ފްލެޓު ދޫކޮށްލުމުގެ ފުރުސަތު ފަންނީ މީހުންނަށް ހުޅުވާލައިފި

ހިޔާ މަޝްރޫއުގައި ފްލެޓު ދޫކުރަން ބަހާލާފައިވާ ކެޓެގަރީތަކުގެ ތެރެއިން ފަންނީ ދާއިރާތަކުން ފްލެޓު ލިބިފައިވާ މީހުންނަށް ފްލެޓު ދޫކޮށްލުމުގެ ފުރުސަތު ހުޅުވާލައިފިއެވެ.

ރައީސް އޮފީހުން ބުނީ ފަންނީ ދާއިރާތަކުގެ ކެޓެގަރީތަކުގެ ތެރެއިން ފެލްޓު ލިބި ދާއިމީ ލިސްޓުގައި ހިމެނިފައިވާ މީހުންނަށް ސަރުކާރުން ހިންގާ ބޯހިޔާވަހިކަމުގެ އެހެން މަޝްރޫޢުތަކުން އަގު ބޮޑު ނަމަވެސް ޖާގައިގެ ގޮތުން ތަނަވަސް ފްލެޓްތަކަކަށް ބަދަލުވުމަށް ބޭނުންވާ ނަމަ މިހާރު ލިބިފައިވާ ތަންތަން ދޫކޮށްލުމުގެ ފުރުސަތު ހުޅުވާލާފައިވާ ކަމަށެވެ. އެގޮތުން ފަންނީ ދާއިރާތަކުގައި މަސައްކަތްކުރާ މީހުންނަކީ އާމްދަނީގެ ގޮތުންވެސް ތަނަވަސް ބަޔަކަށް ވާނެތީ މި ވަގުތު ދިރިއުޅުމުގެ ހާލަތަށް ބަލައި މިހާރު ހުރި ހިޔާ ފަލްޓުތަކުގެ ފެންވަރުގެ ތަންތަނަށް ވުރެ ފެންވަރު ރަނގަޅު ތަނަވަސް ތަންތަނަށް ބޮޑު އަގުގައި ދިއުމުގެ ފުރުސަތު އޮންނާނެ ކަމަށް ރައީސް އޮފީހުން ބުންޏެވެ.

ރައީސް އޮފީހުގެ ތަރުޖަމާން މަބްރޫކް އަޒީޒް ރާއްޖެ އެމްވީ އަށް ވިދާޅުވީ ސަރުކާރުން އެ މަސައްކަތް ފަށައިގެން ކުރަމުން އަންނަތާ މިހާރު ދުވަސްކޮޅެއް ވެފައިވާ ކަމަށާއި، އެކަން އެގޮތަށް ނިންމީ ބައެއް މަދަނީ ޖަމިއްޔާތަކާއި އާންމުންނާ ވެސް މަޝްވަރާކުރުމަށް ފަހު ކަމަށެވެ. އަދި ގިނަ ބަޔަކު ބުރަ ވަނީ އެގޮތަށް ކަމަށާއި، ބޭނުމަކީ މިވަގުތު ބޯހިޔާވަހިކަން އެންމެ ބޭނުންވެފައިވާ ފަރާތްތަކަށް އެ ފުރުސަތު ހޯދައިދިނުން ކަމަށް ވިދާޅުވިއެވެ.

އޭނާ ވިދާޅުވީ އެގޮތަށް ފްލެޓު ދޫކޮށްލާ މީހުންނަށް ދެން އެންމެ އަވަހަކަށް ސަރުކާރުން ކުރިއަށްގެންދާ ބޯހިޔާވަހިކަމުގެ މަޝްރޫގެ ދަށުން ފްލެޓު ލިބޭނެ ކަމުގެ ޔަގީންކަން އަރުވާނެ ކަމަށެވެ. އަދި މިހާރު ވެސް އެފަދަ ފުރުސަތަކަށް ބޭނުންވެފައި ފަންނީ ދާއިރާއިން ފްލެޓު ލިބުނު ބައެއް މީހުން ތިބި ކަމަށް މަބްރޫކް ވިދާޅުވިއެވެ.

ސަރުކާރުގެ ބޯހިޔާވަހިކަމުގެ ސިޔާސަތާއި ހިޔާ މަޝްރޫއުގެ ފްލެޓްތައް ދިނުމާއި ގުޅޭގޮތުން ރައްޔިތުންގެ މަޖިލީހުގެ ގައުމީ ތަރައްގީއާއި ތަރިކައިގެ ކޮމިޓީން ދިރާސާކޮށް އެކުލަވާލި ރިޕޯޓުގައި ވެސް ހިޔާ މަޝްރޫއަކީ އިޖުތިމާއީ ބޯހިޔާ ވަހިކަމަށް އަމާޒުކުރެވިފައިވާ މަޝްރޫއަކަށް ވީހިނދު އެ މަޝްރޫއުގެ ދަށުން ފްލެޓް ލިބޭ މީހުންނަކީ އިޖްތިމާއީ ބޯހިޔާވަހިކަމަށް ބޭނުން ޖެހިފައިވާ ބައެއްކަން ކަށަވަރުރު ކުރިމުގެ މުހިންމުކަން ފާހަގަކޮށްފައިވެއެވެ.

މިދިޔަ ސަރުކާރުން ފެށި ބޯހިޔާވަހިކަމުގެ މަޝްރޫގައި ކެތެގަރީތައް ބަހާލާފައިވާ ގޮތާ މެދު ގިނަ ކަންބޮޑުވުންތަކެއް ހުރި އިރު މިހާރު އެ މަޝްރޫގައި ފްލެޓު ލިބޭ މީހުންގެ ދާއިމީ ލިސްޓެއް އެކުލަވާލައި އެކަންއޮތީ އެންމެ ފަހު މަރުހަލާގައެވެ. އެގޮތުން މިދިޔަ މަހު ތަޅުދަނޑި ހަވާލުކުރާނެ ކަމަށް ބުނުމަށް ފަހު އެކަން މި މަހަށް ފަސްކޮށްފައިވާއިރު ލަސްވަމުންދަނީ މިފަދަ މައްސަލަތައް ހައްލުކުރުމަށް ކަމަށް ސަރުކާރުން ބުނެއެވެ.