޖެންސީ (އެޗްޕީއޭ)ން ކަނޑައަޅާފައިވާ ފިޔަވަޅުތަކަށް ބޯލެނބުމެއްނެތި އަދި އާއްމު ރައްޔިތުންނަށް އުނދަގޫވާނެހެން އިދިކޮޅުން މި މުޒަހާރާ ކޮށްފައިވަނީ މާލޭގެ އެކި ސަރަަހައްދުތަކުގައެވެ. ގައިދުރުކަމެއް ނެތި ކުރި މި މުޒާހަރާގައި އިދިކޮޅުން ވަނީ މި ސަރުކާރަކީ ރޭޕްކުރާ މީހުންނަށް ހިމާޔަތްދޭ ސަރުކާރެއް ކަމަށް ބުނެ ގިނަ ތުހުމަތުތަކެއް ކޮށްފައެވެ.

މި މުޒާހަރާއާއި ގުޅިގެން މުޒާހަރާގެ ބައިވެރިން ފުލުހުންގެ އަމުރަށް ނުކިޔަމަންތެރިވުމުގެ ސަބަބުން މިހާތަނަށް 11 މީހަކު ހައްޔަރު ކޮށްފައިވާކަމަށް ފުލުހުން މައުލޫމާތުދެއެވެ. މިމުޒާހަރާތަކާއި ގުޅިގެން ފުލުހުން ބުނަމުން އަންނަނީ ހެލްތް ޕްރޮޓެކްޝަން އެޖެންސީ (އެޗްޕީއޭ)ގެ އެންގުންތަކާ ޚިލާފުވެ، އާންމު ރައްޔިތުންގެ ސިއްހަތު ނުރައްކަލުގެ ތެރެއަށް ހުށަހެޅޭގޮތަށް އަމަލުތައް ބަހައްޓާ ފަރާތްތަކާމެދު ގާނޫނީ ފިޔަވަޅު އަޅާނެކަމަށެވެ. މީގެއިތުރުން އިދިކޮޅުން ކުރިޔަށް ގެންދާ މުޒާހަރާތަކަކީ އެޗްޕީއޭގެ ގައިޑްލައިނާ އަދި ސުލްހަވެރިކަމާއެކު އެއްވެ އުޅުމުގެ ޤާނޫނާވެސް ހިލާފަށް ބާއްވަމުން އަންނަ އެއްވުންތަކެއް ކަމަށް ފުލުހުން ބުނެއެވެ.

މުޒާހަރާތަކުން ހައްޔަރުކުރާ މީހުން ފުލުހުން އަންނަނީ ހެލްތު ޕްރޮޓެކްޝަން އެޖެންސީ (އެޗްޕީއޭ) ގެ ގައިޑްލައިނާ ޚިލާފުވުމުން 1،000 ރުފިޔާއިން ޖޫރިމަނާ ކުރުމަށްފަހު ދޫކޮށްލަމުންނެވެ.

އިދިކޮޅުން އެކި ނަންނަމުގައި މި މުޒާހަރާތައް ކުރިއަށް ގެންދާއިރު މި މުޒާހަރާތަކުގައި ސަރުކާރަށް ވަރަށް ބޮޑަށް ފާޑުކިޔާ ކުރީގެ ރައީސް އަބްދުﷲ ޔާމިން ދޫކޮށްލުމަށް ވެސް ދަނީ ގޮވާލަމުންނެވެ. މާލޭގެ އެކި ސަރަޙައްދުތަކުގައި ވަކިވަކި ޓީމުތައް ހަދައިގެން ކުރަމުންދާ މި މުޒާހަރާތަކުގައި މިހާތަނަށް ފުލުހުންނަށް ހުތުރުބަހުން ވާހަކަ ދައްކައި، ފުލުހުންނާ ކުރިމަތިލާފައި ނުވާނެކަމަށް ކޯލިޝަނުން މީގެ ކުރިން ބުނެފައިވެއެވެ.